ವಿದ್ಯುತ್ ತಂತಿ ಸರಿಪಡಿಸಲು ರೈತರ ಮನವಿ

ಹಳೇಬೀಡು: ರೈತರು ಓಡಾಡುವ ಬೇಲೂರು ರಸ್ತೆ ಜಮೀನು ಪಕ್ಕದ ಏರಿಯಲ್ಲಿ ವಿದ್ಯುತ್ ಲೈನ್ ಕೆಳಕ್ಕೆ ಜಗ್ಗುತ್ತಿದ್ದು ಅಪಾಯದ ಸ್ಥಿತಿಯಲ್ಲಿದೆ.

ಏರಿ ಮೇಲೆ ವಿದ್ಯುತ್ ತಂತಿ ಕೈಗೆ ಎಟುಕುವಂತಿದೆ. ಗಿಡ ಗಂಟಿಗಳು ತಂತಿಗೆ ತಗುಲುವಂತೆ ಬೆಳೆಯುತ್ತಿವೆ. ಇವು ಸ್ಪರ್ಶಿಸಿದರೆ ಭೂಮಿ ಮೇಲೆ ವಿದ್ಯುತ್ ಹರಿದು ಅಪಾಯ ಸಂಭವಿಸುವ ಸಾಧ್ಯತೆ ಇದೆ ಎಂದು ರೈತರು ಆತಂಕ ವ್ಯಕ್ತಪಡಿಸಿದರು.

 ವಿದ್ಯುತ್ ಪರಿವರ್ತಕಕ್ಕೆ ಬಂದಿರುವ 11 ಕೆವಿ ಸಾಮರ್ಥ್ಯ ಹೊಂದಿದೆ. ಸೆಸ್ಕ್ ಕಂಪೆನಿ ಎಂಜಿನಿಯರ್‌‌ಗಳಿಗೆ ಹಲವು ಬಾರಿ ತಿಳಿಸಿದರೂ ಕೆಲಸ ಪ್ರಯೋಜನವಾಗಿಲ್ಲ. ಕೂಡಲೆ ಸೆಸ್ಕ್ ಅಧಿಕಾರಿಗಳು ಸರಿಪಡಿಸಬೇಕು ಎಂದು ರೈತ ಈಶ್ವರಪ್ಪ ವಿನಂತಿಸಿಕೊಂಡಿದ್ದಾರೆ.

‘ವಿದ್ಯುತ್ ತಂತಿಗಳು ಭೂಮಿಗೆ ಮುಟ್ಟುವ ಸ್ಥಿತಿಗೆ ತಲುಪಿ ವರ್ಷ ಕಳೆದಿದೆ. ತಂತಿಗಳನ್ನು ಬಿಗಿ ಮಾಡದಿದ್ದರೆ ಅಪಾಯ ಸಂಭವಿಸುವ ಸಾಧ್ಯತೆ ಇದೆ. ಈ ಕುರಿತು ಗ್ರಾಮ ಪಂಚಾಯಿತಿ ಅಧಿಕಾರಿಗಳ ಜೊತೆ ಚರ್ಚಿಸುತ್ತೇವೆ. ಅಧ್ಯಕ್ಷರು ಹಾಗೂ ಪಿಡಿಒ ಅವರಿಂದ  ತಂತಿ ಸರಿಪಡಿಸುವ ಕುರಿತು ಸೆಸ್ಕ್ ಕಂಪೆನಿಗೆ ಪತ್ರ ಬರೆಸುತ್ತೇವೆ’ ಎಂದು ಗ್ರಾಮ ಪಂಚಾಯಿತಿ ಸದಸ್ಯ ಸುರೇಶ್.ಎಚ್.ಎಂ ತಿಳಿಸಿದರು.