ತಿಪಟೂರು | ಕೆವಿಕೆ ಸ್ಥಳಾಂತರದ ಸದ್ದು: ಸ್ಥಳೀಯ ರೈತರಿಂದ ತೀವ್ರ ವಿರೋಧ

ತಿಪಟೂರು: ತಾಲ್ಲೂಕಿನ ಕೊನೇಹಳ್ಳಿ ಕೃಷಿ ವಿಜ್ಞಾನ ಕೇಂದ್ರ ಸ್ಥಳಾಂತರ ನಿರ್ಧಾರವನ್ನು ಸರ್ಕಾರ ಕೈಗೊಂಡಿದೆ ಎಂಬ ಸುದ್ದಿ ತಾಲ್ಲೂಕಿನಲ್ಲಿ ಹರಿದಾಡುತ್ತಿದ್ದು, ರೈತರಿಂದ ತೀವ್ರ ವಿರೋಧ ವ್ಯಕ್ತವಾಗಿದೆ.

ಈ ಕೇಂದ್ರವು ಹಲವು ವರ್ಷಗಳಿಂದ ಸ್ಥಳೀಯ ರೈತರಿಗೆ ನೆರವು ನೀಡುತ್ತಿದೆ. ಬೆಳೆ ಸಂಶೋಧನೆ, ನವೀನ ತಂತ್ರಜ್ಞಾನಗಳ ಪರಿಚಯ, ನೈಪುಣ್ಯ ತರಬೇತಿ, ಬಿತ್ತನೆ ಬೀಜ ವಿತರಣೆ, ಮಣ್ಣು ತಪಾಸಣೆ ಪರೀಕ್ಷೆ, ಹವಾಮಾನ ಮಾಹಿತಿ, ರೋಗ ನಿರ್ವಹಣೆ ತಂತ್ರ, ಕೃಷಿ ಪರಿಕರ ಬಳಕೆಯ ತರಬೇತಿ ನೀಡುತ್ತಿದೆ. ಇದು ಕೇವಲ ತರಬೇತಿ ಕೇಂದ್ರವಾಗದೆ, ಕೃಷಿಯ ನಾಡು- ನುಡಿಗಳ ಜ್ಞಾನ ಶಾಖೆಯಂತಿದೆ.

ಬೆಂಗಳೂರಿನ ಗಾಂಧಿ ಕೃಷಿ ವಿಜ್ಞಾನ ಕೇಂದ್ರದಡಿ (ಜಿಕೆವಿಕೆ) ಕೊನೇಹಳ್ಳಿಯಲ್ಲಿ 1999ರಲ್ಲಿ ಕ್ಷೇತ್ರ ಪ್ರಯೋಗಶಾಲೆ ಎಂದು ಪ್ರಾರಂಭವಾದ ಕೇಂದ್ರವು 2004ರಲ್ಲಿ ಕೃಷಿ ವಿಜ್ಞಾನ ಕೇಂದ್ರ ಬಿದರೆಗುಡಿ ಕಾವಲು, ಕೃಷಿ ಸಂಶೋಧನಾ ಕೇಂದ್ರ ಮೂಡಲಕಾವಲು ಕೊನೇಹಳ್ಳಿ, ಜಾನುವಾರು ಸಂಶೋಧನಾ ಕೇಂದ್ರ ಎಂದು ವಿಭಾಗಗೊಂಡು ಕಾರ್ಯಾರಂಭ ನಡೆಯುತ್ತಿತ್ತು.

2004ರಲ್ಲಿ ಪ್ರಾರಂಭಗೊಂಡ ಬೀದರ್ ಪಶು ಹಾಗೂ ಮೀನುಗಾರಿಕೆ ವಿಶ್ವವಿದ್ಯಾಲಯಕ್ಕೆ ಕೊನೇಹಳ್ಳಿ ಕೇಂದ್ರದ ಆಸ್ತಿ ವರ್ಗಾವಣೆ, ಆಡಳಿತಾತ್ಮಕ ಬದಲಾವಣೆ ಹಿನ್ನಲೆಯಲ್ಲಿ ಕೃಷಿ ವಿಜ್ಞಾನ ಕೇಂದ್ರ, ಕೃಷಿ ಸಂಶೋಧನಾ ಕೇಂದ್ರಗಳು ತನ್ನ ಆಸ್ತಿ, ಆಸ್ವಿತ್ವ ಕಳೆದುಕೊಂಡಿತು. 2023ರಲ್ಲಿ ಸಂಪೂರ್ಣವಾಗಿ ಸ್ಥಳಾಂತರಗೊಂಡಿತು. 135 ಎಕರೆ ಪ್ರದೇಶದಲ್ಲಿನ ರಾಗಿ ತೊಗರಿ, ಸೋಯಾಬೀನ್, ಹುಚ್ಚೆಳ್ಳು, ಉದ್ದು, ಹೆಬ್ಬಾಳ ಅವರೆ ಬಿತ್ತನೆ ಬೀಜಗಳ ಸಂಶೋಧನೆ ಸ್ಥಗಿತಗೊಂಡಿತು. ಇಲ್ಲಿದ್ದ ವಿಶೇಷ ತಳಿಯ ಜಾನುವಾರುಗಳನ್ನು ಹಾಸನದ ಮಡೆನೂರು, ಮೈಸೂರಿನ ನಾಗೇನಹಳ್ಳಿ, ಮಂಡ್ಯದ ವಿಸಿ ಫಾರಂಗೆ ಸ್ಥಳಾಂತರ ಮಾಡಲಾಗಿದೆ.

ಸದ್ಯ ಕೆವಿಕೆಯ 50 ಎಕರೆ ಪ್ರದೇಶದಲ್ಲಿ ಹಲವು ರೀತಿಯ ಸಂಶೋಧನಾ ಸಸ್ಯ ಪ್ರಭೇದಗಳಿದ್ದು, ಆಸ್ತಿ ವರ್ಗಾವಣೆಯಾಗಿರುವುದರಿಂದ ಕೊನೇಹಳ್ಳಿ ಕೇಂದ್ರವು ಸ್ಥಗಿತಗೊಂಡು ಬೇರೆಡೆ ಸ್ಥಳಾಂತರವಾಗುವ ಭೀತಿ ಎದುರಾಗಿದೆ. ಕೇಂದ್ರದ ಉಳಿವಿಗೆ ತಾಲ್ಲೂಕು ಆಡಳಿತ, ರಾಜಕೀಯ ನಾಯಕರು, ಜನಪ್ರತಿನಿಧಿಗಳು ಶ್ರಮಿಸಬೇಕು ಎನ್ನುತ್ತಾರೆ ರೈತರು.

ಸ್ಥಳಾಂತರಗೊಂಡಲ್ಲಿ ಕೋಟ್ಯಂತರ ರೂಪಾಯಿ ವೆಚ್ಚದಲ್ಲಿ ನಿರ್ಮಿಸಿರುವ ಬೃಹತ್ ಕಟ್ಟಡ, ಸಂಶೋಧನಾ ಕೇಂದ್ರಗಳು ನಾಶವಾಗುವ ಆತಂಕವೂ ಸ್ಥಳೀಯರಿಗಿದೆ.