ಗಂಗಾವತಿ: ಎಡದಂಡೆ ಕಾಲುವೆಯಲ್ಲಿ ಈಜಲು ಹೋಗಿದ್ದ ಯುವಕ ನಾಪತ್ತೆ

ಗಂಗಾವತಿ: ತಾಲ್ಲೂಕಿ‌ನ ದಾಸನಾಳ ಗ್ರಾಮದ ಬಳಿಯ ತುಂಗಭದ್ರಾ ಎಡದಂಡೆ ಕಾಲುವೆಯಲ್ಲಿ ಈಜಲು ಹೋಗಿ ಯುವಕ ಕೊಚ್ಚಿಕೊಂಡು ಹೋದ ಘಟನೆ ಶನಿವಾರ ನಡೆದಿದೆ.

ಕೊಪ್ಪಳದ ಮಂಜು‌ನಾಥ (34) ನಾಪತ್ತೆಯಾದ ಯುವಕ.

ಕೊಪ್ಪಳದಿಂದ ದಾಸನಾಳಕ್ಕೆ ಬಂದಿದ್ದ ಶರಣಬಸವ, ಮಂಜುನಾಥ ಇಬ್ಬರು ಯುವಕರು ಕಾಲುವೆಯಲ್ಲಿ ಈಜಲು ಹೋಗಿದ್ದಾರೆ. ನೀರಿನ ರಭಸಕ್ಕೆ ಮಂಜು‌ನಾಥ ಕೊಚ್ಚಿಕೊಂಡು ಹೋಗಿದ್ದು, ಶರಣಬಸವ ಈಜಿ ದಡ ಸೇರಿಕೊಂಡಿದ್ದಾರೆ.

ಯುವಕನ ಪತ್ತೆಗೆ ಪೊಲೀಸ್ ಇಲಾಖೆ, ಅಗ್ನಿ ಶಾಮಕದಳದ ಸಿಬ್ಬಂದಿ ಸ್ಥಳಕ್ಕೆ ಆಗಮಿಸಿ, ಹುಡುಕಾಟ ನಡೆಸಿದ್ದಾರೆ.