ಕಲಬುರಗಿ | ಕುಂದು–ಕೊರತೆ ನಿವಾರಣಾ ಪ್ರಾಧಿಕಾರ: 133 ಆರೋಪ ಸಾಬೀತು

ಕಲಬುರಗಿ: ಗ್ರಾಮೀಣಾಭಿವೃದ್ಧಿ ಹಾಗೂ ಪಂಚಾಯತ್‌ರಾಜ್ ಇಲಾಖೆಗೆ ಸಂಬಂಧಿಸಿದ ಸಮಸ್ಯೆಗಳ ಪರಿಹಾರದ ಅರೆ ನ್ಯಾಯಿಕ ಸಂಸ್ಥೆಯಾದ ಕುಂದು–ಕೊರತೆ ನಿವಾರಣಾ ಪ್ರಾಧಿಕಾರ ಕಲಬುರಗಿ ವಿಭಾಗಕ್ಕೆ 365 ಅರ್ಜಿಗಳು ಸಲ್ಲಿಕೆಯಾಗಿದ್ದು, 133 ಆರೋಪಗಳು ಸಾಬೀತಾಗಿವೆ. ಆದರೆ, ದಂಡ ವಸೂಲಾತಿ ಮತ್ತು ಶಿಸ್ತು ಕ್ರಮದ ಶಿಫಾರಸುಗಳು ಅನುಷ್ಠಾನಕ್ಕೆ ಬರುತ್ತಿಲ್ಲ.

ಗ್ರಾಮ, ತಾಲ್ಲೂಕು ಮತ್ತು ಜಿಲ್ಲಾ ಪಂಚಾಯಿತಿ ವ್ಯಾಪ್ತಿಯ ನೀರು ಪೂರೈಕೆ, ರಸ್ತೆ, ಆರೋಗ್ಯ, ಬೀದಿ ದೀಪ, ನೈರ್ಮಲ್ಯೀಕರಣ ನಿರ್ವಹಣೆ, ವಿವಿಧ ಯೋಜನೆಗಳಡಿ ಫಲಾನುಭವಿಗಳನ್ನು ಗುರುತಿಸುವಲ್ಲಿ ಮತ್ತು ಹಂಚಿಕೆಯಲ್ಲಿ ಆಗುವ ಅನ್ಯಾಯ, ದಾಖಲೆ ಅಥವಾ ಪ್ರಮಾಣಪತ್ರ ನೀಡುವಲ್ಲಿ ಆಗುವ ತಾರತಮ್ಯಗಳ ಸಂಬಂಧ ಸಾರ್ವಜನಿಕರಿಂದ ಕುಂದು–ಕೊರತೆ ನಿವಾರಣಾ ಪ್ರಾಧಿಕಾರ ದೂರುಗಳನ್ನು ಸ್ವೀಕರಿಸುತ್ತದೆ.

ಏಳು ಜಿಲ್ಲೆಗಳನ್ನು ಒಳಗೊಂಡ ಕಲಬುರಗಿ ವಿಭಾಗದ ಪ್ರಾಧಿಕಾರವು ಜುಲೈ ಅಂತ್ಯದವರೆಗೆ 365 ದೂರುಗಳನ್ನು ಸ್ವೀಕರಿಸಿದೆ. ರಾಯಚೂರು, ಬಳ್ಳಾರಿ ಮತ್ತು ವಿಜಯನಗರ ಜಿಲ್ಲೆಗಳಲ್ಲಿ ಒಂದೂ ಅರ್ಜಿ ಬಂದಿಲ್ಲ. ಕಲಬುರಗಿಯಲ್ಲಿ ಅತ್ಯಧಿಕ 308 ದೂರುಗಳು ಸಲ್ಲಿಕೆಯಾಗಿವೆ. ನಂತರದ ಸ್ಥಾನದಲ್ಲಿ ಯಾದಗಿರಿ 32, ಬೀದರ್ 24 ಹಾಗೂ ಕೊಪ್ಪಳದಲ್ಲಿ ಒಂದು ಅರ್ಜಿ ಸ್ವೀಕೃತವಾಗಿವೆ.

