ಪರವಾನಗಿ ಶುಲ್ಕ ಹೆಚ್ಚಳಕ್ಕೆ ಎಂಜಿನಿಯರ್‌ಗಳ ವಿರೋಧ

ಹುಬ್ಬಳ್ಳಿ: ಬಿ.ಇ. ಮತ್ತು ಡಿಪ್ಲೊಮಾ ‍ಪದವೀಧರ ಕನ್ಸಲ್ಟಿಂಗ್ ಸಿವಿಲ್ ಎಂಜಿನಿಯರ್‌ಗಳ ಪರವಾನಗಿ ಶುಲ್ಕ ಹೆಚ್ಚಳ ಮಾಡಿರುವ ಮಹಾನಗರ ಪಾಲಿಕೆಯ ಕ್ರಮಕ್ಕೆ ಕನ್ಸಲ್ಟಿಂಗ್ ಸಿವಿಲ್ ಎಂಜಿನಿಯರ್ ಅಸೋಸಿಯೇಷನ್ ವಿರೋಧ ವ್ಯಕ್ತಪಡಿಸಿದೆ.

ಈ ಕುರಿತು ಪಾಲಿಕೆ ಅಧಿಕಾರಿಗಳಿಗೆ ಸೋಮವಾರ ಮನವಿ ಸಲ್ಲಿಸಿದ ಅಸೋಸಿಯೇಷನ್ ಸದಸ್ಯರು, ‘ಈ ಹಿಂದೆ ಬಿ.ಇ. ಎಂಜಿನಿಯರ್‌ಗಳಿಗೆ ₹1,500 ಹಾಗೂ ಡಿಪ್ಲೊಮಾ ಎಂಜಿನಿಯರ್‌ಗಳಿಗೆ ₹750 ಪರವಾನಗಿ ಶುಲ್ಕ ಇತ್ತು. ಈಗ ಅದನ್ನು ಕ್ರಮವಾಗಿ ₹12,500 ಮತ್ತು ₹ 9ಸಾವಿರಕ್ಕೆ ಹೆಚ್ಚಿಸಲಾಗಿದೆ. ಈ ಹಿಂದೆ ಇದ್ದ ಶುಲ್ಕ ಮಾದರಿಯನ್ನೇ ಅನುಸರಿಸಬೇಕು’ ಎಂದು ಒತ್ತಾಯಿಸಿದರು.

‘ಪಾಲಿಕೆಯ ನಿಯಮಗಳಲ್ಲಿ ಶುಲ್ಕ ಪರಿಷ್ಕರಣೆಗೆ ಅವಕಾಶ ಇಲ್ಲದಿದ್ದರೂ ಹೆಚ್ಚಳ ಮಾಡಿರುವುದು ಕಾನೂನುಬಾಹಿರ. ಎಂಟು ದಿನಗಳ ಒಳಗೆ ಸ್ಪಂದಿಸದಿದ್ದರೆ ಕಟ್ಟಡ ಪರವಾನಗಿ ಮತ್ತು ಇತರ ಎಂಜಿನಿಯರಿಂಗ್ ಕಾರ್ಯಗಳನ್ನು ಸ್ಥಗಿತಗೊಳಿಸಬೇಕಾಗುತ್ತದೆ’ ಎಂದು ಮನವಿಯಲ್ಲಿ ತಿಳಿಸಿದ್ದಾರೆ.