ಮುದ್ದಂಡ ಕಪ್ | ಸಿಂಚನ್ ಹ್ಯಾಟ್ರಿಕ್ ಗೋಲು: ತೀತಿರ ತಂಡಕ್ಕೆ ಗೆಲುವು

ಮಡಿಕೇರಿ: ಇಲ್ಲಿನ ಫೀಲ್ಡ್ ಮಾರ್ಷಲ್ ಕಾರ್ಯಪ್ಪ ಕಾಲೇಜಿನ ಮೈದಾನದಲ್ಲಿ ನಡೆಯುತ್ತಿರುವ ಕೊಡವ ಕೌಟುಂಬಿಕ ಹಾಕಿ ಟೂರ್ನಿ ಮುದ್ದಂಡ ಕಪ್‌ನಲ್ಲಿ ಮಂಗಳವಾರ ನಡೆದ 5'ಎ ಸೈಡ್ ಮಹಿಳಾ ಹಾಕಿ ಟೂರ್ನಿಯಲ್ಲಿ ಸಿಂಚನ್ ಗಳಿಸಿದ ಹ್ಯಾಟ್ರಿಕ್ ಗೋಲಿನ ನೆರವಿನಿಂದ ತೀತಿರ ತಂಡವು 3-0 ಯಿಂದ ಕೂತಂಡ ವಿರುದ್ಧ ಜಯ ಸಾಧಿಸಿತು.

ಶಿವಚಾಳಿಯಂಡ ಮತ್ತು ಪಾಡೆಯಂಡ ನಡುವಿನ ಪಂದ್ಯದಲ್ಲಿ 5-0 ಗೋಲುಗಳ ಅಂತರದಲ್ಲಿ ಶಿವಚಾಳಿಯಂಡ ಭರ್ಜರಿ ಗೆಲುವು ಪಡೆಯಿತು.

ಉಳಿದಂತೆ, ಚೆಯ್ಯಂಡ 4-0 ಯಿಂದ ಪಟ್ಟಡ ವಿರುದ್ಧ, ಆದೇಂಗಡ 2-1ರಿಂದ ಬೊಳ್ಳೇರ ವಿರುದ್ಧ, ಕಂಬೀರಂಡ 2-1ರಿಂದ ಮಚ್ಚಮಾಡ ವಿರುದ್ಧ, ಮುಕ್ಕಾಟಿರ (ದೊಡ್ಡಪುಲಿಕೋಟು) 1-0 ಯಿಂದ ತೀತರಮಾಡ ವಿರುದ್ಧ, ಗುಡ್ಡಂಡ 2-1ರಿಂದ ಮಂಡೇಪಂಡ ವಿರುದ್ಧ, ಪಾಡೆಯಂಡ 1-0ಯಿಂದ ಅಮ್ಮಣಿಚಂಡ ವಿರುದ್ಧ, ಪೊರುಕೊಂಡ 1-0ಯಿಂದ ಬೊಟ್ಟೋಳಂಡ ವಿರುದ್ಧ, ಕಲಿಯಂಡ 2-0ಯಿಂದ ಸಿದ್ದಂಡ ವಿರುದ್ಧ ಗೆಲುವು ಸಾಧಿಸಿದವು.

ನಾಟೋಳಂಡ ಮತ್ತು ಮುದ್ದಂಡ ನಡುವಿನ ಪಂದ್ಯದಲ್ಲಿ ನಿಗದಿತ ಅವಧಿಯಲ್ಲಿ ಉಭಯ ತಂಡಗಳು ಯಾವುದೇ ಗೋಲು ಗಳಿಸಲಿಲ್ಲ. ಟೈ ಬ್ರೇಕರ್‌ನಲ್ಲಿ 2-1 ಅಂತರದಲ್ಲಿ ನಾಟೋಳಂಡ ಜಯ ಸಾಧಿಸಿತು.

ಸಣ್ಣುವಂಡ ಮತ್ತು ಕೋಡಿಮಣಿಯಂಡ ನಡುವಿನ ಪಂದ್ಯವೂ ಇದೇ ಬಗೆಯಲ್ಲಿ ರೋಚಕ ತಿರುವು ಪಡೆಯಿತು. ನಿಗದಿತ ಅವಧಿಯಲ್ಲಿ ಉಭಯ ತಂಡಗಳು ತಲಾ 1 ಗೋಲು ಗಳಿಸಿ ಸಮಬಲ ಸಾಧಿಸಿದವು. ಟೈ ಬ್ರೇಕರ್‌ನಲ್ಲಿ 1-0 ಅಂತರದಲ್ಲಿ ಸಣ್ಣವಂಡ ತಂಡ ಜಯ ಸಾಧಿಸಿತು.

ಇನ್ನು ಸಡನ್ ಡೆತ್‌ನಲ್ಲಿ ಮುಕ್ಕಾಟಿರ (ದೊಡ್ಡಪುಲಿಕೋಟು) 1-0ಯಿಂದ ಪರದಂಡ ವಿರುದ್ಧ, ಸಣ್ಣುವಂಡ 1-0ಯಿಂದ ಗುಡ್ಡಂಡ ವಿರುದ್ಧ ಗೆಲುವು ಪಡೆದವು. ಮುಕ್ಕಾಟಿರ ಪರ ಸ್ಮಿತಾ ಸುಬ್ಬಯ್ಯ ಹಾಗೂ ಸಣ್ಣುವಂಡ ಪರ ಇಶಿತಾ ನಿರ್ಣಾಯಕ ಗೋಲು ಗಳಿಸಿ, ತಮ್ಮ ತಮ್ಮ ತಂಡಗಳಿಗೆ ಗೆಲುವು ತಂದು ಕೊಟ್ಟರು.