ಸಂಭ್ರಮದ ಸಿಡಿ ಮಹೋತ್ಸವ

ಬೇಲೂರು: ಇಲ್ಲಿನ ಗ್ರಾಮ ದೇವತೆ ಅಂತರಘಟ್ಟಮ್ಮ ಅವರ ಸಿಡಿ ಮಹೋತ್ಸವ ಬುಧವಾರ ಸಂಜೆ ಅಪಾರ ಭಕ್ತರ ಸಮ್ಮುಖದಲ್ಲಿ ಅದ್ದೂರಿಯಿಂದ ಜರುಗಿತು.

ಮಂಗಳವಾರದಿಂದ ಅಂತರ ಘಟ್ಟಮ್ಮ ಅವರ ಸಿಡಿ ಉತ್ಸವ ಆರಂಭ ಗೊಂಡಿದ್ದು, ಮಂಗಳವಾರ ಮಧ್ಯಾಹ್ನ ಕೆಂಡೋತ್ಸವ ನಡೆದಿತ್ತು. ಬುಧವಾರ ಸಂಜೆ ತಾಲ್ಲೂಕಿನ ವಿವಿಧೆಡೆಗಳಿಂದ ಆಗಮಿಸಿದ್ದ ಭಕ್ತರು ದೇವಾಲಯದ ಮುಂಭಾಗದಲ್ಲಿನ ಸಿಡಿ ಕಂಬವನ್ನು ಏರುವ ಮೂಲಕ ತಮ್ಮ ಹರಕೆ ತೀರಿಸಿದರು.

ಇದಕ್ಕೂ ಮುನ್ನ ವಿವಿಧ ಗ್ರಾಮಗಳಿಂದ ಆಗಮಿಸಿದ್ದ ಸಿಡಿ ಏರುವ ಭಕ್ತರು ಸಂಪ್ರದಾಯದಂತೆ ಪಟ್ಟಣದ ಶಿವಜ್ಯೋತಿ ಫಣ ಬೀದಿ (ಗಾಣಿಗರ ಬೀದಿ)ಯಲ್ಲಿರುವ ಬೇವಿನ ಮರಕ್ಕೆ ಪೂಜೆ ಸಲ್ಲಿಸಿ ಪ್ರದಕ್ಷಿಣೆ ಹಾಕಿದರು. ಅಂತರಘಟ್ಟಮ್ಮ ಅವರ ಸಿಡಿ ಮಹೋತ್ಸವದ ಹಿನ್ನೆಲೆಯಲ್ಲಿ ದೇವಿಗೆ ಚಿನ್ನಾಭರಣಗಳಿಂದ ಅಲಂಕರಿಸಲಾಗಿತ್ತು.

ಪುರಸಭಾಧ್ಯಕ್ಷ ತೊ.ಚ. ಅನಂತ ಸುಬ್ಬರಾಯ, ಸದಸ್ಯ ಬಿ.ಸಿ.ಮಂಜು ನಾಥ್, ಜಿಲ್ಲಾ ಪಂಚಾಯಿತಿ ಸದಸ್ಯೆ ಎಂ.ವಿ.ಹೇಮಾವತಿ ಉತ್ಸವದ ಸಂಧರ್ಭದಲ್ಲಿ ಹಾಜರಿದ್ದರು.