ನೀರಿನ ಟ್ಯಾಂಕರ್ ದರಪಟ್ಟಿ ಕೋರಿ ಮನವಿ

ಮುಳಬಾಗಿಲು: ಬೇಸಿಗೆ ಪ್ರಯುಕ್ತ ನಗರಸಭೆ ಮತ್ತು ಗ್ರಾಮ ಪಂಚಾಯಿತಿ ವ್ಯಾಪ್ತಿಗಳಲ್ಲಿ ಅವಶ್ಯಕತೆ ಬಂದರೆ ನೀರು ಸರಬರಾಜು ಮಾಡಲು ಆಸಕ್ತರಿಂದ ದರಪಟ್ಟಿ ಆಹ್ವಾನಿಸಲಾಗಿದೆ ಎಂದು ತಹಶೀಲ್ದಾರ್ ಕೆ.ಎನ್. ರಾಜಶೇಖರ್ ತಿಳಿಸಿದ್ದಾರೆ.

ಕುಡಿಯುವ ನೀರಿನ ಮೂಲದಿಂದ 5 ಕಿ.ಮೀ ವ್ಯಾಪ್ತಿಯಲ್ಲಿನ ಪ್ರದೇಶಗಳಿಗೆ 5000 ಲೀಟರ್ ಟ್ಯಾಂಕರ್‌ಗೆ ಪ್ರತಿ ಟ್ರಿಪ್‌ಗೆ ₹ 550 ಹಾಗೂ ಕುಡಿಯುವ ನೀರಿನ ಮೂಲದಿಂದ 5000 ಲೀಟರ್ ಸಾಮರ್ಥ್ಯದ ಪ್ರತಿ ಟ್ರಿಪ್‌ಗೆ ₹ 600 ಬೆಲೆ ನಿಗದಿಪಡಿಸಿ ದರಪಟ್ಟಿ ಆಹ್ವಾನಿಸಲಾಗಿದೆ. ತಹಶೀಲ್ದಾರ್ ಕಚೇರಿಯಲ್ಲಿ ಆಸಕ್ತರು ದರಪಟ್ಟಿ ಸಲ್ಲಿಸಬಹುದಾಗಿದೆ.

5000 ಲೀಟರ್ ಸಾಮರ್ಥ್ಯವುಳ್ಳ ಹಾಗೂ ಕಡ್ಡಾಯವಾಗಿ ಜಿಪಿಎಸ್ ಹೊಂದಿದ ಟ್ಯಾಂಕರ್‌ ಜೋಡಿಸಿರುವ ಟ್ಯಾಂಕರ್‌ಗಳಿಂದ ಕುಡಿಯುವ ನೀರು ಸರಬರಾಜು ಮಾಡಬೇಕು. ಶುದ್ಧ ಕುಡಿಯುವ ನೀರನ್ನು ಮಾತ್ರ ಸರಬರಾಜು ಮಾಡಬೇಕು. ಸರಬರಾಜು ಮಾಡುವ ಕುಡಿಯುವ ನೀರು ಯೋಗ್ಯವಾಗಿದೆಯೇ ಎಂಬುದರ ಬಗ್ಗೆ ದೃಢೀಕರಣ ಪತ್ರ ಸಲ್ಲಿಸಬೇಕು. ತಾಲ್ಲೂಕು ಟಾಸ್ಕ್‌ಪೋರ್ಸ್‌ ಸಮಿತಿಯವರು ಕಾಲಕಾಲಕ್ಕೆ ವಿಧಿಸುವ ಷರತ್ತುಗಳಿಗೆ ಮತ್ತು ನಿಬಂಧನೆಗಳಿಗೆ ಬದ್ಧವಾಗಿರಬೇಕು. ಈ ಕುರಿತು ಮುಚ್ಚಳಿಕೆ ಪತ್ರ ಬರೆದುಕೊಡಬೇಕು ಎಂದು ತಿಳಿಸಿದ್ದಾರೆ.