ಶಿವಮೊಗ್ಗ | ಕೆಡಿಪಿ ಸಭೆ: ಗಾಂಜಾ ಸದ್ದು, ಪೊಲೀಸರಿಗೆ ಪಕ್ಷಾತೀತ ಗುದ್ದು

ಶಿವಮೊಗ್ಗ: ‘ಗಾಂಜಾ ಹಾವಳಿ ಶಿವಮೊಗ್ಗ ಜಿಲ್ಲೆಗೆ ಕೆಟ್ಟ ಹೆಸರು ತರುತ್ತಿದೆ. 15 ದಿನದೊಳಗೆ ಅದನ್ನು ಮಟ್ಟಹಾಕಿ ವರದಿ ಕೊಡದಿದ್ದರೆ ಗಂಭೀರ ಪರಿಣಾಮ ಎದುರಿಸಬೇಕಾಗುತ್ತದೆ’ ಎಂದು ಜಿಲ್ಲಾ ಉಸ್ತುವಾರಿ ಸಚಿವ ಮಧು ಬಂಗಾರಪ್ಪ ಪೊಲೀಸ್ ಇಲಾಖೆಗೆ ತಾಕೀತು ಮಾಡಿದರು. 

ಇಲ್ಲಿಯ ಜಿಲ್ಲಾ ಪಂಚಾಯಿತಿ ಕೆಡಿಪಿ ಸಭೆಯಲ್ಲಿ ಶುಕ್ರವಾರ ‘ಗಾಂಜಾ ಮಾಫಿಯಾ’ ಸದ್ದು ಮಾರ್ದನಿಸಿತು. ಶಾಸಕರು ಪಕ್ಷಾತೀತವಾಗಿ ಗಾಂಜಾ, ಓಸಿ ಹಾಗೂ ಮನೆ ಮನೆಯಲ್ಲಿ ಚಿಲ್ಲರೆ ಮದ್ಯ ಮಾರಾಟದ ವಿರುದ್ಧ ಕ್ರಮಕ್ಕೆ ಆಗ್ರಹಿಸಿದರು. ಪೊಲೀಸ್ ಇಲಾಖೆಯ ವೈಫಲ್ಯ ಬಿಚ್ಚಿಟ್ಟರು. 

ಅದಕ್ಕೆ ಪ್ರತಿಕ್ರಿಯಿಸಿದ ಮಧು ಬಂಗಾರಪ್ಪ, ‘ಗಾಂಜಾ ಮಾಫಿಯಾದೊಂದಿಗೆ ಬಹಳಷ್ಟು ಪೊಲೀಸ್ ಅಧಿಕಾರಿಗಳು ಶಾಮೀಲು ಆಗಿದ್ದಾರೆ ಎಂಬ ಮಾಹಿತಿ ಇದೆ. ಇದು ಮುಖ್ಯಮಂತ್ರಿ ಸಿದ್ದರಾಮಯ್ಯ ಅವರ ಗಮನಕ್ಕೂ ಬಂದಿದ್ದು, ಶಿವಮೊಗ್ಗ ಸೇರಿದಂತೆ ಕೆಲವು ಜಿಲ್ಲೆಗಳಲ್ಲಿ ಈ ಹಾವಳಿಯನ್ನು ಸಿಎಂ ಕೂಡ ಗಂಭೀರವಾಗಿ ಪರಿಗಣಿಸಿದ್ದಾರೆ. ಸಭೆ ಕೂಡ ನಡೆಸಿದ್ದಾರೆ’ ಎಂದರು.  

‘ಈ ವಿಚಾರದಲ್ಲಿ ನನಗೆ ಯಾವುದೇ ವಿವರಣೆ ಬೇಡ. 15 ದಿನಗಳ ಒಳಗಾಗಿ ಕ್ರಮ ಕೈಗೊಂಡು ಅದರ ವರದಿ ಕೊಡಬೇಕು. ಅದನ್ನು ಸಿಎಂ ಗಮನಕ್ಕೆ ತರುತ್ತೇನೆ ಎಂದು ಸಭೆಯಲ್ಲಿದ್ದ ಎಎಸ್‌ಪಿ ಅವರಿಗೆ ಸೂಚನೆ ನೀಡಿದರು. ಗಾಂಜಾ, ಓಸಿ ದಂಧೆಯೊಂದಿಗೆ ಕೈಜೋಡಿಸಿದ ಪೊಲೀಸರನ್ನು ವರ್ಗಾವಣೆ ಮಾಡಿ. ಯಾರನ್ನೂ ಬಾಲಬಿಚ್ಚಲು ಬಿಡಬೇಡಿ’ ಎಂದು ಹೇಳಿದರು. 

