ರಾಜ್ಯಮಟ್ಟದ ಬಾಕ್ಸಿಂಗ್: ಕನಕಪುರ ವಿದ್ಯಾರ್ಥಿನಿ ಎಚ್.ಮಾನಸಗೆ ಕಂಚಿನ ಪದಕ

ಕನಕಪುರ: ಶಾಲಾ ಶಿಕ್ಷಣ ಇಲಾಖೆ (ಪದವಿಪೂರ್ವ) ವತಿಯಿಂದ ನಡೆದ ರಾಜ್ಯಮಟ್ಟದ ಬಾಕ್ಸಿಂಗ್ ಕ್ರೀಡಾಕೂಟದಲ್ಲಿ ಕನಕಪುರ ಸರ್ಕಾರಿ ಪದವಿ ಪೂರ್ವ ಕಾಲೇಜಿನ ವಿದ್ಯಾರ್ಥಿನಿ ಎಚ್.ಮಾನಸ ಕಂಚಿನ ಪದಕ ಪಡೆದಿದ್ದಾರೆ.

ರಾಜ್ಯಮಟ್ಟದ 2025-26ನೇ ಸಾಲಿನ ಬಾಕ್ಸಿಂಗ್ ಕ್ರೀಡಾಕೂಟ ನವೆಂಬರ್ 27 ಮತ್ತು 28ರಂದು ಶಿವಮೊಗ್ಗದ ನೆಹರೂ ಕ್ರೀಡಾಂಗಣದಲ್ಲಿ ನಡೆಯಿತು.

ಪದವಿಪೂರ್ವ ಕಾಲೇಜು ವಿಭಾಗದ 45ರಿಂದ 48 ಕೆ.ಜಿ ತೂಕದಲ್ಲಿ ಎಚ್.ಮಾನಸ ರಾಮನಗರ ಜಿಲ್ಲೆಯಿಂದ ರಾಜ್ಯವನ್ನು ಪ್ರತಿನಿಧಿಸಿದ್ದರು. ರಾಜ್ಯಮಟ್ಟದ ಬಾಕ್ಸಿಂಗ್ ಕ್ರೀಡಾಕೂಟದಲ್ಲಿ ಗೆದ್ದು ಕಂಚಿನ ಪದಕವನ್ನು ಪಡೆದು ರಾಷ್ಟ್ರಮಟ್ಟಕ್ಕೆ ಆಯ್ಕೆಯಾಗಿದ್ದಾರೆ.

ಸರ್ಕಾರಿ ಪದವಿಪೂರ್ವ ಕಾಲೇಜಿನ ಪ್ರಾಂಶುಪಾಲ ದೊಡ್ಡಬೋರಯ್ಯ, ದೈಹಿಕ ಶಿಕ್ಷಣ ಉಪನ್ಯಾಸಕ ಶ್ರೀನಿವಾಸ್ ಹಾಗೂ ತರಬೇತುದಾರ ಹೊನ್ನಗಂಗಪ್ಪ ಕಂಚಿನ ಪದಕ ಪಡೆದ ವಿದ್ಯಾರ್ಥಿನಿ ಎಚ್.ಮಾನಸ ಅವರನ್ನು ಅಭಿನಂದಿಸಿದರು.