ಉಡುಪಿ | ಗಗನಕ್ಕೇರಿದ ದಾಳಿಂಬೆ ಬೆಲೆ: ವರ್ಷಾರಂಭದಲ್ಲೇ ತರಕಾರಿ ತುಟ್ಟಿ

ಉಡುಪಿ: ಹೊಸ ವರ್ಷದ ಆರಂಭದಲ್ಲೇ ತರಕಾರಿ, ಹಣ್ಣು ಹಂಪಲುಗಳ ಬೆಲೆ ತುಟ್ಟಿಯಾಗಿ ಗ್ರಾಹಕರಲ್ಲಿ ನಿರಾಸೆ ಮೂಡಿಸಿದೆ.

ಕಳೆದ ಕೆಲವು ತಿಂಗಳುಗಳಿಂದ ಕೆ.ಜಿಗೆ ₹80ರಿಂದ ₹90ರ ಗಡಿಯಲ್ಲಿದ್ದ ತೊಂಡೆಕಾಯಿ ದರವು ₹140ಕ್ಕೆ ಏರಿಕೆಯಾಗಿ ಗ್ರಾಹಕರ ಜೇಬಿಗೆ ಹೊರೆಯಾಗಿದೆ.

ಸಗಟು ಮಾರುಕಟ್ಟೆಯಲ್ಲಿ ಆವಕ ಕಡಿಮೆಯಾಗಿರುವುದರಿಂದ ತೊಂಡೆಕಾಯಿ ದರ ಅಧಿಕವಾಗಿದೆ ಎಂದು ಮಾರಾಟಗಾರರು ಹೇಳುತ್ತಾರೆ.

ಸಾಮಾನ್ಯವಾಗಿ ಜನವರಿ ತಿಂಗಳಲ್ಲಿ ತೊಂಡೆಕಾಯಿ ದರ ಇಳಿಕೆಯಾಗುತ್ತದೆ. ಈ ಬಾರಿ ದಿಢೀರನೆ ಏರಿಕೆಯಾಗಿದೆ ಎನ್ನುತ್ತಾರೆ ಉಡುಪಿಯ ತರಕಾರಿ ಮಾರಾಟಗಾರ ಜಯಾನಂದ.

ಅಯ್ಯಪ್ಪ ಮಾಲಾಧಾರಣೆ ಋತು ಆರಂಭವಾಗುತ್ತಿದ್ದಂತೆ ತರಕಾರಿ ದರ ಸಾಮಾನ್ಯವಾಗಿ ಏರಿಕೆಯಾಗುತ್ತದೆ. ಜನವರಿ ಆರಂಭವಾಗುತ್ತಿದ್ದಂತೆ ಕೆಲವು ತರಕಾರಿಗಳ ದರ ಇಳಿಕೆಯಾಗುತ್ತಿತ್ತು. ಆದರೆ, ಈ ಬಾರಿ ಕೆಲ ತರಕಾರಿಗಳ ಬೆಲೆ ಗಗನಕ್ಕೇರಿದೆ ಎನ್ನುತ್ತಾರೆ ಅವರು.

ಬೀನ್ಸ್ ದರ ಕೆ.ಜಿ.ಗೆ ₹100ಕ್ಕೆ ಏರಿಕೆಯಾದರೆ, ಬೆಂಡೆಕಾಯಿ ದರವು ಕೆ.ಜಿಗೆ ₹90ಕ್ಕೆ ಏರಿದೆ. ಕಳೆದ ವಾರ ಬೀನ್ಸ್ ದರವು ಕೆ.ಜಿಗೆ ₹80 ಮತ್ತು ಬೆಂಡೆಕಾಯಿ ದರವು ಕೆ.ಜಿಗೆ ₹60 ಇತ್ತು.

