ಮತೀಯವಾದಿಗಳಿಂದ ಸಂವಿಧಾನಕ್ಕೆ ಅಪಾಯ: ವಿಧಾನಪರಿಷತ್ ಸದಸ್ಯ ಸಿ.ಟಿ.ರವಿ

ಮೈಸೂರು: ‘ಈ ದೇಶದಲ್ಲಿ ಮತೀಯವಾದಿಗಳು, ಭಯೋತ್ಪಾದಕರು, ಮೂಲಭೂತವಾದಿಗಳಿಂದ ಮಾತ್ರ ಸಂವಿಧಾನಕ್ಕೆ ಅಪಾಯವಿದೆಯೇ ಹೊರತು ಸನಾತನ ಧರ್ಮದಿಂದಲ್ಲ’ ಎಂದು ವಿಧಾನಪರಿಷತ್ ಸದಸ್ಯ ಸಿ.ಟಿ.ರವಿ ಪ್ರತಿಪಾದಿಸಿದರು.

ಬಿಜೆಪಿ ವತಿಯಿಂದ ಶುಕ್ರವಾರ ಆಯೋಜಿಸಿದ್ದ ಸಂವಿಧಾನ ಸಮರ್ಪಣಾ ದಿನದ ಅಂಗವಾಗಿ ಆಯೋಜಿಸಿದ್ದ ಸಂವಿಧಾನ ಜಾಗೃತಿಗಾಗಿ ‘ಭೀಮನೆಡೆ’ ಅಭಿಯಾನ ಕಾರ್ಯಕ್ರಮದಲ್ಲಿ ಅವರು ಮಾತನಾಡಿದರು.

‘ಸನಾತನ ಧರ್ಮದಿಂದ ಸಂವಿಧಾನಕ್ಕೆ ಅಪಾಯವಿದೆ ಎಂದು ಮುಖ್ಯಮಂತ್ರಿ ಹೇಳಿದ್ದಾರೆ. ಆದರೆ ಸತ್ಯ, ಪ್ರಕೃತಿ, ಬಹುತ್ವದ ಜೊತೆಗೆ ಸನಾತನ ಧರ್ಮವಿದೆ. ಒಂದು ಪುಸ್ತಕ, ಒಬ್ಬನೇ ಪ್ರವಾದಿಯಿಂದ ಎಂಬುದರಿಂದ ಸಂವಿಧಾನಕ್ಕೆ ಅಪಾಯವೇ ಹೊರತು ಕಾಲಕಾಲಕ್ಕೆ ಹೊಂದಿಕೊಂಡು ಹೋಗುವ ಸನಾತನ ಧರ್ಮದಿಂದಲ್ಲ. ಸಂವಿಧಾನದ ರಕ್ಷಣೆಯಾಗಬೇಕಾದರೆ ಅದರ ಆಶಯಕ್ಕೆ ತಕ್ಕಂತೆ ನಡೆಯಬೇಕು. ಕಾಂಗ್ರೆಸ್‌ ಮತೀಯರ ಓಲೈಕೆ ಮಾಡುತ್ತಿದೆ. ಆದರೆ ಬಡವರಿಗೆ ಬಲ ಕೊಡಲು ಬಿಜೆಪಿ ಹಲವು ಯೋಜನೆ ರೂಪಿಸಿದೆ’ ಎಂದು ಹೇಳಿದರು.

‘ಅಂಬೇಡ್ಕರ್ ಅವರನ್ನು ಚುನಾವಣೆಯಲ್ಲಿ ಸೋಲಿಸಿದ್ದು ಕಾಂಗ್ರೆಸ್, ಅವರು ಸತ್ತಾಗಲೂ ಮಣ್ಣು ಮಾಡಲು ಜಾಗ ಕೊಡಲಿಲ್ಲ. ಪ್ರಧಾನಿ ಮೋದಿ ಪ್ರಧಾನಿಯಾಗುವವರೆಗೆ ಸಂವಿಧಾನ ದಿನ ಆಚರಿಸಲಿಲ್ಲ. ಅದಕ್ಕಿಂತ ಮೊದಲು ಅದನ್ನು ಕಾನೂನಿನ ದಿನವಾಗಿ ಆಚರಿಸಲಾಗುತ್ತಿತ್ತು. ಅಂಬೇಡ್ಕರ್ ಬಗ್ಗೆ ಗೌರವ ಇದ್ದಿದ್ದರೆ ಸಂವಿಧಾನ ಗೌರವ ದಿನ ಆಚರಿಸುತ್ತಿದ್ದೀರಿ’ ಎಂದು ಟೀಕಿಸಿದರು.

