ತುಮಕೂರು: ಕಡಿಮೆಯಾಗದ ತರಕಾರಿ ಬೆಲೆ

ತುಮಕೂರು:‌‌ ತರಕಾರಿ ಬೆಲೆ ಸದ್ಯಕ್ಕೆ ಇಳಿಕೆಯಾಗುವಂತೆ ಕಾಣುತ್ತಿಲ್ಲ. ಕೊತ್ತಂಬರಿ ಸೊಪ್ಪು ಮತ್ತಷ್ಟು ದುಬಾರಿಯಾಗಿದ್ದರೆ, ಹಣ್ಣುಗಳು ಅದೇ ದಾರಿಯಲ್ಲಿ ಸಾಗಿವೆ. ಕೋಳಿ ಮಾಂಸವೂ ಏರಿಕೆಯಾಗಿದೆ.

ಕಳೆದ ಒಂದು ತಿಂಗಳಿಂದ ತರಕಾರಿ ದರ ದುಬಾರಿ ಸ್ಥಿತಿಯಲ್ಲೇ ಮುಂದುವರಿದಿದ್ದು, ಕಡಿಮೆಯಾಗುವ ಲಕ್ಷಣಗಳು ಗೋಚರಿಸುತ್ತಿಲ್ಲ. ಅಂತರಸನಹಳ್ಳಿ ಮಾರುಕಟ್ಟೆಯಲ್ಲಿ ಬಹುತೇಕ ತರಕಾರಿಗಳ ಬೆಲೆ ಕೆ.ಜಿ ₹50ರ ಆಸುಪಾಸಿನಲ್ಲಿದೆ. ಆದರೆ ಚಿಲ್ಲರೆಯಾಗಿ ₹80–100ರ ವರೆಗೂ ಮಾರಾಟ ಮಾಡಲಾಗುತ್ತಿದೆ.

ಈ ವಾರ ಬೆಂಡೆಕಾಯಿ, ಬದನೆಕಾಯಿ, ಎಲೆಕೋಸು, ಕ್ಯಾಪ್ಸಿಕಂ, ಶುಂಠಿ ಮತ್ತಷ್ಟು ದುಬಾರಿಯಾಗಿದೆ. ತೊಂಡೆಕಾಯಿ, ಮೂಲಂಗಿ, ಬೆಳ್ಳುಳ್ಳಿ ಅಲ್ಪ ಇಳಿಕೆಯಾಗಿದೆ. ಹೂ ಕೋಸು ಒಂದು ₹50ಕ್ಕೆ ತಲುಪಿದೆ. ಜತೆಗೆ ಟೊಮೆಟೊ ಸಹ ಏರಿಕೆಯತ್ತ ಮುಖ ಮಾಡಿದೆ.

ಕೊತ್ತಂಬರಿ ತುಟ್ಟಿ: ಗಗನಮುಖಿಯಾಗಿದ್ದ ಪಾಲಕ್ ಸೊಪ್ಪಿನ ಬೆಲೆ ಇಳಿಕೆಯತ್ತ ಸಾಗಿದ್ದರೆ, ಕೊತ್ತಂಬರಿ ಸೊಪ್ಪು ಆಕಾಶದತ್ತ ಮುಖ ಮಾಡಿದೆ. ಸಬ್ಬಕ್ಕಿ ಏರಿಕೆಯಾಗಿದ್ದರೆ, ಮೆಂತ್ಯ ಇಳಿಕೆಯಾಗಿದೆ. ಕೊತ್ತಂಬರಿ ಸೊಪ್ಪು ಕೆ.ಜಿ ₹70–80, ಸಬ್ಬಕ್ಕಿ ಕೆ.ಜಿ ₹50–60ಕ್ಕೆ ಏರಿದ್ದರೆ, ಮೆಂತ್ಯ ಸೊಪ್ಪು ಕೆ.ಜಿ ₹30–40, ಪಾಲಕ್ ಸೊಪ್ಪು (ಕಟ್ಟು) ₹50ಕ್ಕೆ ಇಳಿಕೆಯಾಗಿದೆ.

ಹಣ್ಣು: ಹಣ್ಣುಗಳ ಧಾರಣೆ ದುಬಾರಿ ಸ್ಥಿತಿಯಲ್ಲೇ ಮುಂದುವರಿದಿದೆ. ಪಪ್ಪಾಯ, ಸೀಬೆ ಮತ್ತೆ ಏರಿಕೆಯಾಗಿದ್ದರೆ, ಪೈನಾಪಲ್ ತುಸು ಕಡಿಮೆಯಾಗಿದೆ. ಉಳಿದಂತೆ ಯಥಾಸ್ಥಿತಿ ಕಾಯ್ದುಕೊಂಡಿವೆ.

