ಸಮಾಜಮುಖಿ ಕಾರ್ಯಕ್ಕೆ ಬೆನ್ನೆಲುಬಾಗಿರಿ: ಮಾಜಿ ಶಾಸಕ ಅಮರೇಗೌಡ ಬಯ್ಯಾಪುರ ಸಲಹೆ

ಕುಷ್ಟಗಿ: ‘ಸಾಮೂಹಿಕ ಮದುವೆ ಸೇರಿದಂತೆ ಸಮಾಜಮುಖಿಯಾಗಿರುವ ಯಾವುದೇ ಕೆಲಸ ಕಾರ್ಯಗಳಿಗೆ ಸಾರ್ವಜನಿಕರು ಬೆನ್ನೆಲುಬಾಗಿ ನಿಲ್ಲುವ ಅಗತ್ಯವಿದೆ’ ಎಂದು ಮಾಜಿ ಶಾಸಕ ಅಮರೇಗೌಡ ಬಯ್ಯಾಪುರ ಹೇಳಿದರು.

ಪಟ್ಟಣದಲ್ಲಿ ಭಗತ್‌ಸಿಂಗ್‌ ಸಂಸ್ಥೆ ವತಿಯಿಂದ ಏರ್ಪಡಿಸಲಾಗಿದ್ದ ಸರ್ವಧರ್ಮಗಳ ಉಚಿತ ಸಾಮೂಹಿಕ ವಿವಾಹ ಕಾರ್ಯಕ್ರಮವನ್ನು ಉದ್ಘಾಟಿಸಿ ಅವರು ಮಾತನಾಡಿದರು.

‘ಅನೇಕ ವರ್ಷಗಳಿಂದಲೂ ವಜೀರ್ ಅಲಿ ಗೋನಾಳ ಅವರು ಸಾಮೂಹಿಕ ಮದುವೆ ನೆರವೇರಿಸುವ ಮೂಲಕ ಬಡವರು, ದೀನ ದಲಿತರು ಸೇರಿದಂತೆ ವಿವಿಧ ಸಮುದಾಯಗಳ ಕುಟುಂಬಗಳಿಗೆ ನೆರವಾಗುವ ಮೂಲಕ ಮಾದರಿಯಾಗಿದ್ದಾರೆ’ ಎಂದರು.

‘ಕುಟುಂಬ ವ್ಯವಸ್ಥೆಯನ್ನು ನಿರ್ವಹಿಸಬೇಕಿರುವ ಮಹಿಳೆಯರಲ್ಲಿ ಆಗಾಧ ಶಕ್ತಿ ಇರುತ್ತದೆ, ಪುರುಷರಿಗೆ, ಮಹಿಳೆಯರಿಗೆ ಇರುವ ಸಮಾನ ಅವಕಾಶಗಳನ್ನು ಸಮರ್ಪಕವಾಗಿ ನಿಭಾಯಿಸಿ, ಕಷ್ಟ–ನಷ್ಟಗಳನ್ನು ಸಮಾನವಾಗಿ ಸ್ವೀಕರಿಸಿ, ಅರ್ಥಪೂರ್ಣ ಮತ್ತು ಗೌರವಯುತ ಬಾಳನ್ನು ತಮ್ಮದಾಗಿಸಿಕೊಳ್ಳಬೇಕು’ ಎಂದು ನವದಂಪತಿಗೆ ಸಲಹೆ ನೀಡಿದರು.

ಕುಕನೂರಿನ ಮಹಾದೇವ ಸ್ವಾಮೀಜಿ ಮಾತನಾಡಿ, ‘ಹಸಿದವರು, ಅಸಹಾಯಕರು, ನೊಂದವರಿಗೆ ಆಸರೆಯಾಗುವುದೇ ನಿಜವಾದ ಬದುಕು. ವಜೀರ್ ಅಲಿ ಅವರು ನಡೆಸುತ್ತ ಬಂದಿರುವ ಎಲ್ಲ ಧರ್ಮಗಳ ಸಾಮೂಹಿಕ ವಿವಾಹ ಬಸವತತ್ವದ ತಳಹದಿಯನ್ನು ನೆನಪಿಸುವಂತಿದೆ’ ಎಂದರು.

