ಜಿಲ್ಲೆಯ ವಿವಿಧೆಡೆ ಮಳೆ, ತಂಗಾಳಿಯ ಹಿತ

ಕಲಬುರ್ಗಿ: ಭಾನುವಾರದ ರಜಾ ಮೂಡ್‌ನಲ್ಲಿದ್ದ ನಗರದ ಜನತೆಗೆ ಸಂಜೆ ಸೂಸಿದ ತಂಗಾಳಿ ತಾವು ಮಲೆನಾಡಿನಲ್ಲಿದ್ದೇವೋ ಎಂಬ ಭಾವನೆ ಮೂಡಿಸಿತು. ಅದಾದ ಕೆಲ ಹೊತ್ತಿನಲ್ಲಿಯೇ ಜಿಟಿ ಜಿಟಿ ಹನಿಗಳು ಈ ಮಳೆಗಾಲದ ಮೊದಲ ಮಳೆಯನ್ನು ಹೊತ್ತು ತಂದು ಇಳೆಯನ್ನು ತಂಪಾಗಿಸಿದವು.

ಬೇಸಿಗೆ ಆರಂಭವಾಗಿದ್ದರಿಂದ ಇನ್ನಷ್ಟು ಬಿಸಿಲ ಝಳ ಹೆಚ್ಚಾಗುತ್ತದೆ ಎಂಬ ನಿರೀಕ್ಷೆಯಲ್ಲಿದ್ದ ಕಲಬುರ್ಗಿ ಮಂದಿಗೆ ಪ್ರಕೃತಿಯ ಈ ವೈಚಿತ್ರ್ಯ ಉಲ್ಲಾಸ, ಖುಷಿಯನ್ನು ನೀಡಿತು.

ಅಫಜಲ‍ಪುರ, ಬಳೂರ್ಗಿ, ಆಳಂದ ಪಟ್ಟಣ ಸೇರಿದಂತೆ ಹಲವು ಗ್ರಾಮಗಳಲ್ಲಿ ಸುಮಾರು ಅರ್ಧಗಂಟೆಗೂ ಮಳೆ ಸುರಿಯಿತು. ಅರ್ಧ ಗಂಟೆ ಸುರಿದ ಮಳೆಯಿಂದಾಗಿಅಫಜಲಪುರ ತಾಲ್ಲೂಕಿನಲ್ಲಿ ಜೋಳ, ಗೋಧಿ ಹಾಗೂ ಕಡಲೆ ಬೆಳೆಗೆ ಹಾನಿಯಾಗಿದೆ.