ಅಡುಗೆ ಎಣ್ಣೆ: ಅಡುಗೆ ಎಣ್ಣೆಯಲ್ಲಿ ಹೆಚ್ಚಿನ ವ್ಯತ್ಯಾಸವಾಗಿಲ್ಲ. ಗೋಲ್ಡ್‌ವಿನ್ನರ್ ಕೆ.ಜಿ ₹150–152, ಪಾಮಾಯಿಲ್ ಕೆ.ಜಿ ₹118–120, ಕಡಲೆಕಾಯಿ ಎಣ್ಣೆ ಕೆ.ಜಿ ₹165–170ಕ್ಕೆ ಮಂಡಿಪೇಟೆ ಮಾರುಕಟ್ಟೆಯಲ್ಲಿ ಸಿಗುತ್ತಿದೆ.

ಬೇಳೆ ಧಾನ್ಯ: ಬೇಳೆ, ಧಾನ್ಯಗಳ ಧಾರಣೆ ತುಸು ಏರಿಳಿತ ಕಂಡಿದೆ. ಬಹುತೇಕ ಯಥಾಸ್ಥಿತಿ ಮುಂದುವರಿದಿದೆ.

ಮಸಾಲೆ ಪದಾರ್ಥ: ಮಸಾಲೆ ಪದಾರ್ಥಗಳ ಬೆಲೆಯಲ್ಲಿ ಹೆಚ್ಚಿನ ವ್ಯತ್ಯಾಸವಾಗಿಲ್ಲ. ಒಣಹಣ್ಣುಗಳು ತುಸು ಏರಿಕೆಯಾಗಿವೆ.

ದನಿಯ ಕೆ.ಜಿ ₹110–120, ಬ್ಯಾಡಗಿ ಮೆಣಸಿನಕಾಯಿ ಕೆ.ಜಿ ₹240–260, ಗೌರಿಬಿದನೂರು ಖಾರದ ಮೆಣಸಿನಕಾಯಿ ಕೆ.ಜಿ ₹195–200, ಬೆಲ್ಲ ಕೆ.ಜಿ ₹45–52, ಕಾಳುಮೆಣಸು ಕೆ.ಜಿ ₹740–760, ಜೀರಿಗೆ ಕೆ.ಜಿ ₹240–250, ಚಕ್ಕೆ ಕೆ.ಜಿ ₹250–250, ಲವಂಗ ಕೆ.ಜಿ ₹800–820, ಗುಣಮಟ್ಟದ ಗಸಗಸೆ ಕೆ.ಜಿ ₹1,500–1,600, ಏಲಕ್ಕಿ ಕೆ.ಜಿ ₹3,000–3,200, ಬಾದಾಮಿ ಕೆ.ಜಿ ₹760–800, ಗೋಡಂಬಿ ಕೆ.ಜಿ ₹850–950, ಒಣದ್ರಾಕ್ಷಿ ಕೆ.ಜಿ ₹420–450ಕ್ಕೆ ಮಂಡಿಪೇಟೆ ಮಾರುಕಟ್ಟೆಯಲ್ಲಿ ಮಾರಾಟವಾಗುತ್ತಿದೆ.

ಕೋಳಿ ಏರಿಕೆ: ಕಾರ್ತಿಕ ಮಾಸದಲ್ಲಿ ಕೋಳಿ ಮಾಂಸದ ಬೆಲೆ ಏರಿಳಿತ ಕಾಣುತ್ತಿದ್ದು, ಈ ವಾರ ಏರಿಕೆ ದಾಖಲಿಸಿದೆ. ಬ್ರಾಯ್ಲರ್ ಕೋಳಿ ಕೆ.ಜಿ ₹165, ರೆಡಿ ಚಿಕನ್ ಕೆ.ಜಿ ₹255, ಸ್ಕಿನ್‌ಲೆಸ್ ಕೆ.ಜಿ ₹280, ಫಾರಂ ಕೋಳಿ ಕೆ.ಜಿ ₹170ಕ್ಕೆ, ಮೊಟ್ಟೆ ಒಂದು ₹6.50ಕ್ಕೆ ಏರಿಕೆಯಾಗಿದೆ.