ಮದ್ದಾನಿ ಹಿರೇಮಠದ ಕರಿಬಸವ ಸ್ವಾಮೀಜಿ ಮಾತನಾಡಿ, ‘ಶ್ರೀಮಂತರಾಗುವುದು ಹಣ, ಆಸ್ತಿ ಅಂತಸ್ತಿನಿಂದಲ್ಲ, ಬದಲಾಗಿ ಬಡವರಿಗೆ ನೆರವಾಗುವವರೇ ನಿಜವಾದ ಹೃದಯ ಶ್ರೀಮಂತರು. ಇಂಥ ಸಾಮೂಹಿಕ ಮದುವೆಗಳು ಬಡವರ ಆರ್ಥಿಕ ಭಾರ ಇಳಿಸುತ್ತವೆ’ ಎಂದರು.

ಶಾಸಕ ದೊಡ್ಡನಗೌಡ ಪಾಟೀಲ ಮಾತನಾಡಿ,‘ ಮನೆಯಲ್ಲಿ ಮದುವೆ ನಡೆದರೆ ಕೇವಲ ಕುಟುಂಬದವರು ಮಾತ್ರ ಆಗಮಿಸುತ್ತಾರೆ, ಆದರೆ ಇಂತಹ ಮುದುವೆಯಲ್ಲಿ ಎಲ್ಲ ಧರ್ಮಗಳನ್ನು ಒಳಗೊಂಡ ಸಾಮರಸ್ಯದ ಸಂದೇಶವಿದೆ. ಎಲ್ಲ ಸ್ವಾಮೀಜಿಗಳು, ಗಣ್ಯರಿಂದ ಹರಸಿಕೊಳ್ಳುವ ಅವಕಾಶ ದಂಪತಿಗಳಿಗೆ ಸಿಗುತ್ತದೆ’ ಎಂದರು.

ಸಾಮೂಹಿಕ ಮದುವೆ ನೇತೃತ್ವ ವಹಿಸಿದ್ದ ವಜೀರ್ ಅಲಿ ಗೋನಾಳ ಮಾತನಾಡಿ, ‘ಜನರು, ಪ್ರತಿನಿಧಿಗಳು ತಮಗೆ ಬೆನ್ನೆಲುಬಾಗಿರುವವರೆಗೂ ಉಚಿತ ಸಾಮೂಹಿಕ ಮದುವೆ ಕಾರ್ಯಕ್ರಮ ಮುಂದುವರೆಯಲಿದೆ’ ಎಂದರು.

ತಾಲ್ಲೂಕು ಹಾಲುಮತ ಸಮಾಜದ ಅಧ್ಯಕ್ಷ ಮಲ್ಲಣ್ಣ ಪಲ್ಲೇದ ಮಾತನಾಡಿದರು. ಶಿವಲಿಂಗ ಸ್ವಾಮೀಜಿ, ಸಯ್ಯದ್ ಷಾ ಅಬ್ದುಲ್‌ ಖಾದ್ರಿ, ಫಕೀರೇಶ್ವರ ಸ್ವಾಮೀಜಿ, ಚಂದ್ರಶೇಖರ ದೇವರು, ಗುರುಶಾಂತವೀರ ಸ್ವಾಮೀಜಿ ಸಾನಿಧ್ಯ ವಹಿಸಿದ್ದರು.

ಬಸವರಾಜ ಹಳ್ಳೂರು, ಪ್ರಭಾಕರ ಚಿಣಿ, ಮಾಲತಿ ನಾಯಕ, ಸುಬ್ರಹ್ಮಣ್ಯ ರೆಡ್ಡಿ, ಕೆ.ವೈ.ಅವಧೂತ, ಉಮೇಶ ಮಂಗಳೂರು, ಜಯತೀರ್ಥ ದೇಸಾಯಿ, ಫಕೀರಪ್ಪ ಹೊಸವಕ್ಕಲ, ಶರಣಪ್ಪ ಹಂಪನಾಳ, ಜೀವನಸಾಬ್ ವಾಲೀಕಾರ, ನಟರಾಜ ಸೋನಾರ ಇದ್ದರು.