ಮಂಗಳೂರು | ಹೂಡಿಕೆ ನೆಪ: ಆನ್‌ಲೈನ್‌ನಲ್ಲಿ ₹ 9.88 ಲಕ್ಷ ವಂಚನೆ

ಮಂಗಳೂರು: ಷೇರು ಮಾರುಕಟ್ಟೆಯಲ್ಲಿ ಹೂಡಿಕೆ ಮಾಡಿ ಲಾಭ ಗಳಿಸಬಹುದು ಎಂದು ನಂಬಿಸಿ ಒಟ್ಟು ₹ 9.88 ಲಕ್ಷ ಕಟ್ಟಿಸಿಕೊಂಡು ವಂಚಿಸಿದ ಬಗ್ಗೆ ಸಂತ್ರಸ್ತ ವ್ಯಕ್ತಿ ದೂರು ನೀಡಿದ್ದು, ಇಲ್ಲಿನ ಗ್ರಾಮಾಂತರ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ

‘ನನ್ನ ಮೊಬೈಲ್‌ಗೆ ವಾಟ್ಸ್‌ ಆ್ಯಪ್‌ನಲ್ಲಿ ಇಷಿಕಾ ಜೋಷಿ ಎಂಬ ಹೆಸರಿನಿಂದ ವ್ಯಕ್ತಿಯೊಬ್ಬರು ಕೊಂಡಿಯೊಂದನ್ನು ಕಳುಹಿಸಿದ್ದರು. ಅದನ್ನು ಬಳಸಿ ಸಿನಿಮಾವೊಂದಕ್ಕೆ 5 ಸ್ಟಾರ್  ರೇಟಿಂಗ್ ಕೊಟ್ಟಿದ್ದೆ. ಅದಕ್ಕೆ ₹ 150  ಪಾವತಿಸಿದ್ದರು. ನಂತರ ನನ್ನನ್ನು ಟೆಲಿಗ್ರಾಂ ಖಾತೆ ಮೂಲಕ ನವೀನ್ ಅರೋರ ಎಂಬ ಹೆಸರಿನಿಂದ ಸಂಪರ್ಕಿಸಿದ ವ್ಯಕ್ತಿ ತಮ್ಮನ್ನು ‘ಡೇಟಾ ಟ್ಯೂಟರ್’ ಎಂದು ಪರಿಚಯಿಸಿಕೊಂಡರು. ₹ 5 ಸಾವಿರ ನೀಡಿ ಟಾಸ್ಕ್ ಗ್ರೂಪ್‌ಗೆ ಸೇರಬಹುದು ಎಂದರು. ಹಣ ನೀಡಿದ ಬಳಿಕ ‘5000 ವಿಐಪಿ ಗ್ರೂಪ್‌ ಹೈ ಕ್ವಾಲಿಟಿ’ ಎಂಬ ಟೆಲಿಗ್ರಾಂ ಗ್ರೂಪ್‌ಗೆ ಸೇರಿಸಿದ್ದರು. ನಂತರ ಬೇರೆ ಬೇರೆ ಷೇರುಗಳಿಗೆ ಹೂಡಿಕೆ ಮಾಡುವಂತೆ ಸಂದೇಶ ಕಳುಹಿಸಿ ನನ್ನಿಂದ ₹ 9.88 ಲಕ್ಷ ಕಟ್ಟಿಸಿಕೊಂಡು ಹಣ ಮರಳಿಸದೇ ವಂಚಿಸಿದ್ದಾರೆ ಎಂಬುದಾಗಿ ಸಂತ್ರಸ್ತ ವ್ಯಕ್ತಿ ದೂರಿನಲ್ಲಿ ತಿಳಿಸಿದ್ದಾರೆ' ಎಂದು ಪೊಲೀಸರು ಮಾಹಿತಿ ನೀಡಿದ್ದಾರೆ.