ಮೀನು ಅಗ್ಗ: ಮೀನು ದರ ಇಳಿಕೆಯತ್ತ ಸಾಗಿದ್ದು, ಅಂಜಲ್ ಸಾಕಷ್ಟು ಪ್ರಮಾಣದಲ್ಲಿ ಅಗ್ಗವಾಗಿದೆ. ಬಂಗುಡೆ ಕೆ.ಜಿ ₹250, ಬೊಳಿಂಜರ್ ಕೆ.ಜಿ ₹210, ಅಂಜಲ್ ಕೆ.ಜಿ ₹650, ಬಿಳಿಮಾಂಜಿ ಕೆ.ಜಿ 1,260, ಕಪ್ಪುಮಾಂಜಿ ₹710, ಇಂಡಿಯನ್ ಸಾಲ್ಮನ್ ₹850, ಸೀಗಡಿ ಕೆ.ಜಿ ₹500–800ಕ್ಕೆ ನಗರದ ಮತ್ಸ್ಯದರ್ಶಿನಿಯಲ್ಲಿ ಮಾರಾಟವಾಗುತ್ತಿದೆ.

ದರ ಪಟ್ಟಿ.....

ಹಣ್ಣು (ಬೆಲೆ ಕೆ.ಜಿ ₹)

ಸೇಬು;150–250

ದಾಳಿಂಬೆ;230

ಮೂಸಂಬಿ;100

ಕಿತ್ತಳೆ;70

ಸಪೋಟ;100

ಏಲಕ್ಕಿಬಾಳೆ;67

ಪಚ್ಚಬಾಳೆ;27

ಸೀಬೆ;90

ಪೈನಾಪಲ್;60

ಪಪ್ಪಾಯ;24

ಕರಬೂಜ;80

ಕಲ್ಲಂಗಡಿ;40

ದ್ರಾಕ್ಷಿ;150–300

ಡ್ರ್ಯಾಗನ್ ಫ್ರೂಟ್;140–200

ಸೀತಾಫಲ;90–100

ಧಾನ್ಯ (ಬೆಲೆ ಕೆ.ಜಿ ₹) (ಮಂಡಿಪೇಟೆ)

ತೊಗರಿ ಬೇಳೆ;90–105

ಕಡಲೆ ಬೇಳೆ;80–85

ಉದ್ದಿನ ಬೇಳೆ;110–120

ಹೆಸರು ಬೇಳೆ;105–110

ಕಡಲೆಕಾಳು;78–82

ಹೆಸರು ಕಾಳು;120–130

ಅಲಸಂದೆ;90–95

ಅವರೆಕಾಳು;100–110

ಹುರುಳಿಕಾಳು;45–50

ಹುರಿಗಡಲೆ;85–95

ಬಟಾಣಿ;120–130

ಕಡಲೆ ಬೀಜ;115–120

ಗೋಧಿ;40–45

ಸಕ್ಕರೆ;43–44

ತರಕಾರಿ (ಬೆಲೆ ಕೆ.ಜಿ ₹) (ಅಂತರಸನಹಳ್ಳಿ ಮಾರುಕಟ್ಟೆ)

ಬೀನ್ಸ್;50–60

ಕ್ಯಾರೇಟ್;50–60

ಬೀಟ್ರೂಟ್‌;40–50

ಈರುಳ್ಳಿ;30–35

ಬೆಳ್ಳುಳ್ಳಿ;80–100

ಟೊಮೆಟೊ;25–30

ಆಲೂಗಡ್ಡೆ;30–35

ಗಡ್ಡೆಕೋಸು;40–50

ಮೂಲಂಗಿ;30–40

ಬೆಂಡೆಕಾಯಿ;50–60

ಬದನೆಕಾಯಿ;40–50

ಎಲೆಕೋಸು;25–30

ಹೂಕೋಸು(1ಕ್ಕೆ);50

ತೊಂಡೆಕಾಯಿ;40–50

ಹಾಗಲಕಾಯಿ;40–50

ನುಗ್ಗೆಕಾಯಿ;100–120

ಮೆಣಸಿನಕಾಯಿ;50–60

ಕ್ಯಾಪ್ಸಿಕಂ;50–60

ಶುಂಠಿ;60–70

ಸೌತೆಕಾಯಿ 1ಕ್ಕೆ;8–10

ನಿಂಬೆಹಣ್ಣು 1ಕ್ಕೆ;3–4