ಐಜಿಪಿ ನೇತೃತ್ವದಲ್ಲಿ ಸಭೆ: 

ಜಿಲ್ಲೆಯಲ್ಲಿ ಗಾಂಜಾ ಜೊತೆ ಓಸಿ, ಮಟ್ಕಾ ದಂಧೆಗೂ ಕಡಿವಾಣ ಹಾಕಿ. ಅವು ಒಂದಕ್ಕೊಂದು ಸಂಬಂಧ ಹೊಂದಿವೆ ಎಂದು ಪೊಲೀಸರಿಗೆ ಸೂಚನೆ ನೀಡಿದ ಮಧು ಬಂಗಾರಪ್ಪ, ಈ ಅಕ್ರಮ ಚಟುವಟಿಕೆಗಳ ನಿಯಂತ್ರಣದ ಬಗ್ಗೆ ಶೀಘ್ರ ಐಜಿಪಿ ಅವರನ್ನು ಕರೆಸಿ ಶಿವಮೊಗ್ಗದಲ್ಲಿ ಪೊಲೀಸ್ ಅಧಿಕಾರಿಗಳೊಂದಿಗೆ ಸಭೆ ಕೂಡ ನಡೆಸಲಾಗುವುದು ಎಂದು ಸಚಿವರು ಸಭೆಗೆ ಮಾಹಿತಿ ನೀಡಿದರು.  

ಪರ್ಮಿಟ್ ಕೊಟ್ಟು ಬಿಡಿ: 

‘ಮಲೆನಾಡಿನ ಪ್ರತೀ ಹಳ್ಳಿಯ ದಿನಸಿ ಅಂಗಡಿ, ಮನೆ ಮನೆಗಳಲ್ಲೂ ಮದ್ಯ ಸಿಗುತ್ತಿದೆ. ನಾವು ಧ್ವನಿ ಎತ್ತಿದಾಗ ದಿನಸಿ ಅವರನ್ನು ಹಿಡಿಯೋದು ಇವರನ್ನು ಹಿಡಿಯೋದು ಎಂದು ಪೊಲೀಸರು ನಾಟಕ ಮಾಡುವುದು. ನಂತರ ಮಾಮೂಲಿ ಫಿಕ್ಸ್ ಮಾಡಿಕೊಳ್ಳುವುದು ಬೇಡ. ಎಲ್ಲ ಅಂಗಡಿ, ಮನೆಗಳಲ್ಲೂ ಚಿಲ್ಲರೆಯಾಗಿ ಮದ್ಯ ಮಾರಾಟ ಮಾಡಬಹುದು ಎಂದು ನಿಯಮ ರೂಪಿಸಿ ಲೈಸೆನ್ಸ್ ಕೊಟ್ಟು ಬಿಡಿ’ ಎಂದು ಶಾಸಕ ಆರಗ ಜ್ಞಾನೇಂದ್ರ ಅಧಿಕಾರಿಗಳಿಗೆ ಛೇಡಿಸಿದರು. 

‘ಕುಡಿತದ ಚಟದಿಂದ 35 ವರ್ಷದ ಯುವಕರು 75 ವರ್ಷದವಂತೆ ಆಗಿದ್ದಾರೆ. ಅಡಿಕೆ ಮರ ಹತ್ತಲು ಆಗುತ್ತಿಲ್ಲ. ಕುಡಿದು ಕುಡಿದು ಸಾಯುತ್ತಾರೆ. ಮದ್ಯ ಮನೆ ಮನೆಯಲ್ಲೂ ಸಿಗುತ್ತಿದೆ. ಚಿಲ್ಲರೆ ಮಾರಾಟಗಾರರ ಮೇಲೆ ಮಾತ್ರವಲ್ಲ. ಮದ್ಯ ಯಾವ ಅಂಗಡಿಯಿಂದ ಪೂರೈಕೆ ಆಗಿದೆಯೋ ಅವರ ಮೇಲೂ ಕ್ರಮಕ್ಕೆ ಮುಂದಾಗಿ. ಇಲ್ಲದಿದ್ದರೆ ನಿಯಂತ್ರಣಕ್ಕೆ ಬರಲ್ಲ’ ಎಂದರು. 

ಆಗ ಮಧ್ಯಪ್ರವೇಶಿಸಿದ ಜಿಲ್ಲಾಧಿಕಾರಿ ಗುರುದತ್ತ ಹೆಗಡೆ, ‘ಮದ್ಯದ ಬ್ಯಾಚ್ ಸಂಖ್ಯೆ ಆಧರಿಸಿ ಇನ್ನು ಮುಂದೆ ಜಿಲ್ಲಾಡಳಿತದಿಂದ ₹50 ಸಾವಿರ ದಂಡ ಹಾಕುತ್ತೇನೆ. ಮತ್ತೆ ಪುನರಾವರ್ತಿಸಿದರೆ ಅವರ ಲೈಸೆನ್ಸ್ ರದ್ದು ಮಾಡುತ್ತೇನೆ’ ಎಂದು ಸಭೆಗೆ ತಿಳಿಸಿದರು. 

