ಚತುಷ್ಪತ ರಸ್ತೆ | ಅವೈಜ್ಞಾನಿಕ ಕಾಮಗಾರಿ: 50ಕ್ಕೂ ಹೆಚ್ಚು ಗುಡ್ಡ ನೆಲಸಮ

ತೀರ್ಥಹಳ್ಳಿ: ರಾಷ್ಟ್ರೀಯ ಹೆದ್ದಾರಿ ವಿಸ್ತರಣೆಗೆ ಕೈಗೆತ್ತಿಕೊಂಡಿರುವ ಕಾಮಗಾರಿ ಮಲೆನಾಡಿನ ನವಿರುತನಕ್ಕೆ ಮಾದರಿ ಆಗಿದ್ದ ತೀರ್ಥಹಳ್ಳಿ ತಾಲ್ಲೂಕನ್ನು ಹಿಂಡಿ–ಹಿಪ್ಪೆ ಮಾಡುತ್ತಿದೆ. ಇಲ್ಲಿನ ಕಾಡು–ಗುಡ್ಡಗಳು ಅಪ್ಪಚ್ಚಿ ಆಗುತ್ತಿವೆ. ಅರಣ್ಯ, ಕಂದಾಯ ವರ್ಗೀಕೃತ ಪ್ರದೇಶದಲ್ಲಿನ ಸಾವಿರಾರು ಮರಗಳು ಧರೆಗುರುಳುತ್ತಿವೆ.

ತೀರ್ಥಹಳ್ಳಿಯ ಹೆಬ್ಬಾಗಿಲು ಭಾರತೀಪುರದಲ್ಲಿ ₹56 ಕೋಟಿ ವೆಚ್ಚದಲ್ಲಿ ನಿರ್ಮಿಸುತ್ತಿರುವ ಮೇಲ್ಸೇತುವೆ (ಪ್ಲೈ ಓವರ್)‌ ಸುತ್ತಮುತ್ತಲಿನ 300 ಮೀಟರ್‌ ವ್ಯಾಪ್ತಿಯಲ್ಲಿ ಮಂಗಳವಾರ ಭಾರೀ ಮಳೆಗೆ ಗುಡ್ಡ ಕುಸಿತ ಆಗಿದೆ. ಅಲ್ಲದೇ ಗುಡ್ಡದಲ್ಲಿದ್ದ ಅಪರೂಪದ ಮರ, ಗಿಡಗಳು ಧರೆಗುರುಳಿವೆ.

₹537.47 ಕೋಟಿ ವೆಚ್ಚದಲ್ಲಿ ಶಿವಮೊಗ್ಗ-ತೀರ್ಥಹಳ್ಳಿ ರಾಷ್ಟ್ರೀಯ ಹೆದ್ದಾರಿ 169 ಮಾರ್ಗದ ವಿಸ್ತರಣೆ ಕಾಮಗಾರಿ ಪ್ರಕ್ರಿಯೆ ಆರಂಭಗೊಂಡಿದೆ. ಇದರಲ್ಲಿ ರಾಷ್ಟ್ರೀಯ ಹೆದ್ದಾರಿ 169 ‘ಎ’ ಮಾರ್ಗದ ಮೇಗರವಳ್ಳಿಯಿಂದ ಆಗುಂಬೆವರೆಗೆ ರಸ್ತೆ ವಿಸ್ತರಣೆ ಕಾಮಗಾರಿಗೆ ₹ 96.2 ಕೋಟಿ, ಕೋಣಂದೂರು ಚತುಷ್ಪತ ರಸ್ತೆ ₹25 ಕೋಟಿ, ತೀರ್ಥಹಳ್ಳಿ-ಕುಂದಾಪುರ ರಾಜ್ಯ ಹೆದ್ದಾರಿ ₹8 ಕೋಟಿ ಮಂಜೂರಾಗಿದೆ.

ಮೇಳಿಗೆ ರಸ್ತೆಯ ಹೆಡಗೆದಿಬ್ಬ, ಕುಪ್ಪಳಿ-ಹಿರೇಕೇರೂರು, ಕೆಸರೆ-ಚಿಟ್ಟೇಬೈಲು ಬೈಪಾಸ್ ರಸ್ತೆ ಅಭಿವೃದ್ಧಿ‌ ಪ್ರಕ್ರಿಯೆ ನಡೆಯುತ್ತಿದೆ. ರಾಷ್ಟ್ರೀಯ ಹೆದ್ದಾರಿ, ರಾಜ್ಯ ಹೆದ್ದಾರಿ ಕಾಮಗಾರಿಗೆ ಮಣ್ಣು ಸಂಗ್ರಹಣೆ, ಸಾರಿಗೆ ವ್ಯವಸ್ಥೆಗೆ ಅನುಕೂಲವಾಗುವಂತೆ ಗುಡ್ಡ ಕಡಿಯುವ ಪ್ರಕ್ರಿಯೆ ಅಲ್ಲಲ್ಲಿ ಆರಂಭಗೊಂಡಿದೆ. ವಿವಿಧ ರಸ್ತೆ ವಿಸ್ತರಣೆ ಕಾಮಗಾರಿಗೆ ಅಂದಾಜು 50ಕ್ಕೂ ಹೆಚ್ಚು ಗುಡ್ಡಗಳು ಧರೆಗುರುಗಳಿವೆ. 

ಕೃಷಿ ಜಮೀನು, ಮನೆ, ಗ್ರಾಮಠಾಣ, ನೆಡುತೋಪು, ಅರಣ್ಯ ಪ್ರದೇಶದಲ್ಲಿ ರಸ್ತೆಯನ್ನು ನೇರಗೊಳಿಸಿ ದೂರವನ್ನು ಕಡಿತಗೊಳಿಸುವ ಕಾಮಗಾರಿ ಎಗ್ಗಿಲ್ಲದೆ ಸಾಗಿದೆ.