ಮಗು ಮಾರಾಟ ಹೆತ್ತವರಿಗೂ, ಪಡೆದವರಿಗೂ ಶಿಕ್ಷೆ

ದಾವಣಗೆರೆ: ಮೂರು ದಿನಗಳ ಮಗುವನ್ನು ಮಾರಾಟ ಮಾಡಿದ ಪ್ರಕರಣಕ್ಕೆ ಸಂಬಂಧಿಸಿದಂತೆ ಮಗುವಿನ ಹೆತ್ತವರಿಗೆ ಮತ್ತು ಮಗುವನ್ನು ಖರೀದಿ ಮಾಡಿದ ದಂಪತಿಗೆ 7 ವರ್ಷ ಜೈಲು ಶಿಕ್ಷೆ, ತಲಾ ₹ 25 ಸಾವಿರ ದಂಡ ವಿಧಿಸಿ ಪ್ರಧಾನ ಜಿಲ್ಲಾ ಮತ್ತು ಸೆಷನ್ಸ್‌ ನ್ಯಾಯಾಲಯ ತೀರ್ಪಿತ್ತಿದೆ.

ಇಲ್ಲಿನ ಬೀಡಿ ಲೇಔಟ್‌ ನಿವಾಸಿ ಸಿಖಂದರ್‌ ಅವರ ಪತ್ನಿ ಶಬೀನಾ 2017ರ ಡಿಸೆಂಬರ್‌ 19ರಂದು ಹೆಣ್ಣುಮಗುವಿಗೆ ಜನ್ಮ ನೀಡಿದ್ದರು. ಮೂರು ದಿನಗಳ ಬಳಿಕ ಆ ಮಗುವನ್ನು ಅಜಾದ್‌ನಗರದ ಹಫೀಜಾ ಬಾನು–ಮುಜೀಬುಲ್ಲಾ ದಂಪತಿಗೆ ₹ 20 ಸಾವಿರಕ್ಕೆ ಮಾರಾಟ ಮಾಡಿದ್ದರು.

ಈ ಬಗ್ಗೆ ಜಿಲ್ಲಾ ಮಕ್ಕಳ ರಕ್ಷಣಾ ಘಟಕದ ಸಿಬ್ಬಂದಿ ಪರಿಶೀಲನೆ ಮಾಡಿ ಜಿಲ್ಲಾ ಮಕ್ಕಳ ರಕ್ಷಣಾಧಿಕಾರಿಗೆ ವರದಿ ನೀಡಿದ್ದರು. ಅವರು ಮಹಿಳಾ ಪೊಲೀಸ್‌ ಠಾಣೆಗೆ ದೂರು ನೀಡಿದ್ದರು. ಆಗಿನ ಪಿಎಸ್‌ಐ ನಾಗಮ್ಮ ಹಾಗೂ ದೇವರಾಜ್‌ ಟಿ.ವಿ. ತನಿಖೆ ಮಾಡಿ ದೋಷಾರೋಪ ‍ಪಟ್ಟಿ ಸಲ್ಲಿಸಿದ್ದರು. ವಿಚಾರಣೆ ನಡೆಸಿದ ನ್ಯಾಯಾಧೀಶ ಅಂಬಾದಾಸ್‌ ಕುಲಕರ್ಣಿ ಜಿ. ಆರೋಪ ಸಾಬೀತಾಗಿದೆ ಎಂದು ತೀರ್ಪಿತ್ತಿದ್ದಾರೆ. ಸರ್ಕಾರಿ ಅಭಿಯೋಜಕ ಎಸ್‌.ವಿ. ಪಾಟೀಲ್‌ ವಾದಿಸಿದ್ದರು.