ಚಿಂಚೋಳಿ: ಜೋಳ ಬೇಸಾಯ ಕ್ಷೇತ್ರ ಕುಸಿತ

ಚಿಂಚೋಳಿ: ರೊಟ್ಟಿ ಪ್ರಿಯರ ಹೊಟ್ಟೆ ತುಂಬಿಸುವ ಜೋಳ ಬೇಸಾಯ ತಾಲ್ಲೂಕಿನಲ್ಲಿ ವರ್ಷದಿಂದ ವರ್ಷಕ್ಕೆ ಕುಸಿಯುತ್ತಿದೆ.

ಒಂದೆಡೆ ಜೋಳದ ಗೂಡು ಮುರಿಯುವ ಕಾರ್ಮಿಕರ ಕೊರತೆಯಿಂದ ರೈತರು ಸಾಧ್ಯವಾದಷ್ಟು ಕಡಿಮೆ ಪ್ರಮಾಣದಲ್ಲಿ ಜೋಳ ಬಿತ್ತನೆಯಲ್ಲಿ ತೊಡಗಿದರೆ, ಜೋಳದ ರಾಶಿಯ ನಂತರ (ಮೇವು) ಕಣಕಿ ತಿನ್ನುವ ಜಾನುವಾರುಗಳ ಸಂಖ್ಯೆಯೂ ಕ್ಷೀಣಿಸುತ್ತಿರುವುದು ಕಳವಳಕಾರಿ.

ಸದ್ಯ ರೈತರ ಹೊಲದಲ್ಲಿ ಜೋಳದ ಬೆಳೆ ಕೊಯ್ಲಿಗೆ ಬಂದಿದೆ. ಎರಡು ವಾರಗಳಲ್ಲಿ ಜೋಳದ ರಾಶಿಯೂ ಮುಗಿಯುವ ಸಾಧ್ಯತೆಯಿದೆ.

ಜೋಳ ಜನರಿಂದಲೇ ರಾಶಿ ಮಾಡಬೇಕು. ಜೋಳದ ದಂಟುಗಳನ್ನು ಕಿತ್ತು ಸೂಡು ಕಟ್ಟಿ ತೆನೆಗಳನ್ನು ಮುರಿದು ಕಣದಲ್ಲಿ ಹಾಕಿ ಹಂತಿ ಕಟ್ಟುವುದು ಸಾಮಾನ್ಯವಾದರೆ, ಈಗ ಆಧುನಿಕತೆಯ ಭರಾಟೆಯಲ್ಲಿ ಹಂತಿಗಳು ಮಾಯವಾಗಿವೆ. ಹಂತಿ ಹೂಡಲು ಎತ್ತುಗಳೇ ಇಲ್ಲದಂತಾಗುತ್ತಿದೆ. ಬಹುತೇಕ ಕೃಷಿ ಈಗ ಟ್ರ್ಯಾಕ್ಟರ್‌ ಅವಲಂಬಿಸುತ್ತಿದೆ.

ಹೆಚ್ಚಿನ ಜನರು ಜೋಳ ಬೇಸಾಯಕ್ಕೆ ನಿರಾಸಕ್ತಿ ತೋರಿಸುತ್ತಿದ್ದಾರೆ. ತಾಲ್ಲೂಕಿನಲ್ಲಿ ಮಾನದಂಡಿ, ಕಾಟಿ, ಕೋಡಮುರಕಿ, ಬಸವಣ್ಣನ ಮಾರಿ, ಅಳ್ಳಿನ ಜೋಳ, ಹೋಳಿ ಜೋಳ ಹೀಗೆ ವಿವಿಧ ಪ್ರಕಾರದ ಜೋಳ ಬೇಸಾಯ ಮಾಡಲಾಗುತ್ತಿದೆ.

ಹೆಚ್ಚಿನ ಪ್ರಮಾಣದಲ್ಲಿ ಮಾನದಂಡಿ ಜೋಳ ಬೇಸಾಯವಿದ್ದು ಉಳಿದ ಜೋಳದಲ್ಲಿ ಕಾಟಿ, ಕೋಡಮುರಕಿ ಹೊರತುಪಡಿಸಿದರೆ ಹೋಳಿಜೋಳ(ಕಡುಬು), ಅಳ್ಳಿನ ಜೋಳ(ನಾಗಪಂಚಮಿ ಅಳ್ಳು ತಯಾರಿಸುವ) ಜೋಳ ಬೇಸಾಯ ಒಂದೆರಡು ಸಾಲು ಮಾತ್ರ ರೈತರು ತಮ್ಮ ಹೊಲಗಳಲ್ಲಿ ಬಿತ್ತನೆ ನಡೆಸುವುದು ರೂಢಿ.

ತಾಲ್ಲೂಕಿನ ಚಂದ್ರಂಪಳ್ಳಿ ನೀರಾವರಿ ಯೋಜನೆ ಅಚ್ಚುಕಟ್ಟು ಪ್ರದೇಶದಲ್ಲಿ ಜೋಳದ ಬೇಸಾಯ ಅಧಿಕ ಪ್ರಮಾಣದಲ್ಲಿ ಕಾಣ ಸಿಗುತ್ತಿತ್ತು ಆದರೆ ಇತ್ತೀಚಿನ ದಿನಗಳಲ್ಲಿ ಜೋಳ ಬೇಸಾಯ ಕ್ಷೇತ್ರ ಕ್ಷೀಣಿಸುತ್ತಿದೆ.

ಹಿಂದಿನ ದಿನಗಳಲ್ಲಿ ರೈತರು ಒಂದು ವರ್ಷ ದ್ವಿದಳ ಧಾನ್ಯ ಮತ್ತೊಂದು ವರ್ಷ ಏಕದಳ ಧಾನ್ಯ ಬೇಸಾಯ ಮಾಡುವ ಮೂಲಕ ಭೂಮಿಯ ಆರೋಗ್ಯ ಕಾಪಾಡುತ್ತಿದ್ದರು. ಆದರೆ ಈಗ ಹೆಚ್ಚಿನ ರೈತರು ತೊಗರಿ ಮಾತ್ರ ಅವಲಂಬಿಸುತ್ತಿರುವುದು ಮಣ್ಣಿನ ಆರೋಗ್ಯದ ಮೇಲೆ ದುಷ್ಪರಿಣಾಮ ಬೀರುತ್ತಿದೆ.