ಸೌರಬೇಲಿಗೆ ಸಿಲುಕಿ 60 ವರ್ಷದ ಗಂಡಾನೆ ಸಾವು

ಹುಣಸೂರು: ನಾಗರಹೊಳೆ ರಾಷ್ಟ್ರೀಯ ಉದ್ಯಾನವನದ ವೀರನಹೊಸಹಳ್ಳಿ ವಲಯದ ಅಗಸನಹುಂಡಿ ಶಾಖೆ ಬಿ.ಆರ್.ಕಟ್ಟೆ ಗಸ್ತಿನ ಹಾವಿನಗುಂಡಿ ಎಂಬಲ್ಲಿ 60 ವರ್ಷದ ಗಂಡಾನೆ ತೂಗು ಸೌರಬೇಲಿಗೆ ಸಿಲುಕಿ ಬುಧವಾರ ಮೃತಪಟ್ಟಿದೆ.

‘ಬುಧವಾರ ರಾತ್ರಿ ಆನೆ ಅರಣ್ಯ ದಾಟುವಾಗ, ಕಾಡಂಚಿನಲ್ಲಿ ಅರಣ್ಯ ಇಲಾಖೆ ಅಳವಡಿಸಿರುವ ತೂಗು ಸೌರಬೇಲಿಗೆ ಸಿಲುಕಿ ಮೃತಪಟ್ಟಿದೆ. ಆನೆಯ ದಂತವನ್ನು ಸಂರಕ್ಷಿಸಲಾಗಿದೆ. ಪಶು ವೈದ್ಯಾಧಿಕಾರಿ ಡಾ.ರಮೇಶ್ ಮರಣೋತ್ತರ ಪರೀಕ್ಷೆ ನಡೆಸಿದ ಬಳಿಕ ಅಂತ್ಯಸಂಸ್ಕಾರ ಮಾಡಲಾಗಿದೆ’ ಎಂದು ನಾಗರಹೊಳೆ ಸಹಾಯಕ ಅರಣ್ಯ ಸಂರಕ್ಷಣಾಧಿಕಾರಿ ಎ.ವಿ.ಸತೀಶ್ ತಿಳಿಸಿದರು.

ಸ್ಥಳಕ್ಕೆ ಹುಲಿ ಯೋಜನಾ ನಿರ್ದೇಶಕ ಡಿ.ಮಹೇಶ್ ಕುಮಾರ್, ವಲಯ ಅರಣ್ಯಾಧಿಕಾರಿ ನಮನ ನಾರಾಯಣ್ ನಾಯಕ್ ಭೇಟಿ ನೀಡಿ ಪರಿಶೀಲಿಸಿದರು.