ಮಾಲೂರು | ಕೊಳಚೆ ನೀರಲ್ಲಿ ವ್ಯಾಪಾರ ವಹಿವಾಟು: ಸಂತೆ ಮೈದಾನದಲ್ಲಿ ಸೌಕರ್ಯ ಮರೀಚಿಕೆ

ಮಾಲೂರು: ಎಲ್ಲಿ ನೋಡಿದರೂ ಕಸ. ಕುಡಿವ ನೀರಿಲ್ಲ. ಶೌಚಕ್ಕೆ ಶೌಚಾಲಯವಿಲ್ಲ. ಕಾಲಿಟ್ಟರೆ ಕೆಸರು...

ಇದು ಪಟ್ಟಣದ ಹನುಮಂತ ನಗರದಲ್ಲಿನ ಮಾಲೂರು-ಕೋಲಾರ ರಸ್ತೆಯ ಬಳಿ ಇರುವ ಸಂತೆ ಮೈದಾನದ ದುಸ್ಥಿತಿ.

ಒಂದೂವರೆ ಎಕರೆ ವಿಸ್ತೀರ್ಣದಲ್ಲಿರುವ ಸಂತೆ ಮೈದಾನದಲ್ಲಿ ನೂರಾರು ವರ್ಷಗಳಿಂದ ಲಕ್ಷಾಂತರ ರೂಪಾಯಿ ವ್ಯಾಪಾರ ವಹಿವಾಟು ನಡೆಸುತ್ತಿದೆ. ಆದರೆ ಮೂಲ ಸೌಕರ್ಯ ಮಾತ್ರ ಮರೀಚಿಕೆಯಾಗಿದೆ. ಇದರಿಂದ ರೈತರು, ವರ್ತಕರು ಹಾಗೂ ಗ್ರಾಹಕರು ತೊಂದರೆ ಅನುಭವಿಸುವಂತಾಗಿದೆ.

ಸಂತೆ ಮೈದಾನ ಅಭಿವೃದ್ಧಿಪಡಿಸುತ್ತೇವೆಂಬ ಜನಪ್ರತಿನಿಧಿಗಳ ಭರವಸೆ ಭರವಸೆಗಳಾಗಿಯೇ ಉಳಿದಿದೆ. ಆದರೆ ದುರಸ್ತಿಯಾಗಿಲ್ಲ. ಮಧ್ಯವರ್ತಿಗಳ ಹಾವಳಿ ಇಲ್ಲದೆ ತಾಜಾ ತರಕಾರಿ, ಸೊಪ್ಪು ಮುಂಜಾನೆ 4 ರಿಂದ ಬೆಳಗ್ಗೆ 8ರವರೆಗೆ ವ್ಯಾಪಾರ ವಹಿವಾಟು ನಡೆಯುತ್ತದೆ. ಆದರೆ ಶೌಚಾಲಯವಿಲ್ಲ. ಸಂತೆ ಮೈದಾನ ಮಳೆ ಬಂದರೆ ಕಾಲಿಡಲು ಅಗದಂತೆ ಕೆಸರಾಗುತ್ತದೆ. ವರ್ತಕರು ಆ ಕೆಸರಲ್ಲೇ ವ್ಯಾಪಾರ ನಡೆಸಬೇಕಾದ ಅನಿವಾರ್ಯತೆ. ಸಂತೆಯಲ್ಲಿ 50 ತಿಂದ 70ಕ್ಕೂ ಅಧಿಕ ಅಂಗಡಿಗಳಿವೆ. ಇಲ್ಲಿ ಮಹಿಳಾ ವರ್ತಕರು ವ್ಯಾಪಾರ ನಡೆಸುತ್ತಿದ್ದು, ಶೌಚಕ್ಕೆ ಪರದಾಡುತ್ತಾರೆ. ನಗರಸಭೆಯಿಂದ ಕರ ವಸೂಲಿ ಮಾಡುತ್ತಾರೆ. ಆದರೆ, ಮೂಲ ಸೌಕರ್ಯ ಕಲ್ಪಿಸಿಲ್ಲ ಎಂಬುದು ವರ್ತಕರ ಆರೋಪ.

ಸಂತೆಯಲ್ಲಿ ಸ್ವಚ್ಛತೆ ಇಲ್ಲದೆ ಕೊಳಚೆ ನೀರು ಹರಿಯುವುದರಿಂದ ಮಾಲೂರು-ಕೋಲಾರ ಮುಖ್ಯ ರಸ್ತೆ ಬದಿಯಲ್ಲಿ ವರ್ತಕರು ತರಕಾರಿ, ಸೊಪ್ಪನ್ನು ಮಾರಾಟ ಮಾಡುತ್ತಾರೆ. ಗ್ರಾಹಕರು ಖರೀದಿಗೆ ನಿಂತಾಗ ರಸ್ತೆಯಲ್ಲಿ ವಾಹನ ಓಡಾಟಕ್ಕೆ ತೊಂದರೆಯಾಗಿ ವಾಹನ ದಟ್ಟಣೆ ಉಂಟಾಗುತ್ತದೆ. ಹಾಗಾಗಿ ಸಂತೆ ಮೈದಾನ ಸ್ವಚ್ಛಗೊಳಿಸಿ, ಸೌಕರ್ಯ ಕಲ್ಪಿಸಿದರೆ ಅನುಕೂಲವಾಗುತ್ತದೆ ಎಂಬುದು ವರ್ತಕರ ಮಾತಾಗಿದೆ.