ದಾವಣಗೆರೆ | ಭತ್ತದ ದರ ಕುಸಿತ, ತಂತ್ರಾಂಶದ ಹೊಡೆತ

ದಾವಣಗೆರೆ: ಬೆಲೆಯ ತೀವ್ರ ಕುಸಿತ ಕಂಡಿರುವುದರಿಂದ ಬೆಳೆಗಾರರು ಭತ್ತವನ್ನು ಮಾರಾಟ ಮಾಡಲಾಗದೇ, ಉಳಿಸಿಕೊಳ್ಳಲೂ ಆಗದೆ ಸಂಕಷ್ಟಕ್ಕೆ ಸಿಲುಕಿದ್ದಾರೆ. ಇಲ್ಲಿನ ಕೃಷಿ ಉತ್ಪನ್ನ ಮಾರುಕಟ್ಟೆ ಸಮಿತಿಯಲ್ಲಿ (ಎಪಿಎಂಸಿ) ಮೇ 27ರಂದು (ಮಂಗಳವಾರ) ಭತ್ತದ ದರ ಕ್ವಿಂಟಲ್‌ಗೆ ₹ 2,000ದಿಂದ ₹2050 ಇತ್ತು. ವ್ಯಾಪಾರಿಗಳು ರೈತರ ಮನೆ ಬಾಗಿಲಿಗೆ ತೆರಳಿ ₹ 1,850 ರಿಂದ ₹ 1,900ರಂತೆ ಕ್ವಿಂಟಲ್‌ ಭತ್ತ ಖರೀದಿಸುತ್ತಿದ್ದಾರೆ.

ಜಿಲ್ಲೆಯಲ್ಲಿ ಬಹುಪಾಲು ರೈತರು ಆರ್‌ಎನ್‌ಆರ್‌ ತಳಿಯ ಭತ್ತವನ್ನೇ ಬೆಳೆಯುತ್ತಿದ್ದಾರೆ. 2023ರಲ್ಲಿ ಇಲ್ಲಿನ ಎಪಿಎಂಸಿಯಲ್ಲಿ ಕ್ವಿಂಟಲ್‌ ಭತ್ತಕ್ಕೆ ಗರಿಷ್ಠ ₹ 3,200 ದರ ಇತ್ತು. 2024ರಲ್ಲಿ ದರ ₹ 2,600 ಇತ್ತು. ಆದರೆ, ಈ ವರ್ಷ ₹2,000 ಆಸುಪಾಸಿನಲ್ಲಿಯೇ ದರ ಇದೆ. ಈಗಾಗಲೇ ಭತ್ತ ಕಟಾವು ಮಾಡಿರುವ ರೈತರು ನಷ್ಟದ ಭೀತಿಯಲ್ಲಿದ್ದಾರೆ.

ಜಿಲ್ಲೆಯಲ್ಲಿ ಮುಂಗಾರು ಪೂರ್ವ ಮಳೆ ಆರ್ಭಟ ನಡೆಸಿದ್ದು, ಬಿಸಿಲು ಅಪರೂಪ ಎಂಬಂತಾಗಿದೆ. ಇದರಿಂದ ಭತ್ತವನ್ನು ಒಣಗಿಸಲು ಸಾಧ್ಯವಾಗುತ್ತಿಲ್ಲ. ತೇವಾಂಶದ ಕಾರಣಕ್ಕೂ ಭತ್ತದ ದರ ಕುಸಿಯುತ್ತಿದೆ. ಅಪರೂಪಕ್ಕೆ ಸೂರ್ಯ ಕಾಣಿಸಿಕೊಂಡರೆ ರೈತರು ಎಪಿಎಂಸಿ ಅಂಗಳ, ಸಿಮೆಂಟ್‌ ಹಾಗೂ ಡಾಂಬರು ರಸ್ತೆಗಳಲ್ಲಿ ಭತ್ತ ಹರಡಿ ಒಣಗಿಸುತ್ತಿದ್ದಾರೆ. ಒಣಗಿದರೆ ಸ್ವಲ್ಪ ಹೆಚ್ಚಿನ ದರ ಸಿಗಬಹುದು ಎಂಬ ನಿರೀಕ್ಷೆ ರೈತರದ್ದಾಗಿದೆ.