ತೊಂಡೆಕಾಯಿ, ಬೀನ್ಸ್ ಮತ್ತು ಬೆಂಡೆಕಾಯಿ ದರವು ವಿಪರೀತ ಏರಿಕೆಯಾಗಿರುವುದರಿಂದ ಈ ತರಕಾರಿಗಳನ್ನು ಖರೀದಿಸಲು ಗ್ರಾಹಕರು ಹಿಂದೇಟು ಹಾಕುತ್ತಿದ್ದಾರೆ ಎಂಬುದು ಮಾರಾಟಗಾರರ ಅಳಲಾಗಿದೆ.

ಕಳೆದ ವಾರ ಕೆ.ಜಿಗೆ ₹80ರ ಆಸುಪಾಸಿನಲ್ಲಿದ್ದ ಅಲಸಂಡೆ ದರ ₹110ಕ್ಕೆ ಏರಿಕೆಯಾಗಿದೆ. ಕೆ.ಜಿಗೆ ₹60 ಇದ್ದ ಸಿಹಿ ಗೆಣಸು ದರ ₹70 ಕ್ಕೇರಿದರೆ, ಕ್ಯಾರೆಟ್ ಹಾಗೂ ಹೀರೇಕಾಯಿ ದರ ಕೆ.ಜಿಗೆ ₹80 ಆಗಿದೆ.

ಇನ್ನು ಹಣ್ಣು ಹಂಪಲುಗಳ ದರವೂ ಏರುಮುಖವಾಗಿದೆ. ದಾಳಿಂಬೆ ದರ ಕೆ.ಜಿಗೆ ₹220 ಕ್ಕೇರಿದರೆ, ಆ್ಯಪಲ್ ಕೆ.ಜಿಗೆ ₹180ಕ್ಕೇರಿದೆ.

ಈ ಬಾರಿ ಡಿಸೆಂಬರ್‌ ತಿಂಗಳಿನಿಂದಲೇ ಬಿಸಿಲಿನ ಝಳ ಜಾಸ್ತಿಯಾಗಿದೆ. ಈ ಕಾರಣಕ್ಕೆ ತಂಪು ಪಾನೀಯ, ಹಣ್ಣಿನ ಜ್ಯೂಸ್‌ಗೆ ಹೆಚ್ಚಿನ ಬೇಡಿಕೆ ಇದೆ. ಈ ಕಾರಣಕ್ಕೆ ಜನವರಿ ಆರಂಭದಲ್ಲೇ ಹಣ್ಣುಗಳ ಬೆಲೆ ಏರಿಕೆಯಾಗಿದೆ ಎನ್ನುತ್ತಾರೆ ಉಡುಪಿಯ ಸರ್ವಿಸ್ ಬಸ್ ನಿಲ್ದಾಣ ಬಳಿಯ ಹಣ್ಣಿನ ವ್ಯಾಪಾರಿ ಸಾದಿಕ್.

ದಾಳಿಂಬೆ ಹಣ್ಣಿಗೆ ಹೆಚ್ಚಿನ ಬೇಡಿಕೆ ಇರುವುದರಿಂದ ಅದರ ದರ ಸಿಕ್ಕಾಪಟ್ಟೆ ಏರಿಕೆಯಾಗಿದೆ ಎಂದು ಅವರು ಹೇಳುತ್ತಾರೆ.

ಕಳೆದ ವಾರ ಕೆ.ಜಿಗೆ ₹40 ಇದ್ದ ಪಪ್ಪಾಯ ಹಣ್ಣಿನ ಬೆಲೆ ಕೆ.ಜಿಗೆ ₹50ಕ್ಕೇರಿದರೆ, ಕೆ.ಜಿಗೆ ₹60ರ ಆಸುಪಾಸಿನಲ್ಲಿದ್ದ ನೇಂದ್ರ ಬಾಳೆ ಹಣ್ಣಿನ ದರವು ₹80ಕ್ಕೇರಿದೆ. ಏಲಕ್ಕಿ ಬಾಳೆ ಹಣ್ಣಿನ ಬೆಲೆಯು ಕೆ.ಜಿಗೆ ₹60 ಇದೆ.