ಮರಗಳನ್ನು ರಕ್ಷಿಸಲು ಪರಿಸರವಾದಿಗಳ ಮೊರೆ

ಮೈಸೂರು: ನಗರದಲ್ಲಿರುವ ಮರಗಳನ್ನು ರಕ್ಷಿಸಬೇಕು ಎಂದು ಆಗ್ರಹಿಸಿ ಪರಿಸರ ಸಂರಕ್ಷಣಾ ಸಮಿತಿ ನೇತೃತ್ವದಲ್ಲಿ ಕಾರ್ಯಕರ್ತರು ಬುಧವಾರ ಪಾಲಿಕೆ ಮುಂಭಾಗ ಪ್ರತಿಭಟನೆ ನಡೆಸಿದರು.

ಈ ಸಂದರ್ಭದಲ್ಲಿ ಮಾತನಾಡಿದ ಪರಿಸರವಾದಿ ಭಾನುಮೋಹನ್, ‘ನಗರ ವ್ಯಾಪ್ತಿಯಲ್ಲಿರುವ ಮರಗಳನ್ನು ರಕ್ಷಿಸುವಲ್ಲಿ ಅಧಿಕಾರಿಗಳು ಸೋಲುತ್ತಿದ್ದಾರೆ. ಬಿದ್ದು ಹೋಗುವ ಮರಗಳನ್ನು ತೆರವುಗೊಳಿಸುವ ವಿಚಾರದಲ್ಲೂ ಸರ್ಕಾರಕ್ಕೆ ನಷ್ಟವಾಗುತ್ತಿದೆ’ ಎಂದು ಬೇಸರ ವ್ಯಕ್ತಪಡಿಸಿದರು.

ಉದ್ಯಾನಗಳಲ್ಲಿ ನಿಯಮಬಾಹಿರವಾಗಿ ಕಟ್ಟಡಗಳನ್ನು ನಿರ್ಮಿಸಲು ಆವಕಾಶ ಮಾಡಿಕೊಡಲಾಗುತ್ತಿದೆ. ಇದರಿಂದ ಉದ್ಯಾನದಲ್ಲಿರುವ ಅಮೂಲ್ಯ ವೃಕ್ಷಗಳು ಬಲಿಯಾಗುತ್ತಿದೆ. ಈ ಕುರಿತು ಯಾವುದೇ ಕಾಳಜಿ ಅಧಿಕಾರಿಗಳಿಗೆ ಇಲ್ಲ ಎಂದು ಅವರು ಟೀಕಿಸಿದರು.

ತೆರವು ಮಾಡಿದ ಮರಗಳ ಮೌಲ್ಯವನ್ನು ನಿಗದಿ ಮಾಡುವಲ್ಲಿಯೂ ಅಧಿಕಾರಿಶಾಹಿ ಎಡವುತ್ತಿದೆ. ಕಡಿಮೆ ಮೌಲ್ಯ ನಿಗದಿಪಡಿಸಿ ಖಾಸಗಿ ವ್ಯಕ್ತಿಗಳಿಗೆ ಮಾರಾಟ ಮಾಡಲಾಗುತ್ತಿದೆ. ಈ ನ್ಯೂನತೆಗಳನ್ನು ಸರಿಪಡಿಸಬೇಕು ಎಂದು ಅವರು ಆಗ್ರಹಿಸಿದರು.

ಪರಿಸರವಾದಿಗಳಾದ ಅರವಿಂದ ಶರ್ಮ, ರಾಘವೇಂದ್ರ, ಮಣಿಕಂಠ ಪ್ರತಿಭಟನೆಯಲ್ಲಿದ್ದರು.