ದಿನವೊಂದಕ್ಕೆ 14,000ದಿಂದ 15,000 ಕ್ವಿಂಟಲ್‌ ಭತ್ತ ಎಪಿಎಂಸಿಗೆ ಆವಕವಾಗುತ್ತಿದೆ. ವರುಣ ಬಿಡುವು ನೀಡಿ, ಬಿಸಿಲಿನ ಪ್ರಖರತೆ ಹೆಚ್ಚಿದರೆ ಈ ಪ್ರಮಾಣ ಮತ್ತಷ್ಟು ಹೆಚ್ಚಲಿದೆ. ಇಲ್ಲಿನ ರೈಸ್‌ಮಿಲ್‌ ಹಾಗೂ ಮಂಡಕ್ಕಿ ಬಟ್ಟಿಗಳ ಮಾಲೀಕರೇ ಅಧಿಕ ಪ್ರಮಾಣದಲ್ಲಿ ಭತ್ತ ಖರೀದಿಸುತ್ತಿದ್ದಾರೆ. ಅದೇ ಭತ್ತದಿಂದ ತೆಗೆಯಲಾದ ಅಕ್ಕಿಯನ್ನು ತಮಿಳುನಾಡು, ಆಂಧ್ರ, ಗುಜರಾತ್‌ಗೆ ರವಾನಿಸುತ್ತಿದ್ದಾರೆ. ತುಮಕೂರು, ರಾಯಚೂರು, ಗಂಗಾವತಿ ಹಾಗೂ ಕಾರಟಗಿಗೂ ಇಲ್ಲಿಂದ ಭತ್ತ ಮಾರಾಟ ಮಾಡಲಾಗುತ್ತಿದೆ.

2023 ಹಾಗೂ 2024ರಲ್ಲಿ ಮುಕ್ತ ಮಾರುಕಟ್ಟೆ ಹಾಗೂ ಎಪಿಎಂಸಿಗಳಲ್ಲಿ ಉತ್ತಮ ದರ ದೊರೆತಿದ್ದರಿಂದ ರೈತರು ಬೆಂಬಲಬೆಲೆಯ ಖರೀದಿ ಕೇಂದ್ರಗಳತ್ತ ಮುಖ ಮಾಡಿರಲಿಲ್ಲ. ಈ ವರ್ಷ ದರ ಕುಸಿತದ ಕಾರಣಕ್ಕೆ ಅನ್ನದಾತರು ಬೆಂಬಲ ಬೆಲೆಯ ನಿರೀಕ್ಷೆಯಲ್ಲಿದ್ದಾರೆ.

‘ಬಲ’ ನೀಡದ ಬೆಂಬಲ ಬೆಲೆ:

ಸರ್ಕಾರ ಬೆಂಬಲ ಬೆಲೆ ಯೋಜನೆಯಡಿ ಕ್ವಿಂಟಲ್‌ ‘ಎ’ ಗ್ರೇಡ್‌ ಭತ್ತಕ್ಕೆ ₹ 2,320 ಹಾಗೂ ಸಾಮಾನ್ಯ ಭತ್ತಕ್ಕೆ ₹ 2,300 ದರ ನಿಗದಿ ಮಾಡಿದೆ. ರೈತರು ಖರೀದಿ ಕೇಂದ್ರಗಳಲ್ಲಿ ಬೆಳೆ ನೋಂದಾಯಿಸಿ ಉತ್ಪನ್ನ ಮಾರಾಟ ಮಾಡಬಹುದಾಗಿದೆ. ಆದರೆ, ಫ್ರೂಟ್ಸ್‌ ತಂತ್ರಾಂಶವು ರೈತರ ಬೆಳೆ ನೋಂದಣಿಗೆ ಅಡ್ಡಗಾಲಾಗಿದೆ.

ಜಿಲ್ಲೆಯಲ್ಲಿ ಎರಡು ಹಂಗಾಮಿನಲ್ಲಿ ಮಾತ್ರ ಬೆಳೆ ಬೆಳೆಯಲಾಗುತ್ತದೆ. ಜನವರಿಯಿಂದ ಮೇವರೆಗೆ ಬೇಸಿಗೆ ಬೆಳೆ, ಜುಲೈನಿಂದ ಡಿಸೆಂಬರ್‌ಗೆ ಮಳೆಗಾಲದ ಬೆಳೆ (ಮುಂಗಾರು) ಬೆಳೆಯಲಾಗುತ್ತದೆ. ಆದರೆ, ಫ್ರೂಟ್ಸ್‌ ತಂತ್ರಾಂಶದಲ್ಲಿ ಹಿಂಗಾರು, ಮುಂಗಾರು, ಬೇಸಿಗೆ ಎಂದು ಮೂರು ಭಾಗವಾಗಿ ಬೆಳೆಯನ್ನು ವಿಂಗಡಿಸಲಾಗಿದೆ. ಇದರಿಂದಾಗಿ ಬೇಸಿಗೆ ಬೆಳೆಯನ್ನು ನೋಂದಾಯಿಸಿಕೊಳ್ಳಲು ತಾಂತ್ರಿಕ ಸಮಸ್ಯೆ ಎದುರಾಗಿದೆ.

