ಇಬ್ಬರು ಬಾಲಕಿಯರಿಗೆ ಪಾರ್ಕ್‌ನಲ್ಲಿ ಲೈಂಗಿಕ ಕಿರುಕುಳ

ಮೈಸೂರು: ನಗರದ ಉದ್ಯಾನವೊಂದರಲ್ಲಿ 10 ವರ್ಷದ ಇಬ್ಬರು ಬಾಲಕಿಯರಿಗೆ ಹಾಡಹಗಲೇ ಲೈಂಗಿಕ ಕಿರುಕುಳ ನೀಡಿದ ಇಬ್ಬರು ವ್ಯಕ್ತಿಗಳನ್ನು ಪೊಲೀಸರು ಬಂಧಿಸಿದ್ದಾರೆ. ಆರೋಪಿಗಳಿಬ್ಬರೂ ಬಾಲಕಿಯರ ಮನೆಯ ಸಮೀಪ ವಾಸವಿದ್ದು, ಪರಿಚಿತರೇ ಆಗಿದ್ದಾರೆ.

ಭಾನುವಾರ ಸಂಜೆ ಮನೆಯ ಮುಂದೆ ಆಟವಾಡುತ್ತಿದ್ದ ಬಾಲಕಿಯರಿಗೆ ಚಾಕಲೇಟ್‌ ಕೊಡಿಸುವ ಆಮಿಷ ಒಡ್ಡಿದ 24 ವರ್ಷದ ಯುವಕ ಬೈಕ್‌ನಲ್ಲಿ ಉದ್ಯಾನಕ್ಕೆ ಕರೆದುಕೊಂಡು ಹೋಗಿ ಇಬ್ಬರನ್ನೂ ಲೈಂಗಿಕವಾಗಿ ಬಳಸಿಕೊಂಡಿದ್ದಾನೆ. ಇದನ್ನು ನೋಡಿದ 53 ವರ್ಷದ ವ್ಯಕ್ತಿಯು ಯುವಕನನ್ನು ಬೈಯ್ದು ಓಡಿಸುವ ನಾಟಕವಾಡಿದ್ದಾನೆ. ಬಳಿಕ ಬಾಲಕಿಯರಿಗೆ ಈತನೂ ಲೈಂಗಿಕ ಕಿರುಕುಳ ನೀಡಿದ್ದಾನೆ. ರಾತ್ರಿ ಮನೆಗೆ ಬಂದ ಬಾಲಕಿಯರು, ಪೋಷಕರಿಗೆ ಈ ವಿಷಯ ತಿಳಿಸಿದ್ದಾರೆ.

ದೂರು ಸ್ವೀಕರಿಸುತ್ತಿದ್ದಂತೆ ಕಾರ್ಯಾಚರಣೆ ನಡೆಸಿದ ಪೊಲೀಸರು, ಇಬ್ಬರು ಆರೋಪಿಗಳನ್ನು ಬಂಧಿಸಿದ್ದಾರೆ.