ರವಿ ಪೂಜಾರಿ ವಿರುದ್ಧ ಉಡುಪಿಯಲ್ಲಿ 10 ಪ್ರಕರಣ

ಉಡುಪಿ: ಪಶ್ಚಿಮ ಆಫ್ರಿಕಾದ ಸೆನೆಗಲ್‌ನಲ್ಲಿ ಈಚೆಗೆ ಇಂಟರ್‌ಪೋಲ್‌ ಪೊಲೀಸರ ಬಲೆಗೆ ಬಿದ್ದಿರುವ ಭೂಗತ ಪಾತಕಿ ರವಿ ಪೂಜಾರಿ ವಿರುದ್ಧ ಉಡುಪಿ ಜಿಲ್ಲೆಯಲ್ಲಿ ಹಲವು ಪ್ರಕರಣಗಳು ದಾಖಲಾಗಿವೆ.

ಜಿಲ್ಲೆಯ ವಿವಿಧ ಪೊಲೀಸ್ ಠಾಣೆಗಳ ವ್ಯಾಪ್ತಿಯಲ್ಲಿ ಜೀವ ಬೆದರಿಕೆ ಸೇರಿದಂತೆ ಹಲವು ಆರೋಪಗಳಡಿ 10 ಪ್ರಕರಣಗಳು ದಾಖಲಾಗಿವೆ ಎಂದು ಉನ್ನತ ಪೊಲೀಸ್ ಮೂಲಗಳು ತಿಳಿಸಿವೆ.

ರವಿ ಪೂಜಾರಿ ಭೂಗತವಾಗಿದ್ದುಕೊಂಡರೂ ಉಡುಪಿ ಜಿಲ್ಲೆಯ ಮೇಲೆ ಪ್ರಭಾವ ಹೊಂದಿದ್ದ. ಉದ್ಯಮಿಗಳಿಗೆ ಹಣಕ್ಕಾಗಿ ಬೇಡಿಕೆ ಹಾಗೂ ಜೀವ ಬೆದರಿಕೆ ಹಾಕುವ ಮೂಲಕ ಆಗಾಗ ಸುದ್ದಿಯಾಗುತ್ತಿದ್ದ.

ಕೆಲವು ವರ್ಷಗಳ ಹಿಂದೆ ಮಲ್ಪೆ ಸಮೀಪದ ನೆರಗಿ ಬಳಿ ರವಿ ಪೂಜಾರಿ ಒಡೆತನಕ್ಕೆ ಸೇರಿದ್ದ ಮನೆ ಇತ್ತು. ಪ್ರಸ್ತುತ ಆ ಮನೆಯನ್ನು ಬೇರೆಯವರು ಖರೀದಿಸಿದ್ದಾರೆ.