ಕಲಬುರ್ಗಿ: ಜಿಲ್ಲೆಗೆ ಮತ್ತೆ 480 ರೆಮ್ಡಿಸಿವಿರ್
ಕಲಬುರ್ಗಿ: ಜಿಲ್ಲೆಗೆ ಗುರುವಾರ ರೆಮ್ಡಿಸಿವಿರ್ ಚುಚ್ಚುಮದ್ದಿನ 480 ವೈಲ್ಸ್‌ಗಳ ಪೂರೈಕೆಯಾಗಿದ್ದು, ತಕ್ಷಣಕ್ಕೆ ಕೊರತೆ ನೀಗಿದೆ ಎಂದು ಸಂಸದ ಡಾ.ಉಮೇಶ ಜಾಧವ ತಿಳಿಸಿದ್ದಾರೆ.
‘ರೆಮ್ಡಿಸಿವಿರ್ ಚುಚ್ಚುಮದ್ದು ಎಲ್ಲ ಕೋವಿಡ್‌ ರೋಗಿಗಳಿಗೂ ಅವಶ್ಯವಿಲ್ಲ. ವೈದ್ಯರು ಶಿಫಾರಸು ಮಾಡುವ ರೋಗಿಗಳಿಗೆ ಮಾತ್ರ ನೀಡಬೇಕು ಎಂದು ಸರ್ಕಾರ ಸೂಚಿಸಿದೆ. ವೈದ್ಯನಾಗಿ ನಾನೂ ಇದನ್ನು ಪದೇಪದೇ ಹೇಳುತ್ತಲೇ ಇದ್ದೇನೆ. ಜಿಲ್ಲೆಯ ಸರ್ಕಾರಿ ಆಸ್ಪತ್ರೆಗಳಲ್ಲಿ ಅಗತ್ಯದಷ್ಟು ಪೂರೈಕೆ ಇದ್ದು, ಇದನ್ನು ಉಚಿತವಾಗಿ ಕೊಡಲಾಗುತ್ತಿದೆ. ಸಣ್ಣಪುಟ್ಟ ಲಕ್ಷಣ ಇದ್ದವರು ಈ ಇಂಜಕ್ಷಣ್‌ ತೆಗೆದುಕೊಳ್ಳಬೇಡಿ’ ಎಂದಿದ್ದಾರೆ.
‘ಜಿಲ್ಲೆಯಲ್ಲಿ ಖಾಸಗಿ ಆಸ್ಪತ್ರೆಗಳಲ್ಲಿ 360 ಕೋವಿಡ್‌ ಬೆಡ್‌ಗಳಿವೆ. ಅವುಗಳಿಗೆ ಆಯುಷ್ಮಾನ್‌ ಭಾರತ್‌ ಯೋಜನೆಯಡಿ ಈ ಚುಚ್ಚುಮದ್ದು ಉಚಿತವಾಗಿ ಪೂರೈಸುತ್ತೇವೆ. ಉಳಿದವರಿಗೂ ಆದ್ಯತೆ ಮೇರೆಗೆ ಪೂರೈಸುತ್ತಿದ್ದು, ತಕ್ಷಣಕ್ಕೆ ಇದರ ಕೊರತೆ ನೀಗಿದೆ’ ಎಂದು ಅವರು ಹೇಳಿದ್ದಾರೆ.
ಹೆಚ್ಚುಗಾರಿಕೆ ಇಲ್ಲ:‘ಬುಧವಾರ ನಾನೇ ಬೆಂಗಳೂರಿಗೆ ಹೋಗಿ ರೆಮ್ಡಿಸಿವಿರ್ ಚುಚ್ಚುಮದ್ದು ತಂದಿದ್ದಕ್ಕಾಗಿ ಎಲ್ಲೆಡೆಯಿಂದಲೂ ಮೆಚ್ಚುಗೆ ವ್ಯಕ್ತವಾಗಿದೆ. ಇವುಗಳ ಕೊರತೆಯಮಾಹಿತಿ ತಿಳಿಯುತ್ತಿದ್ದಂತೆ ನಾನೇ ಹೋಗಿ ಅವುಗಳನ್ನು ತಂದಿದ್ದೇನೆ. ಇದರಲ್ಲಿ ಹೆಚ್ಚುಗಾರಿಕೆ ಏನೂ ಇಲ್ಲ. ಜನಪ್ರತಿನಿಧಿ ಅಷ್ಟೇ ಅಲ್ಲ, ನಾನು ವೈದ್ಯನೂ ಹೌದು. ನನ್ನ ಜವಾಬ್ದಾರಿ ನಿಭಾಯಿಸಿದ್ದೇನೆ ಅಷ್ಟೇ’ ಎಂದು ಡಾ.ಉಮೇಶ ಜಾಧವ ಪ್ರತಿಕ್ರಿಯಿಸಿದರು.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.