ಡೆಂಗಿ ನಿಯಂತ್ರಣಕ್ಕೆ ಮುನ್ನಚ್ಚರಿಕೆ ಕ್ರಮ ಕೈಗೊಳ್ಳಿ: ಪಾಲಿಕೆ ಆಯುಕ್ತ ಸೂಚನೆ

ರಾಯಚೂರು: ‘ಜಿಲ್ಲೆಯಲ್ಲಿ ಆಗಲೇ ಮಳೆ ಶುರುವಾಗಿದೆ. ಮಳೆಗಾಲದಲ್ಲಿ ಡೆಂಗಿ ಪ್ರಕರಣಗಳು ಹೆಚ್ಚಾಗುವ ಸಾಧ್ಯತೆಗಳಿವೆ. ಡೆಂಗಿ ನಿಯಂತ್ರಣಕ್ಕೆ ಈಗಿನಿಂದಲೇ ಮುನ್ನಚ್ಚರಿಕೆ ಕ್ರಮ ಕೈಗೊಳ್ಳಬೇಕು’ ಎಂದು ಮಹಾನಗರ ಪಾಲಿಕೆ ಆಯುಕ್ತ ಜುಬಿನ್ ಮೊಹಾಪಾತ್ರ ಅಧಿಕಾರಿಗಳಿಗೆ ಸೂಚನೆ ನೀಡಿದರು.

ಇಲ್ಲಿನ ಮಹಾನಗರ ಪಾಲಿಕೆ (ಹಳೆ ಜಿಲ್ಲಾಡಳಿತ) ಸಭಾಂಗಣದಲ್ಲಿ ಮಹಾನಗರ ಪಾಲಿಕೆ ಹಾಗೂ ಆರೋಗ್ಯ ಇಲಾಖೆಯ ಜಂಟಿ ಡೆಂಗಿ ನಿಯಂತ್ರಣ ಸಭೆಯಲ್ಲಿ ಅವರು ಮಾತನಾಡಿದರು.

‘ಸರ್ಕಾರದ ಆದೇಶದಂತೆ, ವಾಣಿಜ್ಯ ಅಂಗಡಿಗಳು, ಹೋಟೆಲ್‌ಗಳು ಮತ್ತು ಅಂಗಡಿಗಳ ಕ್ರಿಯೆಯಿಂದ ಉಂಟಾಗುವ ನಿಂತ ನೀರಿನಲ್ಲಿ ಡೆಂಗಿ ಲಾರ್ವಾ ಕಂಡುಬಂದರೆ, ವಾಣಿಜ್ಯ ಅಂಗಡಿಗಳು ಉಲ್ಲಂಘಿಸಿದರೆ ₹2 ಸಾವಿರ ದಂಡ ವಿಧಿಸಬೇಕು’ ಎಂದು ಸಿಬ್ಬಂದಿ ಸೂಚನೆ ನೀಡಿದರು.

‘ಮಹಾನಗರಪಾಲಿಕೆಯ ವ್ಯಾಪ್ತಿಯಲ್ಲಿ ಮುಂಗಾರು ಪೂರ್ವದಲ್ಲೇ ಡೆಂಗಿ ಮುಕ್ತಗೊಳಿಸುವ ಕಾರ್ಯ ಆರಂಭವಾಗಬೇಕು. ನಗರ ಪ್ರಾಥಮಿಕ ಆರೋಗ್ಯ ಕೇಂದ್ರಗಳು ಮತ್ತು ಮಹಾನಗರ ಪಾಲಿಕೆ ಆರೋಗ್ಯ ಸಿಬ್ಬಂದಿಗೆ ಚರಂಡಿ ಮತ್ತು ರಸ್ತೆ ನೀರಿನ ಶುಚಿಗೊಳಿಸುವಿಕೆ ಹಾಗೂ ಬಿಟಿಐ ಪ್ರೋಟಿನ್ ಸಿಂಪಡಿಸಬೇಕು ಹಾಗೂ ಧೂಮೀಕರಣ ಮಾಡಬೇಕು‘ ಎಂದು ನಿರ್ದೇಶನ ನೀಡಿದರು.

ಡೆಂಗಿ ಇತಿಹಾಸವಿರುವ ಎಲ್‌ಬಿಎಸ್ ನಗರ, ಹರಿಜನವಾಡ, ರಾಗಮನಗುಡ್ಡ ಸೇರಿ ಹಾಟ್‌ಸ್ಪಾಟ್ ಪ್ರದೇಶಗಳಲ್ಲಿ ಡೆಂಗಿ ಸೊಳ್ಳೆಗಳು ಮತ್ತು ಲಾರ್ವಾಗಳ ಗೂಡುಗಳನ್ನು ಸಂಪೂರ್ಣವಾಗಿ ನಾಶಮಾಡಲು ಸಭೆಯಲ್ಲಿ ನಿರ್ಧರಿಸಲಾಯಿತು.

ನಂತರ ಡೆಂಗಿ ಮತ್ತು ಸಾಂಕ್ರಾಮಿಕ ರೋಗಗಳ ಜಾಗೃತಿ ಪೋಸ್ಟರ್‌ಗಳನ್ನು ಬಿಡುಗಡೆ ಮಾಡಲಾಯಿತು.

‘ಕಾರ್ಪೊರೇಷನ್ ಆರೋಗ್ಯ ಅಧಿಕಾರಿ, ಜಿಲ್ಲಾ ಟಿಬಿ ಅಧಿಕಾರಿ, ಜಿಲ್ಲಾ ಕಣ್ಗಾವಲು ಅಧಿಕಾರಿ, ನಿಗಮ ಪರಿಸರ ಎಂಜಿನಿಯರ್, ನಗರ ಪ್ರಾಥಮಿಕ ಆರೋಗ್ಯ ಕೇಂದ್ರ ವೈದ್ಯಕೀಯ ಅಧಿಕಾರಿ, ಹಿರಿಯ ನೈರ್ಮಲ್ಯ ಆರೋಗ್ಯ ನಿರೀಕ್ಷಕರು ಸಭೆಯಲ್ಲಿ ಹಾಜರಿದ್ದರು.