ಬಂಗಾರಪೇಟೆ | ಬೆಲೆ ಕುಸಿತ: ಎಲೆಕೋಸು ನಾಶಪಡಿಸಿದ ರೈತ

ಬಂಗಾರಪೇಟೆ: ಬೆಲೆ ಕುಸಿತದ ಸಂಕಷ್ಟಕ್ಕೆ ಸಿಲುಕಿದ ತಾಲ್ಲೂಕಿನ ಎಲೆಕೋಸು (ಕ್ಯಾಬೇಜ್‌) ಬೆಳೆಗಾರರು ತಮ್ಮ ಕೈಯಿಂದ ಬೆಳೆದ ಬೆಳೆಯನ್ನು ತಾವೇ ನಾಶ ಮಾಡಿ ಆಕ್ರೋಶ ಹಾಗೂ ಅಸಹಾಯಕತೆಯನ್ನು ಹೊರಹಾಕಿದ್ದಾರೆ.

ಗುಲ್ಲಹಳ್ಳಿ, ಚಿಕ್ಕಅಂಕಂಡಹಳ್ಳಿ, ಮಿಟ್ಟಹಳ್ಳಿ, ಅನಿಗಾನಹಳ್ಳಿ ಸೇರಿದಂತೆ ತಾಲ್ಲೂಕಿನ ಅನೇಕ ಗ್ರಾಮಗಳ ರೈತರು ಹೆಚ್ಚು ರೈತರು, ಕಡಿಮೆ ಅವಧಿಯಲ್ಲಿ ಹೆಚ್ಚಿನ ಆದಾಯ ಕಾಣಬಹುದು ಎಂದು ಅಲ್ಪಾವಧಿಯ ಎಲೆಕೋಸು ಬೆಳೆದಿದ್ದರು. ಆದರೆ ಮಾರುಕಟ್ಟೆಯಲ್ಲಿ ಎಲೆಕೋಸು ಬೆಲೆ ದಿಢೀರ್‌ ಕುಸಿತ ಕಂಡಿದ್ದರಿಂದ ಬಹುತೇಕ ರೈತರು ಬೆಳೆಯನ್ನು ನಾಶಮಾಡಿ, ಗದ್ದೆಯನ್ನು ಖಾಲಿ ಮಾಡಿಕೊಂಡಿದ್ದಾರೆ. ಇನ್ನೂ ಕೆಲವರು ಕಟಾವಿನ ವೆಚ್ಛ ಭರಿಸಲೂ ಹಣವಿಲ್ಲದೇ ಬೆಳೆಯನ್ನು ಗದ್ದೆಯಲ್ಲಿಯೇ ಒಣಗಲು ಬಿಟ್ಟಿದ್ದಾರೆ. ಪಾಲಿಗೆ ಬಂದಿದ್ದೇ ಪಂಚಾಮೃತ ಎಂದು ಕೆಲವು ರೈತರು, ಕಡಿಮೆ ಬೆಲೆಗೆ ಕೋಸು ಮಾರಾಟ ಮಾಡಿ ಕೈತೊಳೆದುಕೊಳ್ಳುತ್ತಿದ್ದಾರೆ. 

ಸಗಟು ಮಾರುಕಟ್ಟೆಯಲ್ಲಿ ಪ್ರತಿ ಕೆಜಿ ಎಲೆಕೋಸು ಬೆಲೆ ₹1ಗೆ ಇಳಿದಿದೆ. ರೈತರು ಬೆಳೆಯನ್ನು ಕಟಾವು ಮಾಡಿ, ಮಾರುಕಟ್ಟೆಗೆ ಸಾಗಿಸಿದರೆ ತಗುಲುವ ವೆಚ್ಛವೂ ಮರಳಿ ಬರುವುದಿಲ್ಲ. ಹೀಗಾಗಿ, ಬೆಳೆ ಕಟಾವು ಮಾಡುವ ಬದಲು ಇಡೀ ಹೊಲವನ್ನು ಟಿಲ್ಲರ್‌ ಬಳಸಿ ಗೊಬ್ಬರವಾಗಿ ಪರಿವರ್ತಿಸುತ್ತಿದ್ದಾರೆ. ಇನ್ನೂ ಕೆಲವರು ಖರ್ಚು ವೆಚ್ಛ  ಮೈಮೇಲೆ ಬಂದರೂ, ಹೊಲ ಖಾಲಿ ಮಾಡುವುದಕ್ಕಾಗಿ ಎಲೆಕೋಸು ಕಟಾವು ಮಾಡುತ್ತಿದ್ದಾರೆ. ಕೆಲವರು ಹೊಲದಲ್ಲಿಯೇ ಒಣಗಲು ಬಿಟ್ಟಿದ್ದಾರೆ. ಕೆಲವು ಕಡೆ ಎಲೆಕೋಸು ಬೆಳೆದ ಹೊಲದಲ್ಲಿ ಆಡು, ಕುರಿ, ಜಾನುವಾರು ಮೇಯುತ್ತಿವೆ.

