ರಾಮಯ್ಯಗೆ ‘ಮಧುರಚೆನ್ನ’ ಪ್ರಶಸ್ತಿ ಪ್ರದಾನ

ತುಮಕೂರು: ಕನ್ನಡ ಜಾನಪದ ಪರಿಷತ್ ಜಿಲ್ಲಾ ಘಟಕದ ವತಿಯಿಂದ ಹಮ್ಮಿಕೊಂಡಿದ್ದ ಕಾರ್ಯಕ್ರಮದಲ್ಲಿ ‘ಮಧುರಚೆನ್ನ’ ಪ್ರಶಸ್ತಿಯನ್ನು ಕುಣಿಗಲ್‌ನ ಸೋಬಾನೆ ರಾಮಯ್ಯ ಅವರಿಗೆ ಪ್ರದಾನ ಮಾಡಲಾಯಿತು.

ಕೆ.ಸಿ.ಕಾಂತಪ್ಪ ದತ್ತಿನಿಧಿಯಿಂದ ₹5 ಸಾವಿರ ನಗದು, ಪ್ರಶಸ್ತಿ ಪತ್ರನೀಡಿ ಗೌರವಿಸಲಾಯಿತು.

ಕನ್ನಡ ಜಾನಪದ ಪರಿಷತ್ ರಾಜ್ಯ ಘಟಕದ ಅಧ್ಯಕ್ಷ ಡಾ.ಎಸ್.ಬಾಲಾಜಿ ಹಲಸಂಗಿ ಮಾತನಾಡಿ, ‘ಗೆಳೆಯರಲ್ಲಿ ಮಧುರಚೆನ್ನರದು ಅದ್ವಿತೀಯ ಕೊಡುಗೆ. ಕನ್ನಡದ ಮೊದಲ ಜನಪದ ಗೀತ ಸಂಕಲನ ‘ಗರತಿಯ ಹಾಡು’ ಕನ್ನಡ ಕಾವ್ಯ ಲೋಕದಲ್ಲಿ ಹೊಸ ಸಂಚಲನ ಮೂಡಿಸಿದೆ. ಇವರ ಹೆಸರಿನಲ್ಲಿ ರಾಜ್ಯ ಪ್ರಶಸ್ತಿ ನೀಡುವುದರ ಮೂಲಕ ಪರಿಷತ್ ಹೊಸ ಪರಂಪರೆಯನ್ನು ಹುಟ್ಟುಹಾಕಿದೆ’ ಎಂದರು.

ರಾಮನಗರ ಜಿಲ್ಲಾ ಕನ್ನಡ ಜಾನಪದ ಪರಿಷತ್ತಿನ ಪ್ರಧಾನ ಕಾರ್ಯದರ್ಶಿ ಕೆ.ಸಿ.ಕಾಂತಪ್ಪ, ‘ಕನ್ನಡ ನಾಡಿನಲ್ಲಿ ಎಲೆಮರೆ ಕಾಯಿಯಂತೆ ಸೇವೆ ಸಲ್ಲಿಸುತ್ತಿರುವ ಜನಪದ ಕಲಾವಿದರನ್ನು ಗುರುತಿಸಿ ಗೌರವಿಸುತ್ತಿರುವುದು ಹೆಮ್ಮೆಯ ವಿಷಯ’ ಎಂದು ಹೇಳಿದರು.

ಪ್ರಶಸ್ತಿ ಸ್ವೀಕರಿಸಿ ಮಾತನಾಡಿದ ಸೋಬಾನೆ ರಾಮಯ್ಯ, ‘ಸರ್ಕಾರ ಗಮನಿಸದ ನನ್ನಂತಹವರನ್ನು ಡಾ.ಎಸ್.ಬಾಲಾಜಿ ಅವರು ಕನ್ನಡ ಜಾನಪದ ಪರಿಷತ್ ಮೂಲಕ ಗುರುತಿಸಿ ಗೌರವಿಸುತ್ತಿರುವುದು ಸಂತೋಷ ತಂದಿದೆ. ಇಂದಿನ ಪೀಳಿಗೆಯ ಮಕ್ಕಳು ಜನಪದದ ಬಗ್ಗೆ ಆಸಕ್ತಿಯನ್ನು ತೋರುತ್ತಿಲ್ಲ’ ಎಂದು ತಿಳಿಸಿದರು.

ಅಧ್ಯಕ್ಷತೆ ವಹಿಸಿದ್ದ ಸಿದ್ಧಾರ್ಥ ಪ್ರಥಮ ದರ್ಜೆ ಕಾಲೇಜು ಪ್ರಾಂಶುಪಾಲ ಡಾ.ಕೆ.ಎಸ್.ಕುಮಾರ್, ‘ಜನಪದ ಪರಂಪರೆಯನ್ನು ಉಳಿಸುವ ಕಾರ್ಯದಲ್ಲಿ ಪರಿಷತ್ ಉತ್ತಮ ಕಾರ್ಯನಿರ್ವಹಿಸುತ್ತಿದೆ’ ಎಂದರು.

ಕನ್ನಡ ಜಾನಪದ ಪರಿಷತ್ ಜಿಲ್ಲಾ ಘಟಕದ ಅಧ್ಯಕ್ಷ ಎಲ್.ಶ್ರೀನಿವಾಸಮೂರ್ತಿ ಪ್ರಾಸ್ತಾವಿಕವಾಗಿ ಮಾತನಾಡಿದರು. ಡಾ.ವಿಜಯಭಾಸ್ಕರ್, ಪ್ರೊ.ಸಿ.ನಂದೀಶ, ಪ್ರೊ.ರಮೇಶ ಮಣ್ಣೆ, ಪ್ರೊ.ಎಸ್.ಎಸ್.ಆರಾಧ್ಯ, ಡಾ.ಡಿ.ಆರ್.ಅನಂತಕುಮಾರ್, ಡಾ.ಎಂ.ಆರ್.ರಂಗಸ್ವಾಮಿ, ಮದನ್ ಮೋಹನ್, ಸೈಯದ್ ಬಾಬು, ಬಿ.ಆರ್.ರಾಧಿಕ, ಆಶಾ, ಶಿವರಂಗಯ್ಯ ಉಪಸ್ಥಿತರಿದ್ದರು.