ಫ್ರೂಟ್ಸ್‌ ತಂತ್ರಾಂಶದ ಪ್ರಕಾರ ಹಿಂಗಾರು ಅವಧಿಯ ಭತ್ತ ಖರೀದಿಗೆ ಬೆಳೆ ಸಮೀಕ್ಷೆ ನಡೆಸಿದಾಗ ರೈತರ ಜಮೀನುಗಳು ಪಾಳು (ಖಾಲಿ) ಇರುತ್ತವೆ. ಹೀಗಾಗಿ ಇದುವರೆಗೂ ರೈತರು ಬೆಳೆಯನ್ನು ಖರೀದಿ ಕೇಂದ್ರಗಳಲ್ಲಿ ನೋಂದಾಯಿಸಿಕೊಳ್ಳಲು, ಮಾರಾಟ ಮಾಡಲು ಸಾಧ್ಯವಾಗಿಲ್ಲ. ಜಿಲ್ಲೆಯಲ್ಲಿ ಇದುವರೆಗೆ ಮೂವರು ರೈತರು ಮಾತ್ರವೇ ಭತ್ತದ ಬೆಳೆಯನ್ನು ನೋಂದಾಯಿಸಿಕೊಳ್ಳಲು ಸಾಧ್ಯವಾಗಿದೆ. ಹಿಂಗಾರು/ ಬೇಸಿಗೆ ಎಂದು ತಂತ್ರಾಂಶದಲ್ಲಿ ಸರಿಪಡಿಸಿದರೆ ರೈತರಿಗೆ ಅನುಕೂಲವಾಗಲಿದೆ.

ತಾಂತ್ರಿಕ ಸಮಸ್ಯೆ ಬಗೆಹರಿದರೆ ರೈತರು ಆಧಾರ್‌ ಕಾರ್ಡ್‌ ಹಾಗೂ ಪಹಣಿಯೊಂದಿಗೆ ಖರೀದಿ ಕೇಂದ್ರಕ್ಕೆ ತೆರಳಿ ಹೆಬ್ಬೆಟ್ಟು ನೀಡಿ ಬೆಳೆ ನೋಂದಾಯಿಸಿಕೊಳ್ಳಲು ಸಾಧ್ಯವಾಗಲಿದೆ.

ಜಿಲ್ಲೆಯಲ್ಲಿ ಮೇ ಮೊದಲ ವಾರದಿಂದಲೇ ಭತ್ತದ ಕಟಾವು ಶುರುವಾಗಿದೆ. ಈಗಾಗಲೇ ಶೇ 50 ರಷ್ಟು ಕಟಾವು ಮುಗಿದಿದ್ದು, ಈ ಪೈಕಿ ಶೇ 30 ರಷ್ಟು ಭತ್ತವನ್ನು ಮಾರಾಟ ಮಾಡಲಾಗಿದೆ. ಇನ್ನುಳಿದ ಶೇ 20 ರಷ್ಟು ಭತ್ತವು ರಸ್ತೆ ಹಾಗೂ ಖಾಲಿ ಜಾಗದಲ್ಲಿದ್ದು, ಒಣಗಿಸುವ ಪ್ರಕ್ರಿಯೆ ನಡೆಯುತ್ತಿದೆ. ಮಳೆಯ ಭೀತಿಯಿಂದ ರೈತರು ಆರಂಭದಲ್ಲಿ ಅತ್ಯಂತ ಕಡಿಮೆ ದರಕ್ಕೆ (ಕ್ವಿಂಟಲ್‌ಗೆ ₹1,600 ರಂತೆ) ಮಾರಾಟ ಮಾಡಿ ಕೈಸುಟ್ಟುಕೊಂಡರು.