ತಿಪಟೂರು | ಜಕ್ಕನಹಳ್ಳಿ ಶಾಲೆ ದಾಖಲಾತಿ ಜಿಗಿತ

ತಿಪಟೂರು: ತಾಲ್ಲೂಕಿನ ಜಕ್ಕನಹಳ್ಳಿ ಸರ್ಕಾರಿ ಹಿರಿಯ ಪ್ರಾಥಮಿಕ ಶಾಲೆಯಲ್ಲಿ ದೈಹಿಕ ಶಿಕ್ಷಣ ಶಿಕ್ಷಕರಿಲ್ಲದಿದ್ದರೂ ಸತತ 14 ವರ್ಷಗಳಿಂದ ಕ್ರೀಡೆಯಲ್ಲಿ ಸಾಧನೆ ಮಾಡುತ್ತ, 2018ರಿಂದ ‘ಮಕ್ಕಳ ಮನೆ’  ಶೀರ್ಷಿಕೆಯಡಿ ಎಲ್‌ಕೆಜಿ, ಯುಕೆಜಿ ಆರಂಭಿಸಿ ದಾಖಲಾತಿ ಹೆಚ್ಚಿಸಿಕೊಂಡಿದೆ. 

ಕಿಬ್ಬನಹಳ್ಳಿ ಹೋಬಳಿಯ ಬಿಳಿಗೆರೆ ಗ್ರಾ.ಪಂ ವ್ಯಾಪ್ತಿಯ ಈ ಶಾಲೆಯಲ್ಲಿ ಹಳೆ ವಿದ್ಯಾರ್ಥಿಗಳ ಸಹಕಾರದಲ್ಲಿ 2019ರಲ್ಲಿ ಮಕ್ಕಳಿಗಾಗಿ ವಿಜ್ಞಾನ ಪ್ರಯೋಗಾಲಯ, ಸ್ಮಾರ್ಟ್ ಬೋರ್ಡ್ ಹಾಗೂ ಕಂಪ್ಯೂಟರ್‌ಗಳನ್ನು ನೀಡಲಾಗಿದೆ. ಬಿಳಿಗೆರೆ ಗ್ರಾಮ ಪಂಚಾಯಿತಿಯಿಂದ ಸುಸಜ್ಜಿತ ಆಟದ ಮೈದಾನ, ಗ್ರಾಮೀಣ ಕೂಟ ಆರ್ಥಿಕ ಸಂಸ್ಥೆಯಿಂದ ಎಂಟು ಡೆಸ್ಕ್‌ಗಳನ್ನು ನೀಡಲಾಗಿದೆ.

2018ರಿಂದ ಮಕ್ಕಳ ಮನೆ ತರಗತಿಗಳಿಂದ ಒಂದನೇ ತರಗತಿ ದಾಖಲಾಗುವ ಮೂಲಕ ಪ್ರಸಕ್ತ ಸಾಲಿನಲ್ಲಿ ಒಂದರಿಂದ ಏಳನೇ ತರಗತಿಗೆ 70 ವಿದ್ಯಾರ್ಥಿಗಳು, ಮಕ್ಕಳ ಮನೆ (ಎಲ್‌ಕೆಜಿ, ಯುಕೆಜಿ)ಯಿಂದ 20 ವಿದ್ಯಾರ್ಥಿಗಳು ದಾಖಲಾಗಿದ್ದಾರೆ. ಕನ್ನಡ ಮಾದರಿ ಶಾಲೆಯಾದರೂ ಮಕ್ಕಳು ಇಂಗ್ಲಿಷ್‌ನಲ್ಲಿ ಮಾತನಾಡುವ, ಕಲಿಯುವ ಕೌಶಲವನ್ನು ಶಿಕ್ಷಕರು ಕಲಿಸುತ್ತಿದ್ದಾರೆ.

2018ರಲ್ಲಿ ಇಲ್ಲಿನ ಹಿರಿಯ ವಿದ್ಯಾರ್ಥಿಗಳು ಶಾಲೆಗೆ ಬರಲು ಮಕ್ಕಳಿಗೆ ಅನುಕೂಲವಾಗುವಂತೆ ಆಟೊ ವ್ಯವಸ್ಥೆ ಮಾಡಿದ್ದಾರೆ. ಜಕ್ಕನಹಳ್ಳಿ, ತಿಗಡನಹಳ್ಳಿ, ಚೌಡ್ಲಾಪುರ ಗ್ರಾಮಗಳಿಂದ ಬರುವ ಮಕ್ಕಳಿಗೆ ಪೋಷಕರ ಸಹಕಾರದಲ್ಲಿ ವಾಹನ ವ್ಯವಸ್ಥೆ ಕೈಗೊಳ್ಳಲಾಗಿದೆ.

ಕಳೆದ ಸಾಲಿನಲ್ಲಿ ಹೋಬಳಿ ಮಟ್ಟದ ಉತ್ತಮ ಶಾಲೆಯೆಂದು ಗುರುತಿಸಿ, ಜಿಲ್ಲಾ ಮಟ್ಟದಲ್ಲಿ ಉತ್ತಮ ಹಿರಿಯ ವಿದ್ಯಾರ್ಥಿ ಸಂಘವೆಂದು ಪ್ರಶಸ್ತಿ ಪಡೆದುಕೊಂಡಿದೆ.

1948ರಲ್ಲಿ ಪ್ರಾರಂಭವಾಗಿರುವ ಜಕ್ಕನಹಳ್ಳಿ ಶಾಲೆಯೊಳಗೆ ಪ್ರವೇಶ ಮಾಡುವಾಗ ಶಾಲೆ ಕಟ್ಟಡದ ಗೋಡೆಗಳಿಗೆ ಹಚ್ಚಿರುವ ಕೆಂಪು ಮತ್ತು ಹಳದಿ ಬಣ್ಣ ಆಕರ್ಷಿಸುತ್ತದೆ. ಇಲ್ಲಿ ಕನ್ನಡ ಮಾಧ್ಯಮದಲ್ಲಿ ಭೋದನೆ ಮಾಡಲಾಗುತ್ತಿದ್ದು, ಇಂಗ್ಲಿಷ್‌ನಲ್ಲಿ ಬೋಧನೆ ಮಾಡಬೇಕು ಎಂದು ಪೋಷಕರ ಹಾಗೂ ಗ್ರಾಮಸ್ಥರು ಒತ್ತಾಯಿಸಿದ್ದಾರೆ.