ಬೆಳೆಯುವ ಸಿರಿ ಮೊಳಕೆಯಲಿ ಎಂಬಂತೆ ಬಾಲ್ಯದಿಂದಲೂ ಯೋಗ ಶಿಕ್ಷಣದ ಬಗ್ಗೆ ಆಸಕ್ತಿ ಹೊಂದಿ ಗುರುವಿನ ಮಾರ್ಗದರ್ಶನದಲ್ಲಿ ವಿದ್ಯಾಭ್ಯಾಸದ ಜತೆಗೆ ಯೋಗ ಶಿಕ್ಷಣವನ್ನು ಕರಗತ ಮಾಡಿಕೊಂಡಿರುವ ಬಾಲಕನ ಪ್ರತಿಭೆ ಅದ್ಭುತ.
ಕಲಿಯುವ ಮನಸ್ಸು ಇದ್ದರೆ, ವಯಸ್ಸು ಅಡ್ಡಿಯಾಗದು ಎಂಬುದಕ್ಕೆ ಈ ಬಾಲಕ ಉದಾಹರಣೆಯಾಗಿದ್ದಾನೆ. ಮಧುಗಿರಿ ತಾಲ್ಲೂಕು ದೊಡ್ಡೇರಿ ಹೋಬಳಿಯ ಸೋದೇನಹಳ್ಳಿ ಗ್ರಾಮದ ಸರ್ಕಾರಿ ಹಿರಿಯ ಪ್ರಾಥಮಿಕ ಪಾಠಶಾಲೆಯ 5ನೇ ತರಗತಿಯಲ್ಲಿ ವಿದ್ಯಾಭ್ಯಾಸ ಮಾಡುತ್ತಿರುವ ರಾಜಶೇಖರ್, ಅದೇ ಗ್ರಾಮದ ನಾಗರಾಜು ಎಂಬುವವರ ಪುತ್ರ. ಈತ ಯೋಗ ಶಿಕ್ಷಣದ ಜತೆಗೆ ವಿದ್ಯಾಭ್ಯಾಸದಲ್ಲಿ ಮುಂದಿದ್ದಾನೆ.
ಈ ಬಾಲಕನನ್ನು ಕಂಡರೆ ಶಾಲೆಯ ಶಿಕ್ಷಕರು, ಎಸ್ಡಿಎಂಸಿ ಹಾಗೂ ಗ್ರಾಮಸ್ಥರಿಗೆ ಅಚ್ಚುಮೆಚ್ಚು. ಈತ ಕಲಿತಿರುವ ಯೋಗ ಶಿಕ್ಷಣದಲ್ಲಿ ಕ್ಲಿಷ್ಟಕರವಾದ ಆಸನಗಳಾದ ವ್ಯಕ್ಷಾಸನ, ಸರ್ವಂಗಾಸನ, ಶಿರ್ಷಾಸನ, ಚಕ್ರಾಸನ, ಧನುರಾಸನ, ಕುಕ್ಕುಟಾಸನ, ಗೋಮುಕಾಸನ, ವೀರಭದ್ರಾಸನ, ಅದೋಮುಖ ಟಿಟ್ಟಿಭಾಸನ, ಪಿಂಛ ವೃಶ್ಚಿಕಾಸನ, ಭುಜಪೀಡಾಸನ, ಯೋಗ ನಿದ್ರಾಸನ, ಮೈಯೂರಾಸನ, ಬದ್ಧ ಪದ್ಮಾಸನ, ಶಿರ್ಷಾ ಪದ್ಮಾಸನ, ಸುತ್ತಾ ಉಪಾವಿಷ್ಟ ಕೋನಾಸನ, ಸುಪ್ತ ವೀರಾಸನ, ಈ ರೀತಿಯ ಕ್ಲಿಷ್ಟಕರವಾದ ನೂರಾರು ಯೋಗಾಸನಗಳನ್ನು ಲೀಲಾಜಾಲವಾಗಿ ಮಾಡುತ್ತಾನೆ. ಇದರ ಜತೆಗೆ ಚಕ್ರಾಸನದಲ್ಲಿ 100 ಮೀಟರ್ನಷ್ಟು ದೂರ ಕ್ರಮಿಸುತ್ತಾನೆ.
