ಉಕ್ಕಿದ ನೇತ್ರಾವತಿ, ಕುಮಾರಧಾರಾ

ಉಪ್ಪಿನಂಗಡಿ: ನೀರಿನ ಮಟ್ಟ ತುಸು ಇಳಿಕೆಯಾಗಿದ್ದ ಕುಮಾರಧಾರಾ ಮತ್ತು ನೇತ್ರಾವತಿ ಈ ಎರಡೂ
ಜೀವ ನದಿಗಳು ಶುಕ್ರವಾರ ಮಧ್ಯಾಹ್ನದ ಬಳಿಕ ಮತ್ತೆ ಮೈದುಂಬಿಕೊಂಡು ಉಕ್ಕಿ ಹರಿಯಲಾರಂಭಿಸಿವೆ.

ಶುಕ್ರವಾರ ಬೆಳಿಗ್ಗೆ ಕೊನೆಗೊಂಡಂತೆ ಕಳೆದ 24 ತಾಸುಗಳಲ್ಲಿ ಉಪ್ಪಿನಂಗಡಿಯಲ್ಲಿ 32.4 ಮಿ.ಮೀ ಮಳೆ ದಾಖಲಾಗಿದೆ. ಇಲ್ಲಿ ಮಳೆ ಕಡಿಮೆ ಆಗಿದ್ದರೂ, ಕುಮಾರಧಾರಾ ಮತ್ತು ನೇತ್ರಾವತಿ ನದಿಯ ಉಗಮ ಪ್ರದೇಶಗವಾದ ಘಟ್ಟ ಪ್ರದೇಶದಲ್ಲಿ ಭಾರಿ ಮಳೆಯಾಗುತ್ತಿರುವುದರಿಂದ ಎರಡೂ ನದಿಗಳಲ್ಲಿ ನೀರಿನ ಮಟ್ಟ ಏರಿಕೆಯಾಗಿದೆ.

ಇಲ್ಲಿನ ಸಹಸ್ರಲಿಂಗೇಶ್ವರ ಮಹಾಕಾಳಿ ದೇವಾಲಯದ
ಬಳಿ ನದಿಗೆ ಇಳಿಯುವ ಸ್ನಾನಘಟ್ಟದಲ್ಲಿ 38 ಮೆಟ್ಟಿಲುಗಳಲ್ಲಿ ಬೆಳಿಗ್ಗೆ 18 ಮೆಟ್ಟಿಲುಗಳು ಮುಳುಗಿದ್ದವು.

ಸಂಜೆ ವೇಳೆಗೆ 28 ಮೆಟ್ಟಿಲುಗಳು ಮುಳುಗಿವೆ.