‘ಜವಾಹರಲಾಲ್ ನೆಹರೂ, ಇಂದಿರಾಗಾಂಧಿ ಹಾಗೂ ರಾಜೀವ್‌ಗಾಂಧಿ ಅವರ ಕಾಲದಲ್ಲಿ ಹಿಂದುಳಿದ ವರ್ಗಗಳಿಗೆ ಮೀಸಲಾತಿ ಸಿಗಲಿಲ್ಲ. ಬಿಜೆಪಿ ನೇತೃತ್ವದಲ್ಲಿ ರಚನೆಯಾದ ಸರ್ಕಾರದಲ್ಲಿ ವಿ.ಪಿ.ಸಿಂಗ್ ಪ್ರಧಾನಿಯಾಗಿದ್ದ ಒಬಿಸಿಗೆ ಮೀಸಲಾತಿ ಜಾರಿಗೆ ತರಲಾಯಿತು’ ಎಂದು ಸಮರ್ಥಿಸಿಕೊಂಡರು.

ಬಿಜೆಪಿ ಮುಖಂಡ ಪ್ರತಾಪ್‌ ಸಿಂಹ ಮಾತನಾಡಿ, ‘ಅಂಬೇಡ್ಕರ್ ಬೌದ್ಧ ಧರ್ಮ ಬಿಟ್ಟು ಬೇರೆ ಧರ್ಮಕ್ಕೆ ಮತಾಂತರವಾಗಿದ್ದರೆ ಹಿಂದೂ ಧರ್ಮದ ಉಳಿವು ಕಷ್ಟವಾಗುತ್ತಿತ್ತು. ಇಂತಹ ಮಹಾನ್ ವ್ಯಕ್ತಿಯನ್ನು ಮೀಸಲಾತಿ ಎಂಬ ದುರ್ಬೀನಿನಿಂದ ನೋಡಬಾರದು. ನಾವು ಎಷ್ಟೇ ಸೂಕ್ಷ್ಮದಿಂದ ಇದ್ದರೂ ನಮ್ಮೊಳಗೆ ಜಾತೀಯತೆ ಇದೆ. ಅದನ್ನು ಬಿಟ್ಟಾಗ ಮಾತ್ರ ಅಂಬೇಡ್ಕರ್ ಅವರಿಗೆ ಗೌರವ ಕೊಡಲು ಸಾಧ್ಯ’ ಎಂದರು.

ಡಾ.ಪ್ರಪುಲ್ಲಾ ಮಲ್ಲಾಡಿ ಮಾತನಾಡಿದರು. ಬಿಜೆಪಿ ನಗರ ಜಿಲ್ಲಾ ಘಟಕದ ಅಧ್ಯಕ್ಷ ಎಲ್. ನಾಗೇಂದ್ರ, ಗ್ರಾಮಾಂತರ ಜಿಲ್ಲೆಯ ಅಧ್ಯಕ್ಷ ಕುಂಬರಹಳ್ಳಿ ಸುಬ್ಬಣ್ಣ, ಶಾಸಕ ಕೆ.ಎನ್.ಶ್ರೀವತ್ಸ, ಮಾಜಿ ಶಾಸಕ ಹರ್ಷವರ್ಧನ್, ಮುಖಂಡರಾದ ಫಣೀಶ್, ಶಿವಕುಮಾರ್, ಎಸ್‌.ಮಹದೇವ್, ಸಂದೇಶ್ ಸ್ವಾಮಿ, ಡಾ.ರೇವಣ್ಣ, ಮಹೇಶ್, ಕಿರಣ್, ಜಯರಾಮ್, ಶೈಲೇಂದ್ರ, ಅನಿಲ್, ಕಾರ್ತಿಕ್, ಸೋಮಸುಂದರ್ ಹಾಜರಿದ್ದರು.