ನನ್ನ ನೆಚ್ಚಿನ ಶಾಲೆಯ ಶಿಕ್ಷಕ ಹಾಗೂ ಯೋಗ ಗುರು ಎಚ್.ಆರ್.ಶಶಿಕುಮಾರ್ ಅವರ ಪ್ರೇರಣೆಯಿಂದ ನಾನು ಯೋಗಾಸನಗಳನ್ನು ಕಲಿಯಲು ಸಾಧ್ಯವಾಯಿತು ಎಂದು ವಿದ್ಯಾರ್ಥಿ ರಾಜಶೇಖರ್ ‘ಪ್ರಜಾವಾಣಿ’ಗೆ ತಿಳಿಸಿದರು. ಪ್ರತಿ ಶನಿವಾರ ಶಾಲೆಯಲ್ಲಿ ಯೋಗಶಿಕ್ಷಣವನ್ನು ಎಲ್ಲ ವಿದ್ಯಾರ್ಥಿಗಳಿಗೂ ಅಭ್ಯಾಸ ಮಾಡಿಸುತ್ತಿರುವುದರಿಂದ ಇದನ್ನು ಮುಂದುವರಿಸಿಕೊಂಡು ಹೋಗುತ್ತಿದ್ದೇವೆ. ಇಂತಹ ಯೋಗ ಶಿಕ್ಷಣವನ್ನು ನಮ್ಮ ಅಕ್ಕಪಕ್ಕದ ಶಾಲೆಗಳಲ್ಲಿ ಅಭ್ಯಾಸ ಮಾಡಿಸಬೇಕು ಎನ್ನುವುದು ವಿದ್ಯಾರ್ಥಿಗಳ ಅನಿಸಿಕೆಯಾಗಿದೆ.
Lok Sabha Elections Results 2024 |ನರೇಂದ್ರ ಮೋದಿ ಅವರ 'ವಿಕಸಿತ ಭಾರತ' ಅಥವಾ ರಾಹುಲ್ ಗಾಂಧಿ ಅವರ ಇಂಡಿಯಾ ಐಕ್ಯ ಭಾರತ? ಜಗತ್ತಿನ ಅತಿದೊಡ್ಡ ಪ್ರಜಾಪ್ರಭುತ್ವದ 18ನೇ ಲೋಕಸಭೆಗೆ ನಡೆದ ಚುನಾವಣೆ ಫಲಿತಾಂಶದ ಕ್ಷಣ ಕ್ಷಣದ ಮಾಹಿತಿ, ವಿಶ್ವಾಸಾರ್ಹ ವಿಶ್ಲೇಷಣೆ, ಅಂಕಿ ಅಂಶಗಳಿಗಾಗಿ ಪ್ರಜಾವಾಣಿ ನೋಡಿ. ಇದರ ಜೊತಗೆ, ಆಂಧ್ರಪ್ರದೇಶ ಮತ್ತು ಒಡಿಶಾ ವಿಧಾನಸಭೆ ಚುನಾವಣೆಯ ಫಲಿತಾಂಶವೂ ಇಲ್ಲೇ ಲಭ್ಯ. ಪ್ರಜಾವಾಣಿಯನ್ನು ವಾಟ್ಸ್ಆ್ಯಪ್, ಎಕ್ಸ್, ಫೇಸ್ಬುಕ್ ಮತ್ತು ಇನ್ಸ್ಟಾಗ್ರಾಂನಲ್ಲಿ ಫಾಲೋ ಮಾಡಲು ಮರೆಯದಿರಿ.