ಬೇಲೂರು: ರಥದ ಚಕ್ರಕ್ಕೆ ಬೆಂಕಿ

ಬೇಲೂರು (ಹಾಸನ): ಶುಕ್ರವಾರ ಇಲ್ಲಿ ನಡೆದ ಚನ್ನಕೇಶವ ಸ್ವಾಮಿ ದಿವ್ಯರಥೋತ್ಸವದ ವೇಳೆ ಭಕ್ತರು ಹಚ್ಚಿದ ಕರ್ಪೂರ ಹಾಗೂ ಊದುಬತ್ತಿಯಿಂದ ಚಕ್ರದಲ್ಲಿ ಅಲ್ಪ ಪ್ರಮಾಣದಲ್ಲಿ ಬೆಂಕಿ ಕಾಣಿಸಿಕೊಂಡಿತ್ತು.

ಪುರಸಭೆ ಆರೋಗ್ಯಾಧಿಕಾರಿ ಲೋಹಿತ್ ಹಾಗೂ ಪೌರ ಕಾರ್ಮಿಕರು ಬೆಂಕಿಯನ್ನು ನಂದಿಸಿದರು. ನಂತರ ಅಗ್ನಿಶಾಮಕ ದಳದ ಸಿಬ್ಬಂದಿ ಬಂದು ಪರಿಶೀಲಿಸಿ, ಹೆಚ್ಚಿನ ಪ್ರಮಾಣದ ನೀರನ್ನು ಚಕ್ರಕ್ಕೆ ಹಾಕಿದರು.

‘ರಥದ ಚಕ್ರಕ್ಕೆ ಬೆಂಕಿ ಬಿದ್ದಿರುವುದರಿಂದ ಶನಿವಾರ ನಡೆಯುವ ಹೋಮದಲ್ಲಿ ವಿಶೇಷ ಪೂಜೆ ಸಲ್ಲಿಸಲಾಗುವುದು’ ಎಂದು ದೇಗುಲದ ಪ್ರಧಾನ ಅರ್ಚಕ ಶ್ರೀನಿವಾಸ್ ಭಟ್ ತಿಳಿಸಿದರು.