ದಂಪತಿ ಕಟ್ಟಿಹಾಕಿ ಚಿನ್ನಾಭರಣ, ನಗದು ದರೋಡೆ

ಚನ್ನಗಿರಿ: ತಾಲ್ಲೂಕಿನ ಹೆಬ್ಬಳಗೆರೆ ಗ್ರಾಮದ ಹೊರವಲಯದಲ್ಲಿ ಒಂಟಿ ಮನೆಗೆ ನುಗ್ಗಿದ ಡಕಾಯಿತರು ದಂಪತಿಯನ್ನು ಕಟ್ಟಿಹಾಕಿ ₹16 ಲಕ್ಷ ಹಾಗೂ ₹15 ಲಕ್ಷ ಮೌಲ್ಯದ ಬಂಗಾರ ಹಾಗೂ ಬೆಳ್ಳಿಯ ಆಭರಣವನ್ನು ದರೋಡೆ ಮಾಡಿದ್ದಾರೆ.

7ರಿಂದ 8 ಜನರ ಡಕಾಯತರ ಗುಂಪು ಶುಕ್ರವಾರ ರಾತ್ರಿ ಮನೆಗೆ ನುಗ್ಗಿದ್ದು, ಮಾಲೀಕ ಶಿವಮೂರ್ತಪ್ಪ ಹಾಗೂ ಅವರ ಪತ್ನಿ ರತ್ನಮ್ಮ ಅವರ ಕೈಕಾಲು ಕಟ್ಟಿ ಹಾಕಿ ಮನೆಯಲ್ಲಿದ್ದ ಲಾಕರ್ ಅನ್ನು ಹಾರೆಯಿಂದ ಹೊಡೆದು ಆಭರಣ ಹಾಗೂ ನಗದನ್ನು ದೋಚಿಕೊಂಡು ಹೋಗಿದ್ದಾರೆ.

ರತ್ನಮ್ಮ ಅವರು ಹೇಗೊ ಹಗ್ಗದಿಂದ ಕಟ್ಟನ್ನು ಬಿಚ್ಚಿಕೊಂಡು ಸಂಬಂಧಿಕರಾದ ಶಿವಣ್ಣ ಅವರಿಗೆ ಕರೆ ಮಾಡಿ ಮನೆಗೆ ಕರೆಸಿಕೊಂಡು ಪೊಲೀಸ್ ಠಾಣೆಗೆ ದೂರು ನೀಡಿದ್ದಾರೆ.

ಸ್ಥಳಕ್ಕೆ ಸರ್ಕಲ್ ಇನ್‌ಸ್ಪೆಕ್ಟರ್ ಮಧು ಹಾಗೂ ತಂಡ ಶ್ವಾನ ದಳದೊಂದಿಗೆ ಭೇಟಿ ನೀಡಿ ಪರಿಶೀಲಿಸಿತು. ಚನ್ನಗಿರಿ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.