ಕನ್ನಡದ ಕೆಲಸಕ್ಕೆ ಯುವಜನರ ಹಚ್ಚಿ

ದಾವಣಗೆರೆ: ಮೊಬೈಲ್‌, ಲ್ಯಾಪ್‌ಟಾಪ್‌, ಟ್ಯಾಬ್‌, ಗ್ಯಾಜೆಟ್‌, ಕಂಪ್ಯೂಟರ್‌, ವಾಟ್ಸ್‌ಆ್ಯಪ್‌, ಫೇಸ್‌ಬುಕ್, ಟ್ವಿಟರ್‌ಗಳನ್ನು ಬೆರಳ ತುದಿಯಲ್ಲಿ ಇಟ್ಟುಕೊಂಡಿರುವ ಯುವಜನರನ್ನು ಕನ್ನಡದ ಕೆಲಸಕ್ಕೆ ಹಚ್ಚುವ ಕಾರ್ಯವಾಗಬೇಕು ಎಂದು ಹಿರಿಯ ಸಾಹಿತಿ ಎನ್‌,ಟಿ. ಎರ‍್ರಿಸ್ವಾಮಿ ಕರೆ ನೀಡಿದರು.

ಜಿಲ್ಲಾ ಸಾಹಿತ್ಯ ಸಮ್ಮೇಳನದ ಸರ್ವಾಧ್ಯಕ್ಷತೆಯನ್ನು ವಹಿಸಿ ಅವರು ಸೋಮವಾರ ಮಾತನಾಡಿದರು.

ಮೊದಲ ಪಾಠಶಾಲೆಯಾದ ಮನೆಯಲ್ಲೇ ಕನ್ನಡ ಕಂಪಿಲ್ಲ. ಮೊದಲ ಗುರುಗಳಾದ ತಾಯಿ, ತಂದೆಯನ್ನೇ ಮಮ್ಮಿ, ಡ್ಯಾಡಿ ಎಂದು ಕರೆಯುವ ಪರಿಸ್ಥಿತಿ ಇದೆ. ಇದುವೇ ಹೆತ್ತವರಿಗೂ ಖುಷಿಯ ವಿಚಾರವಾಗಿರುವುದು ದುರ್ದೈವ ಎಂದು ವಿಷಾದಿಸಿದರು.

ಇಂಗ್ಲಿಷ್‌ ಎಂಬ ಪರಭಾಷಾ ಮೋಹಿನಿಯ ಸಮ್ಮೋಹನದಿಂದ ಕನ್ನಡ ತಾಯಿ ಬಡವಾಗುತ್ತಿದ್ದಾಳೆ. ಕನ್ನಡದ ಶಾಲೆಗಳು ಅವನತಿಯತ್ತ ಸಾಗುತ್ತಿವೆ. ನಮ್ಮ ಸಂಸ್ಕೃತಿ, ಪರಂಪರೆಯ ಬೇರುಗಳನ್ನು ಕತ್ತರಿಸುವ ಕೆಲಸವಾಗುತ್ತಿದೆ. ಕನ್ನಡ ಭಾಷೆ ಅಮ್ಮನ ಭಾಷೆ ಮಾತ್ರವಾಗದೇ ಅನ್ನದ ಭಾಷೆಯೂ ಆಗಬೇಕು. ಉದ್ಯೋಗ ನೀಡುವ ಭಾಷೆಯಾಗಬೇಕು. ರುಡ್‌ಸೆಟ್‌ನಂಥ ಸಂಸ್ಥೆಗಳು ಪ್ರತಿ ತಾಲ್ಲೂಕಿನಲ್ಲಿ ತೊಡಗಿಸಿಕೊಳ್ಳಬೇಕು. ಕೃಷಿ ಉದ್ಯಮದಲ್ಲಿ ಎಲ್ಲರೂ ತೊಡಗಿಸಿಕೊಳ್ಳುವಂತಾಗಬೇಕು ಎಂದು ಹೇಳಿದರು.

ಕೇಂದ್ರ ಸರ್ಕಾರದ ಎಲ್ಲ ಇಲಾಖೆಗಳ ಪರೀಕ್ಷೆಗಳನ್ನು ಕನ್ನಡದಲ್ಲಿ ನಡೆಸಲು ಸಂವಿಧಾನಾತ್ಮಕ ರಕ್ಷಣೆ ಇದೆ. ಆದರೆ ಅದಾಗುತ್ತಿಲ್ಲ. ಕನ್ನಡಕ್ಕೆ ಶಾಸ್ತ್ರೀಯ ಸ್ಥಾನಮಾನ ಇದ್ದರೂ ಕನ್ನಡಕ್ಕೆ ಸ್ವಾಯತ್ತೆ ನೀಡಿಲ್ಲ ಎಂದು ಬೇಸರ ವ್ಯಕ್ತಪಡಿಸಿದರು.

ಎಲ್ಲ ಸರ್ಕಾರಿ ಕಚೇರಿಗಳಲ್ಲಿ ಜನವರಿಯಲ್ಲೇ ಕನ್ನಡ ಸಪ್ತಾಹ ಕಡ್ಡಾಯವಾಗಿ ಆಚರಿಸಬೇಕು. ರಾಜಕೀಯ ಸ್ಥಿತ್ಯಂತರದಿಂದ ವಿಶ್ವಕನ್ನಡ ಸಮ್ಮೇಳನ ದಾವಣಗೆರೆಯಲ್ಲಿ ನಡೆದಿಲ್ಲ. ನಡೆಸಲು ಕ್ರಮ ಕೈಗೊಳ್ಳಬೇಕು. ಜಿಲ್ಲೆ ಮತ್ತೆ ಮ್ಯಾಂಚಸ್ಟರ್‌ ನಗರ ಎಂಬ ವೈಭವಕ್ಕೆ ಮರಳಲು ಜವಳಿ ಪಾರ್ಕ್‌ಗಳನ್ನು ಆರಂಭಿಸಬೇಕು. ಎಲ್ಲ ಮಾಹಿತಿಗಳು ಕನ್ನಡದಲ್ಲೇ ದೊರೆಯುವಂತಾಗಬೇಕು. ಗ್ರಾಮ ಪಂಚಾಯಿತಿ ಮಟ್ಟದಲ್ಲಿ ಗ್ರಂಥಾಲಯಗಳಾಗಬೇಕು. 24 ಗಂಟೆ ಕಾರ್ಯನಿರ್ವಹಿಸುವ ಗ್ರಂಥಾಲಯಗಳು ನಿರ್ಮಾಣವಾಗಬೇಕು. ಬ್ಯಾಂಕಿಂಗ್‌ ಮತ್ತಯ ರೈಲ್ವೆ ಉಚಿತ ಪರೀಕ್ಷಾ ತರಬೇತಿ ಕೇಂದ್ರ ಸ್ಥಾಪಿಸಬೇಕು. ಪತ್ರಿಕಾಭವನ ಆಗಬೇಕು. ಪ್ರವಾಸೋದ್ಯಮ ಅಭಿವೃದ್ಧಿಗೊಳ್ಳಬೇಕು ಎಂದು ಒತ್ತಾಯ ಮಾಡಿದರು.