ಆತಿಥೇಯ ಚೆಕ್ಕೇರ ಮಹಿಳಾ ತಂಡಕ್ಕೆ ಗೆಲುವು

ಗೋಣಿಕೊಪ್ಪಲು: ಹುದಿಕೇರಿ ಜನತಾ ಪ್ರೌಢಶಾಲೆ ಮೈದಾನದಲ್ಲಿ ನಡೆಯುತ್ತಿರುವ ಚೆಕ್ಕೇರ ಕಪ್ ಕೊಡವ ಕೌಟುಂಬಿಕ ಕ್ರಿಕೆಟ್ ಟೂರ್ನಿಯ ಶುಕ್ರವಾರದ ಪಂದ್ಯದ ಮಹಿಳಾ ವಿಭಾಗದಲ್ಲಿ ಆತಿಥೇಯ ಚೆಕ್ಕೇರ ತಂಡ ಮಚ್ಚಮಾಡ ತಂಡವನ್ನು 9 ವಿಕೆಟ್‌‌‌ಗಳಿಂದ ಸೋಲಿಸಿ ಮುಂದಿನ ಸುತ್ತಿಗೆ ಪ್ರವೇಶಿಸಿತು.

ಮೊದಲು ಬ್ಯಾಟಿಂಗ್ ನಡೆಸಿದ ಮಚ್ಚಮಾಡ ತಂಡ ನಿಗದಿತ 6 ಓವರ್‌‌‌ಗಳಲ್ಲಿ 2 ವಿಕೆಟ್ ಕಳೆದುಕೊಂಡು 34ರನ್ ಗಳಿಸಿತು. ಸುಲಭ ಗುರಿ ಬೆನ್ನತ್ತಿದ ಚೆಕ್ಕೇರ ತಂಡ ಕೇವಲ 3.2 ಓವರ್‌‌‌ನಲ್ಲಿ 1 ವಿಕೆಟ್ ಕಳೆದುಕೊಂಡು ಗೆಲುವಿನ ನಗೆ ಬೀರಿತು.

ಮಾಚಿಮಂಡ ತಂಡ ಮೊಣ್ಣಂಡ ತಂಡವನ್ನು 40 ರನ್ ಗಳಿಂದ ಸೋಲಿಸಿತು. ಮಹಿಳಾ ವಿಭಾಗದಲ್ಲಿ ಮಾಳೇಟೀರ (ಕೆದಮಳ್ಳೂರು) ತಂಡ ಚಿಮ್ಮಣಮಾಡ ತಂಡದ ವಿರುದ್ಧ 76 ರನ್ ಗಳ ಭಾರಿ ಅಂತರದಿಂದ ಜಯಗಳಿಸಿತು.

ಪುರುಷರ ವಿಭಾಗ: ಪುರುಷರ ವಿಭಾಗದಲ್ಲಿ ಮಚ್ಚಮಾಡ ತಂಡ ಚೀಕಂಡ ತಂಡವನ್ನು 19 ರನ್‌‌‌ಗಳಿಂದ ಸೋಲಿಸಿತು. ಬೊಳಂದಂಡ ತಂಡ 6 ವಿಕೆಟ್‌‌‌ಗಳಿಂದ ಇಟ್ಟೀರ ತಂಡದ ವಿರುದ್ಧ ಜಯಗಳಿಸಿತು.

ಕಾಳಿಮಾಡ ತಂಡ ಕಾಟಿಮಾಡ ತಂಡವನ್ನು 8 ವಿಕೆಟ್‌‌‌ಗಳಿಂದ, ನೆರವಂಡ ತಂಡ ಮಾಚಿಮಂಡ ತಂಡವನ್ನು 9 ವಿಕೆಟ್‌‌‌ಗಳಿಂದ ಮಲ್ಲೇಂಗಡ ತಂಡ ಕುಟ್ಟಂಡ ತಂಡವನ್ನು 15ರನ್‌‌‌‌‌ಗಳಿಂದ, ಕರಿನೆರವಂಡ ತಂಡ ಕರ್ತಮಾಡ ತಂಡವನ್ನು 9 ವಿಕೆಟ್‌‌‌ಗಳಿಂದ ಸೋಲಿಸಿ ಮುಂದಿನ ಸುತ್ತಿಗೆ ಪ್ರವೇಶ ಪಡೆದವು.