365 ದೂರುಗಳ ಪೈಕಿ 230 ದೂರುಗಳ ಆರೋಪ ಹುಸಿಯಾಗಿವೆ. ಪ್ರಾಧಿಕಾರದ ವಿಚಾರಣೆಯಿಂದ ಸಾಬೀತಾಗಿರುವ 133 ದೂರುಗಳಲ್ಲಿ ಕಲಬುರಗಿಯದ್ದೇ 117 ಪ್ರಕರಣಗಳಿವೆ. ನಾಲ್ಕು ಪ್ರಕರಣಗಳಲ್ಲಿ ₹1 ಲಕ್ಷ ದಂಡ ವಸೂಲಿ ಹಾಗೂ ಗ್ರಾ.ಪಂ. 111 ಹಾಗೂ ತಾ.ಪಂ. 6 ಸೇರಿ 117 ಪ್ರಕರಣಗಳಲ್ಲಿ ಸಂಬಂಧಿಸಿದ ಪಿಡಿಒಗಳು ಹಾಗೂ ಇಒಗಳ ವಿರುದ್ಧ ಶಿಸ್ತು ಕ್ರಮಕ್ಕೆ ಜಿಲ್ಲಾ ಪಂಚಾಯಿತಿ ಸಿಇಒಗಳಿಗೆ ಶಿಫಾರಸು ಮಾಡಲಾಗಿದೆ. ಇದುವರೆಗೂ ಎಷ್ಟು ಪ್ರಕರಣಗಳಲ್ಲಿ ಕ್ರಮ ತೆಗೆದುಕೊಳ್ಳಲಾಗಿದೆ ಎಂಬುದರ ಸ್ಪಷ್ಟ ಮಾಹಿತಿ ಪ್ರಾಧಿಕಾರ ಹಾಗೂ ದೂರುದಾರರಿಗೆ ಸಿಕ್ಕಿಲ್ಲ.

ಸ್ಥಳೀಯ ಸಂಸ್ಥೆಗಳಲ್ಲಿ ಸರ್ಕಾರದ ಅನುದಾನ ಮತ್ತು ಯೋಜನೆಯ ಲಾಭ ಅರ್ಹರಿಗೆ ತಲುಪುತ್ತಿಲ್ಲ. ಸ್ಥಳೀಯ ಅಧಿಕಾರಿಗಳು ಮತ್ತು ಸದಸ್ಯರ ನಿರ್ಲಕ್ಷ್ಯದಿಂದ ಅರ್ಹರಿಗೆ ಸೌಲಭ್ಯ ತಲುಪುವಲ್ಲಿ ದೋಷಗಳಾಗುತ್ತಿವೆ ಎನ್ನುವ ದೂರುಗಳು ಸಾಮಾನ್ಯವಾಗಿವೆ. ಇದಕ್ಕೆ ಕಡಿವಾಣ ಹಾಕಬೇಕು ಮತ್ತು ಪಿಡಿಒಗಳು ಲೋಕಾಯುಕ್ತ ತನಿಖಾ ಸಂಸ್ಥೆಗಳಿಗೆ ಅಲೆಯುವುದನ್ನು ತಪ್ಪಿಸಲು ಈ ಪ್ರಾಧಿಕಾರ ಸ್ಥಾಪಿಸಲಾಗಿದೆ ಎನ್ನುತ್ತಾರೆ ಅಧಿಕಾರಿಗಳು.

ಕುಂದುಕೊರತೆ ನಿವಾರಣಾ ಪ್ರಾಧಿಕಾರಕ್ಕೆ ಸಲ್ಲಿಕೆಯಾದ ದೂರುಗಳು

ಜಿಲ್ಲೆಗಳು; ದೂರು ಸಲ್ಲಿಕೆ; ಸಾಬೀತು; ಸಾಬೀತಾಗದ ದೂರು; ಶಿಸ್ತು ಕ್ರಮಕ್ಕೆ ಶಿಫಾರಸು

ಕಲಬುರಗಿ; 308; 117; 189; 117

ಬೀದರ್; 24; 3; 21; 3

ಯಾದಗಿರಿ; 32; 13; 19

ಕೊಪ್ಪಳ;1; 0; 1; 0;

ಒಟ್ಟು; 365; 133; 230; 133

ರಾಯಚೂರು ಬಳ್ಳಾರಿ ಮತ್ತು ವಿಜಯನಗರದಲ್ಲಿ ಶೂನ್ಯ ದೂರು ದಾಖಲು