ಉಡುಪಿಯಲ್ಲಿ ಸಾವಿರದ ಗಡಿಗಿಳಿದ ಸೋಂಕಿತರ ಪ್ರಮಾಣ

ಉಡುಪಿ: ಜಿಲ್ಲೆಯಲ್ಲಿ ಕೋವಿಡ್‌ ಸಕ್ರಿಯ ಪ್ರಕರಣಗಳ ಸಂಖ್ಯೆ 1,000ದ ಗಡಿಗೆ ಇಳಿಮುಖವಾಗಿದೆ. ಒಟ್ಟು ಪ್ರಕರಣಗಳು 21,650 ಇದ್ದರೂ, ಸೋಂಕಿತರ ಸಂಖ್ಯೆ ಇರುವುದು ಕೇವಲ 981. ದಿನದಿಂದ ದಿನಕ್ಕೆ ಜಿಲ್ಲೆಯಲ್ಲಿ ಸೋಂಕು ಕಡಿಮೆಯಾಗುತ್ತಿರುವುದು ಸಾರ್ವಜನಿಕರಲ್ಲಿ ನಿರಾಳಭಾವ ಮೂಡಿಸಿದೆ.

ಕಳೆದ 2 ವಾರಗಳಿಂದ ಸೋಂಕಿನ ಪ್ರಮಾಣ ಗಣನೀಯವಾಗಿ ತಗ್ಗುತ್ತಿದ್ದು, ಆಗಸ್ಟ್‌ನಲ್ಲಿ ಗರಿಷ್ಠ ಮಟ್ಟದಲ್ಲಿದ್ದ ಸೋಂಕಿನ ಪ್ರಮಾಣ ಈಗ ಕನಿಷ್ಠ ಮಟ್ಟಕ್ಕೆ ತಲುಪಿದೆ. ಜಿಲ್ಲೆಯಲ್ಲಿ ಪಾಸಿಟಿವಿಟಿ ದರವೂ ಶೇ 10ಕ್ಕಿಂತ ಕಡಿಮೆ ಇದೆ.

ಮಂಗಳವಾರ ಕೋವಿಡ್‌ನಿಂದ ಒಬ್ಬರು ಮೃತಪಟ್ಟಿದ್ದು, 85 ಮಂದಿಗೆ ಸೋಂಕು ದೃಢಪಟ್ಟಿದೆ. ಉಡುಪಿಯ 43, ಕುಂದಾಪುರದ 23, ಕಾರ್ಕಳದ 15, ಇತರೆ ಜಿಲ್ಲೆಗಳ ನಾಲ್ವರಿಗೆ ಸೋಂಕು ತಗುಲಿದೆ.

ಸೋಂಕಿತರಲ್ಲಿ 40 ಮಹಿಳೆಯರು, 45 ಪುರುಷರಿದ್ದು, ನಾಲ್ವರು ಕೋವಿಡ್ ಆಸ್ಪತ್ರೆಗಳಲ್ಲಿ, 81 ಮಂದಿ ಹೋಂ ಐಸೊಲೇಷನ್‌ನಲ್ಲಿದ್ದಾರೆ. ಮಂಗಳವಾರ 204 ಸೇರಿ 20,505 ಸೋಂಕಿತರು ಗುಣಮುಖರಾಗಿದ್ದಾರೆ. 180 ಸೋಂಕಿತರು ಮೃತಪಟ್ಟಿದ್ದಾರೆ.