ತಾವರಗೇರಾ: ಹಾಳಾದ ರಸ್ತೆಯಲ್ಲಿ ಕಲುಷಿತ ನೀರು ಸಂಗ್ರಹ

ತಾವರಗೇರಾ: ಸಮೀಪದ ಹಾಗಲದಾಳ ಗ್ರಾಮದಿಂದ ನಾರಿನಾಳ ಸಂಪರ್ಕ ರಸ್ತೆಯ ಡಾಂಬರು ಹಾಳಾಗಿದ್ದು, ಗ್ರಾಮದಲ್ಲಿ ಮುಖ್ಯವಾದ ಈ ರಸ್ತೆಯಲ್ಲಿ ಕಲುಷಿತ ನೀರು ಸಂಗ್ರಹವಾಗಿ ಸೊಳ್ಳೆಗಳ ಹಾವಳಿಯಿಂದ ಗ್ರಾಮಸ್ಥರಲ್ಲಿ ರೋಗ ಹರಡುವ ಭೀತಿ ಹೆಚ್ಚಾಗಿದೆ ಎಂದು ಗ್ರಾಮದ ಬಸನಗೌಡ ಪಾಟೀಲ, ಮುತ್ತುರಾಜ, ರಾಮಣ್ಣ ತಿಳಿಸಿದ್ದಾರೆ.

ಮಳೆಯಿಂದ ಈ ರಸ್ತೆ ಹದೆಗೆಟ್ಟು ವಾಹನ ಸವಾರರು , ರೈತರ ಎತ್ತಿನ ಬಂಡಿ ಓಡಾಟಕ್ಕೆ ಹರಸಾಹಸ ಪಡಬೇಕಿದೆ. ಡಾಂಬರ್‌ ಕಿತ್ತಿರುವ ಕಾರಣ ತಗ್ಗು ಬಿದ್ದು ಕಲುಷಿತ ನೀರು ನಿಂತಿದೆ. ಮಕ್ಕಳು, ವೃದ್ಧರು ಅನಾರೋಗ್ಯಕ್ಕೆ ತುತ್ತಾಗುವ ಭಯದಲ್ಲಿ ದಿನ ಕಳೆಯುತ್ತಿದ್ದು ಜುಮಲಾಪೂರ ಗ್ರಾ.ಪಂ ಆಡಳಿತ ಮತ್ತು ಸಂಬಂಧಪಟ್ಟ ಅಧಿಕಾರಿಗಳು ರಸ್ತೆ ದುರಸ್ಥಿಗೆ ಕ್ರಮ ಕೈಗೊಳ್ಳಬೇಕು ಎಂದು ಒತ್ತಾಯಿಸಿದ್ದಾರೆ.