ಮಳೆಯ ಕಣ್ಣುಮುಚ್ಚಾಲೆಯಲ್ಲಿ ಬೆಳೆಗಳು ಮೊದಲೇ ನಿತ್ರಾಣಗೊಂಡಿದ್ದವು. ವಿದ್ಯುತ್ ಕೊರತೆಯ ನಡುವೆಯೂ ಹಗಲು ರಾತ್ರಿಯೆನ್ನದೇ ಬೆಳೆಗೆ ನೀರುಣಿಸಿದ ರೈತರು ಹೇಗೊ ಬೆಳೆ ಉಳಿಸಿಕೊಂಡಿದ್ದರು. ಬೆಳೆ ಒಣಗದಂತೆ, ಆರೋಗ್ಯಕರ ಗೆಡ್ಡೆ ಕಟ್ಟುವಂತೆ ಮಾಡಲು ಸಾಕಷ್ಟು ಶ್ರಮ ವಹಿಸಿದ್ದರು. ಆದರೆ, ಬೆಲೆ ಕುಸಿತದಿಂದ ರೈತರು ಕೈಗೊಂಡ ಶ್ರಮ ನೀರಿನಲ್ಲಿ ಹೋಮ ಮಾಡಿದಂತಾಗಿದೆ ಎಂದು ಗುಲ್ಲಹಳ್ಳಿ ಗ್ರಾಮದ ರೈತ ಕೊಂಡಪ್ಪ ನಾಯಕ ಸಂಕಷ್ಟ ತೋಡಿಕೊಂಡರು.

ರೈತರು ಎಕರೆಗಟ್ಟಲೆ ಗದ್ದೆಯಲ್ಲಿ ಕ್ಯಾಬೇಜ್‌ ಬೆಳೆದಿದ್ದರು. ಇದರಿಂದ ಅಪಾರ ನಷ್ಟ ಅನುಭವಿಸುತ್ತಿದ್ದಾರೆ. ರೈತರ ಹಿತಾಸಕ್ತಿಗಳನ್ನು ಕಾಪಾಡಲು, ರಾಜ್ಯದಲ್ಲಿಯೂ ಕೇರಳದ ರೀತಿಯಲ್ಲಿ ಕೃಷಿ ನೀತಿಗಳನ್ನು ಅಳವಡಿಸಬೇಕು ಎಂದು ಚಿಕ್ಕಅಂಕಂಡಹಳ್ಳಿ ಗ್ರಾಮದ ರೈತ ಗಿರೀಶ್ ಗೌಡ ಒತ್ತಾಯಿಸಿದರು.

ಸಗಟು ಮಾರುಕಟ್ಟೆಯಲ್ಲಿ ಕ್ಯಾಬೇಜ್‌ ಬೆಲೆ ತೀವ್ರವಾಗಿ ಕುಸಿತ ಕಂಡಿದೆ. ಅನೇಕ ರೈತರು ಎಲೆಕೋಸುಗಳನ್ನು ಸಗಟು ಮಾರುಕಟ್ಟೆಗಳಲ್ಲಿ ಮಾರಾಟ ಮಾಡುವ ಬದಲು ತಮ್ಮ ಜಾನುವಾರುಗಳಿಗೆ ಆಹಾರವಾಗಿ ನೀಡುತ್ತಿದ್ದಾರೆ ಎಂದು ರೈತ ಚಂದ್ರಪ್ಪ ಹೇಳಿಕೊಂಡರು.

ಎಲೆಕೋಸು ಬೆಳೆಯುವುದು ಸುಲಭ ಸಾಧ್ಯವಾಗಿಲ್ಲ. ಕೀಟ ಹಾಗೂ ರೋಗಬಾಧೆ ಬೇಗ ತಗುಲುತ್ತದೆ. ಜಮೀನಿನಲ್ಲಿ ಸಸಿಗಳನ್ನು ನಾಟಿ ಮಾಡಿದಾಗಿನಿಂದ, ಬೆಳೆ ಕಟಾವಿಗೆ ಬರುವುದರೊಳಗೆ ವಾರಕ್ಕೊಮ್ಮೆ ಔಷಧ ಸಿಂಪಡಣೆ ಮಾಡಬೇಕು. ಕಡಿಮೆ ಬೆಲೆಯ ಔಷಧಿಯಿಂದ ಕೀಟ ಹಾಗೂ ರೋಗ ಹತೋಟಿಗೆ ಬರುವುದಿಲ್ಲ. ಇಷ್ಟೆಲ್ಲಾ ಖರ್ಚು ಮಾಡಿ ಬೆಳೆದ ಬೆಳೆ ಹೀಗೆ ಬೆಲೆ ಕುಸಿತ ಕಂಡರೆ ರೈತರ ಗತಿ ಏನು? ಯಾರಲ್ಲಿ ಪರಿಹಾರ ಕೇಳುವುದು ಎಂದು ಅನಿಗಾನಹಳ್ಳಿ ಗೋವಿಂದ ಗೌಡ ಅವಲತ್ತುಕೊಂಡರು.