ಉಪ್ಪಿನಬೆಟಗೇರಿ | ಧಾರಾಕಾರ ಮಳೆ: ಸಿಡಿಲು, ಪ್ರವಾಹದ ಆರ್ಭಟ

ಉಪ್ಪಿನಬೆಟಗೇರಿ: ಉಪ್ಪಿನಬೆಟಗೇರಿ ಸೇರಿದಂತೆ ಸುತ್ತಲಿನ ಗ್ರಾಮಗಳಲ್ಲಿ ಮಂಗಳವಾರ ಮಿಂಚು, ಗುಡುಗು, ಸಿಡಿಲು ಸಹಿತ ಧಾರಾಕಾರ ಮಳೆ ಸುರಿಯಿತು.

ಬೆಳಿಗ್ಗೆಯಿಂದ ತುಂತುರು ಮಳೆಯಾಗುತ್ತಿತ್ತು. ಮಧ್ಯಾಹ್ನದ ಹೊತ್ತಿಗೆ ಮೋಡ ಕವಿದ ವಾತಾವರಣ ನಿರ್ಮಾಣವಾಗಿ ಮಳೆ ಸುರಿಯಿತು. ಗ್ರಾಮದ ಕೆಇಬಿ ಕಚೇರಿ ಆವರಣದಲ್ಲಿನ ಮರಕ್ಕೆ ಸಿಡಿಲು ಬಡಿದ ಪರಿಣಾಮ ಬಡ್ಡಿಯಿಂದ ಟೊಂಗೆಯವರೆಗೆ ಮರ ಸೀಳಿದೆ.

ಅಲ್ಲದೇ ಕಲ್ಲೆ ಮತ್ತು ಕಬ್ಬೇನೂರ ಮಾರ್ಗವಾಗಿ ಸವದತ್ತಿ ಹೆದ್ದಾರಿ ಸೇರುವ ರಸ್ತೆಯಲ್ಲಿ ಹೊಲದಲ್ಲಿನ ನೀರು ರಸ್ತೆಯ ಮೇಲೆ ಹರಿದ ಪರಿಣಾಮ ಈ ಸ್ಥಳ ಪ್ರವಾಹದಂತಾಗಿತ್ತು. ಕೆಲ ಹೊತ್ತು ಸಂಚಾರಕ್ಕೆ ಅಡ್ಡಿಯುಂಟಾಗಿತ್ತು. ಇಲ್ಲಿ ಸೇತುವೆ ನಿರ್ಮಾಣ ಕಾಮಗಾರಿ ನಡೆಯುತ್ತಿದ್ದು, ಪಕ್ಕದಲ್ಲಿ ನಿಲ್ಲಿಸಿದ್ದ ಟ್ರ‍್ಯಾಕ್ಟರ್ ಟ್ಯಾಂಕರ್ ನೀರಿನ ರಭಸಕ್ಕೆ ಉರುಳಿ ಬಿದ್ದಿದೆ.