ಮರ್ಲಮನೆ:ರಸ್ತೆ ಪಕ್ಕ ಭೂಕುಸಿತ: ಸ್ಥಳೀಯರಲ್ಲಿ ಆತಂಕ

ಶಿರಸಿ: ತಾಲ್ಲೂಕಿನ ಮರ್ಲಮನೆ ಬಳಿ ಶಿರಸಿ–ಗೋಳಿಮಕ್ಕಿ ರಸ್ತೆಯ ಅಂಚಿನಲ್ಲಿ ಭೂಕುಸಿತವಾಗಿದ್ದು, ರಸ್ತೆ ಸಂಪರ್ಕ ಕಡಿತಗೊಳ್ಳುವ ಆತಂಕ ಎದುರಾಗಿದೆ.

ಪಕ್ಕದಲ್ಲಿರುವ ಬೆಟ್ಟ ಪ್ರದೇಶದಿಂದ ಮಳೆನೀರು ಹೆಚ್ಚಿನ ಪ್ರಮಾಣದಲ್ಲಿ ಹರಿದು ಬರುತ್ತಿದೆ. ಮಳೆನೀರು ಹರಿದು ಹೋಗಲು ಸಮೀಪದಲ್ಲಿ ಅಳವಡಿಸಿದ್ದ ಪೈಪ್‍ಲೈನ್ ಕೂಡ ಕುಸಿದಿದೆ. ಇದರಿಂದ ಈ ಸಮಸ್ಯೆ ಎದುರಾಗಿದೆ.

‘ವಾರದ ಹಿಂದೆ ಅಲ್ಪ ಪ್ರಮಾಣದಲ್ಲಿ ಕುಸಿತವಾಗಿತ್ತು. ಮೂರು ದಿನಗಳ ಹಿಂದೆ ಸುರಿದ ಮಳೆಯಿಂದ ಮತ್ತಷ್ಟು ಹೆಚ್ಚಿನ ಪ್ರಮಾಣದ ಭೂಕುಸಿತವಾಯಿತು’ ಎಂದು ಸ್ಥಳೀಯರಾದ ಕೃಷ್ಣಮೂರ್ತಿ ಹೆಗಡೆ ತಿಳಿಸಿದರು. ‘ಸ್ಥಳಕ್ಕೆ ಭೇಟಿ ನೀಡಿ ಪರಿಶೀಲಿಸಲಾಗಿದೆ. ಅಲ್ಲಿ ಅಲ್ಪಪ್ರಮಾಣದ ಭೂಕುಸಿತ ಇತ್ತು. ಈಗ ಸಮೀಪದ ಮೋರಿಕಟ್ಟೆ ಕುಸಿದಿದೆ. ಸರಿಪಡಿಸಲು ಕ್ರಮವಹಿಸಲಾಗುತ್ತದೆ. ಸಂಚಾರ ಕಡಿತಗೊಳ್ಳುವ ಆತಂಕವಿಲ್ಲ’ ಎಂದು ಲೋಕೋಪಯೋಗಿ ಇಲಾಖೆಯ ಕಿರಿಯ ಎಂಜಿನಿಯರ್ ಹನುಮಂತ ನಾಯ್ಕ ತಿಳಿಸಿದರು.