ಕಡಿಮೆ ಜಮೀನಿನಲ್ಲೂ ಕೈತುಂಬ ಲಾಭ: ರೈತನ ಕೈಹಿಡಿದ ಹೊಟ್ಟೆ ಮೆಣಸಿನಕಾಯಿ ಬೆಳೆ

ಮಾಯಕೊಂಡ: ಒಂದು ಎಕರೆ ಜಮೀನಿನಲ್ಲಿ, ಮೂರು ವರ್ಷದ ಅಡಿಕೆ ಗಿಡಗಳ ನಡುವೆ ನಳನಳಿಸುತ್ತಿರುವ ದೊಣ್ಣೆ ಮೆಣಸಿನಕಾಯಿ (ಹೊಟ್ಟೆ ಮೆಣಸಿನಕಾಯಿ) ಬೆಳೆದಿರುವ ಇಲ್ಲಿನ ಪ್ರಗತಿಪರ ರೈತ ಎಸ್.ಎನ್. ರಾಮಸ್ವಾಮಿ ಅಂತರಬೆಳೆ ಬೆಲೆದು ಲಕ್ಷ ರೂಪಾಯಿ ಆದಾಯ ಪಡೆಯಬಹುದು ಎಂಬುದನ್ನು ತೋರಿಸಿಕೊಟ್ಟಿದ್ದಾರೆ.

ವಿವಿಧ ತಳಿಗಳ ಸಸಿ ಸಿದ್ಧಪಡಿಸಿ ಮಾರಾಟ ಮಾಡುವ ನರ್ಸರಿ ಮಾಲೀಕರೂ ಆಗಿರುವ ರಾಮಸ್ವಾಮಿ, ತರಕಾರಿ ಬೆಳೆಗಳನ್ನೂ ಬೆಳೆಯುತ್ತಿದ್ದಾರೆ. ಅಡಿಕೆ ಗಿಡಗಳು ದೊಡ್ಡದಾಗುತ್ತಿದ್ದರೂ, ಅವುಗಳ ನಡುವೆಯೇ ತರಕಾರಿ ಬೆಳೆದು ಉತ್ತಮ‌ ಇಳುವರಿ ಪಡೆಯುತ್ತಿದ್ದಾರೆ.

ಈಗಾಗಲೇ ಆರು ಬಾರಿ ಕಟಾವು ಮಾಡಲಾಗಿದ್ದು, ಅಂದಾಜು 20 ಕ್ವಿಂಟಲ್ ಇಳುವರಿ ಬಂದಿದೆ. ಆರಂಭದಲ್ಲಿ ಪ್ರತಿ ಕೆ.ಜಿ. ಮೆಣಸಿನಕಾಯಿಗೆ  ₹ 60 ಇದ್ದ ದರ ನಂತರ ₹ 80ಕ್ಕೆ ಜಿಗಿಯಿತು. ಪ್ರಸ್ತುತ ಮಾರುಕಟ್ಟೆಯಲ್ಲಿ ಹೊಟ್ಟೆ ಮೆಣಸಿನಕಾಯಿ ₹ 100ರ ಗಡಿಯಲ್ಲಿದ್ದು, ಈವರೆಗೆ ₹ 1.30 ಲಕ್ಷ ಆದಾಯ ಲಭಿಸಿದೆ ಎಂದು ಅವರು ಹೇಳುತ್ತಾರೆ.

6ನೇ ಬಾರಿ ಕಟಾವು ಮುಗಿದ ನಂತರವೂ ಬೆಳೆ ನಳನಳಿಸುತ್ತಿದ್ದು, ಗಿಡಗಳು ಉತ್ತಮವಾಗಿ ಹೂ ಮತ್ತು ಕಾಯಿ ಕಟ್ಟುತ್ತಿವೆ. ಒಟ್ಟಾರೆ 50ರಿಂದ 60 ಕ್ವಿಂಟಲ್ ಫಸಲು ಸಿಗುವ ನಿರೀಕ್ಷೆಯಿದೆ. ಮುಂದೆಯೂ ಇದೇ ದರ ಸಿಕ್ಕರೆ ₹ 3 ಲಕ್ಷದಿಂದ ₹ 4 ಲಕ್ಷ ಆದಾಯ ದೊರೆಯುವ ಸಾಧ್ಯತೆ ಇದೆ ಎಂಬ ವಿಶ್ವಾಸ ಅವರದ್ದು.