ಮಸ್ಕಿ| ಬ್ಯಾರಿಕೆರ್ ಡಿವೈಡರ್ ನಿರ್ಮಾಣ; 10 ಕೋಟಿ ವೆಚ್ಚದ ಯೋಜನೆ ವಿಫಲ: ಆರೋಪ

ಮಸ್ಕಿ: ಪಟ್ಟಣದಲ್ಲಿ ವಾಹನ ಸಂಚಾರ ಸುಗಮಗೊಳಿಸುವ ಉದ್ದೇಶದಿಂದ ರಾಷ್ಟ್ರೀಯ ಹೆದ್ದಾರಿ ಪ್ರಾಧಿಕಾರವು ಅಶೋಕ ವೃತ್ತದಿಂದ ಬಸವೇಶ್ವರ ವೃತ್ತದವರೆಗೆ ಸುಮಾರು 2 ಕಿಲೋಮೀಟರ್ ವ್ಯಾಪ್ತಿಯಲ್ಲಿ ಡಿವೈಡರ್ ಮತ್ತು ಸರ್ವಿಸ್ ರಸ್ತೆ ನಿರ್ಮಿಸಿದೆ. ಈ ಯೋಜನೆ ಅನುಕೂಲಕ್ಕಿಂತ ಅನಾನುಕೂಲವೇ ಹೆಚ್ಚು ಸೃಷ್ಟಿಸಿದೆ ಎಂದು ಸಾರ್ವಜನಿಕರ ಆರೋಪವಾಗಿದೆ.

ಹಿಂದೆ 60 ಅಡಿ ಹೆದ್ದಾರಿ ರಸ್ತೆ ಇತ್ತು. ಹೊಸ ಡಿವೈಡರ್ ಕಾಮಗಾರಿಯಿಂದ ಅದು 40 ಅಡಿಗೆ ಕುಂಠಿತವಾಗಿದೆ. ಎರಡು ಬದಿಗಳಲ್ಲಿ ಸರ್ವಿಸ್ ರಸ್ತೆ, ಡಿವೈಡರ್ ಮಾಡಿ ಬ್ಯಾರಿಕೇಡ್‌ ಹಾಕಲಾಗಿದೆ. ಸರ್ವಿಸ್ ರಸ್ತೆಯಲ್ಲಿ ಬೀದಿ ವ್ಯಾಪಾರಿಗಳ ಬಂಡಿ–ಅಂಗಡಿಗಳು, ಎಲ್ಲಿಂದರಲ್ಲಿ ವಾಹನ ನಿಲುಗಡೆಯಿಂದಾಗಿ ಸಂಚಾರಕ್ಕೆ ಅಡ್ಡಿ ಉಂಟಾಗಿದೆ. ನೂರಾರು ಬಸ್‌ಗಳು, ಭಾರಿ ವಾಹನಗಳು ಹಾಗೂ ಕಾರುಗಳು ಈ ಮಾರ್ಗದಲ್ಲಿ ದಿನವೂ ಸಂಚರಿಸುತ್ತಿದ್ದು, 40 ಅಡಿ ರಸ್ತೆ ಈ ಭಾರವನ್ನು ನಿಭಾಯಿಸಲು ಅಸಮರ್ಥವಾಗಿದೆ.

‘ಸಂಚಾರ ದಟ್ಟಣೆ ದಿನೇ ದಿನೇ ಹೆಚ್ಚಾಗುತ್ತಿದ್ದು, ರಸ್ತೆ ದಾಟುವಲ್ಲಿ ಸಾರ್ವಜನಿಕರು ಜೀವ ಭಯದಲ್ಲೇ ಸಾಗಬೇಕಾದ ಪರಿಸ್ಥಿತಿ ನಿರ್ಮಾಣವಾಗಿದೆ. ಸರ್ವಿಸ್ ರಸ್ತೆ ನಿರ್ಮಾಣಕ್ಕೆ ಬದಲಾಗಿ, ಅಡ್ಡ–ಕಾರಿಡಾರ್ ಅಥವಾ ಸರಿಯಾದ ಯೋಜನೆಯ ರಸ್ತೆಯನ್ನು ಮಾಡಿದರೆ ಸಮಸ್ಯೆ ಉಂಟಾಗುತ್ತಿರಲಿಲ್ಲ’ ಎಂಬುದು ಸ್ಥಳೀಯರ ಅಭಿಪ್ರಾಯ.

ಹೆದ್ದಾರಿ ಪ್ರಾಧಿಕಾರವು ₹10 ಕೋಟಿ ಕೋಟಿ ಹಣ ಖರ್ಚು ಮಾಡಿದರೂ, ಯೋಜನೆ ಜ್ಞಾನಸಮ್ಮತವಾಗಿಲ್ಲ ಎಂಬ ಆರೋಪ ಕೇಳಿ ಬರುತ್ತಿದೆ. ಜನ ಸಾಮಾನ್ಯರಿಗೆ ಕೊಡಬೇಕಾದ ಅನುಕೂಲತೆ, ಈಗ ದೊಡ್ಡ ತೊಂದರೆಯಾಗಿ ಮಾರ್ಪಟ್ಟಿರುವ ಯೋಜನೆಗೆ ಹೆದ್ದಾರಿ ಪ್ರಾಧಿಕಾರ ಮರುಪರಿಶೀಲನೆ ಸಾರ್ವಜನಿಕರಿಗೆ ಅನುಕೂಲ ಮಾಡಿಕೊಡುವ ಜೊತೆಗೆ ವಾಹನಗಳ ದಟ್ಟಣಗೆ ಕಡಿವಾಣ ಹಾಕಲು ಮುಂದಾಗಬೇಕು ಎನ್ನುತ್ತಾರೆ ಸ್ಥಳೀಯರು.