‘ಪೊಲೀಸರೇ ಕೈಜೋಡಿಸಿದರೆ ಗತಿ ಏನು?’

‘ಶಿವಮೊಗ್ಗದಲ್ಲಿ ಬೀದಿ ಬೀದಿಯಲ್ಲೂ ಗಾಂಜಾ ಸಿಗುತ್ತಿದೆ. ಅಕ್ರಮ ಚಟುವಟಿಕೆಗಳ ಹೆಚ್ಚಳದಲ್ಲಿ ಪೊಲೀಸರ ಪಾತ್ರವೂ ಇದೆ. ಪೊಲೀಸರೇ ಅಪರಾಧಿಗಳ ಜೊತೆ ಕೈ ಜೋಡಿಸಿದರೆ ಗತಿ ಏನು?’ ಎಂದು ಆತಂಕ ವ್ಯಕ್ತಪಡಿಸಿದ ಶಾಸಕ ಎಸ್.ಎನ್.ಚನ್ನಬಸಪ್ಪ ‘ಗಾಂಜಾ ಮಾರಾಟದ ಹಿಂದೆ ವ್ಯವಸ್ಥಿತ ಜಾಲವೇ ಇದೆ. ವರ್ಷದಿಂದ ವರ್ಷಕ್ಕೆ ಪ್ರಕರಣಗಳು ಹೆಚ್ಚಳವಾದರೆ ಪೊಲೀಸರು ಏಕೆ ಬೇಕು. ಸಾರ್ವಜನಿಕರಿಗೆ ಬಿಡಿ. ಇಲ್ಲವೇ ಪೊಲೀಸ್ ಅಧಿಕಾರಿಗಳ ಮೇಲೂ ಕ್ರಮ ಕೈಗೊಳ್ಳಿ’ ಎಂದು ಆಗ್ರಹಿಸಿದರು.  ‘ಗಾಂಜಾ ವ್ಯಸನಿ ಮಗಳಿಂದ ಜೀವ ಭಯದ ಕಾರಣಕ್ಕೆ ತತ್ತರಿಸಿರುವ ತಂದೆಯೊಬ್ಬರು ರಕ್ಷಣೆಗೆ ಪೊಲೀಸರ ಮೊರೆ ಹೋಗಿದ್ದಾರೆ. ತಂದೆಯೇ ಮಗಳ ವಿರುದ್ಧ ದೂರು ಕೊಡುವಂತಹ ಅಪಮಾನಕಾರಿ ಪರಿಸ್ಥಿತಿ ಇಲ್ಲಿ ಉದ್ಭವವಾಗಿದೆ’ ಎಂದು ಬೇಸರ ವ್ಯಕ್ತಪಡಿಸಿದರು.  ‘ಗಾಂಜಾ ಮಾರಾಟದ ವಿರುದ್ಧ ಯಾರಾದರೂ ದೂರು ಕೊಟ್ಟರೆ ಕೆಲವೇ ಸೆಕೆಂಡ್‌ಗಳಲ್ಲಿ ಆರೋಪಿಗೆ ಮಾಹಿತಿ ಹೋಗುತ್ತದೆ. ದೂರು ಕೊಟ್ಟವನ ಮನೆಗೆ ನುಗ್ಗಿ ಹೂವಿನ ಕುಂಡ ಕಿಟಕಿ ಗಾಜು ಒಡೆದು ಬೆದರಿಸುವ ಕೆಲಸ ಅವನು ಮಾಡುತ್ತಾನೆ. ದೂರು ಕೊಡಲು ಭಯದ ವಾತಾವರಣ ಇಲ್ಲಿದೆ. ಕೃಷಿ ನಗರ ಬಸವನಗುಡಿ ಗಾಂಧಿನಗರ ಟಿಪ್ಪು ನಗರ ಹೀಗೆ ಎಲ್ಲ ಕಡೆಯೂ ಗಾಂಜಾ ಸಿಗುತ್ತಿದೆ. ಶಿವಮೊಗ್ಗ ನಗರವನ್ನು ಎಲ್ಲಿಗೆ ತಂದಿದ್ದೇವೆ’ ಎಂಬುದಾಗಿ ಆಕ್ರೋಶ ವ್ಯಕ್ತಪಡಿಸಿದರು.