ಧಾರವಾಡ | ತಗ್ಗಿದ ಮಳೆ ರಭಸ; ರೈತರಲ್ಲಿ ಮೂಡಿದ ಆತಂಕ

ನವಲಗುಂದ: ತಾಲ್ಲೂಕಿನಾದ್ಯಂತ ಸಮೃದ್ದ ಮಳೆ ಬೆಳೆ ಬರುವ ನಿರೀಕ್ಷೆಯಲ್ಲಿದ್ದ ರೈತರಿಗೆ ಆತಂಕ ಶುರುವಾಗಿದೆ. ಭಾರಿ ಗಾಳಿಗೆ ಜಿಟಿ ಜಿಟಿ ಮಳೆ ಹಾರಿ ಹೋಗಿದ್ದು, ಕಳೆದ ಒಂದು ತಿಂಗಳಿಂದ ಸಮರ್ಪಕ ಮಳೆಯಾಗಿಲ್ಲ. ಇದರಿಂದ ರೈತರು  ಆತಂಕಗೊಂಡಿದ್ದಾರೆ. 

ದಟ್ಟವಾದ ಮೋಡ ಕವಿದರೂ ಮಳೆಯಾಗುತ್ತಿಲ್ಲ, ಭಾರಿ ಗಾಳಿಗೆ ಮೋಡಗಳು ಬೇರೆಡೆ ಚಲಿಸಿ ಹೋಗುತ್ತಿವೆ. ರೈತರು ಮೋಡಗಳತ್ತ ಮುಖ ಮಾಡಿ ಮಳೆಗಾಗಿ ಜಾತಕ ಪಕ್ಷಿಯಂತೆ ಕಾದು ಕುಳಿತಿದ್ದಾರೆ. ತಿಂಗಳ ಹಿಂದೆ ಅತಿವೃಷ್ಟಿ ಮಳೆಗೆ ವಿವಿಧ ಬೆಳೆಗಳು ಹಾನಿಯಾಗಿ, ಅಲ್ಪ ಸ್ವಲ್ಪ ಉಳಿದುಕೊಂಡಿದ್ದವು.

ಹೆಸರು ಬೆಳೆ ಈಗ ತೇವಾಂಶ ಕೊರತೆಯಿಂದ ಹಸಿರು ಬಣ್ಣದಿಂದ ಕಪ್ಪು ಬಣ್ಣಕ್ಕೆ ತಿರುಗುತ್ತಿದೆ. ಈರುಳ್ಳಿ ಚಿಗುರೊಡೆದಿಲ್ಲ.  ಬಿತ್ತಿದ ಗೋವಿನಜೋಳ ಮೊಳಕೆಯಲ್ಲಿಯೇ ಕಮರುತ್ತಿವೆ. ಕೆಲವು ರೈತರು ಭಾರಿ ಮಳೆಯಿಂದ ಕುಂಠಿತಗೊಂಡಿದ್ದ ಹೆಸರು ಬೆಳೆಯನ್ನು ಹರಗಿ ಗೋವಿನಜೋಳ ಬಿತ್ತನೆ ಮಾಡಿದ್ದರು, ಈಗ ತೇವಾಂಶ ಕೊರತೆಯಿಂದ ಬಿತ್ತಿದ ಗೋವಿನಜೋಳ ಹುಟ್ಟದೆ ಇದ್ದರಿಂದ ಮತ್ತೆ ಹರಗಿ, ಬಿಟಿ ಹತ್ತಿಯ ಮೊರೆ ಹೋಗುವಂತಾಗಿದೆ.

ಕಳೆದ ವರ್ಷ ಮುಂಗಾರು ಮಳೆಯಿಂದ ಹೆಸರು, ಗೋವಿನಜೋಳ ಅಲ್ಪಸ್ವಲ್ಪ ಇಳುವರಿ ತಂದುಕೊಟ್ಟಿತ್ತು. ಆದರೆ ಈ ಬಾರಿ ಆರಂಭದಲ್ಲಿ ಸುರಿದ ಅತಿವೃಷ್ಟಿ ಮಳೆಯಿಂದ ಹಾನಿಗೊಳಗಾಗಿದೆ. ನಂತರದ ದಿನಗಳಲ್ಲಿ ಮಳೆ ಕೊರತೆ ಎದುರಿಸುವಂತಾಗಿದೆ.

ಮೃಗಶಿರ ಮಳೆ ನಂತರ ಮತ್ತೆ ಬೆಳೆಗೆ ಅನುಕೂಲಕರ ಮಳೆಯಾಗಿಲ್ಲ. ಹೀಗೆ ಇನ್ನೊಂದು ವಾರ ಕಳೆದರೆ ಗೋವಿನಜೋಳ ನೀರಿಲ್ಲದೆ ಒಣಗಿ ಹೋಗುತ್ತವೆ. ಹೆಸರು ಇಳುವರಿ ಕುಂಠಿತಗೊಳ್ಳಲಿದೆ ಎಂದು ರೈತರು ತಮ್ಮ ಅಳಲನ್ನು ತೋಡಿಕೊಂಡರು.