ಕಾರವಾರ | ಟುಪಲೇವ್ ಅಭಿವೃದ್ಧಿ ಮೂಲೆಗುಂಪು: ಬಳಕೆಯಾಗದ ₹2 ಕೋಟಿ ಅನುದಾನ?

ಕಾರವಾರ: ರಾಜ್ಯದ ಮೊದಲ ಯುದ್ಧ ವಿಮಾನ ವಸ್ತು ಸಂಗ್ರಹಾಲಯ ಇಲ್ಲಿನ ಟ್ಯಾಗೋರ್ ಕಡಲತೀರದಲ್ಲಿ ಸಾರ್ವಜನಿಕ ವೀಕ್ಷಣೆಗೆ ಮುಕ್ತಗೊಳಿಸಿ ಜೂನ್ 29ಕ್ಕೆ ಒಂದು ವರ್ಷ ಪೂರೈಸಲಿದೆ. ಆದರೆ, ಸದ್ಯ ಬಾಗಿಲು ಮುಚ್ಚಿದ ವಸ್ತು ಸಂಗ್ರಹಾಲಯ ನೋಡಲಷ್ಟೆ ಪ್ರವಾಸಿಗರಿಗೆ ಅವಕಾಶ ಆಗುತ್ತಿದೆ.

ಯುದ್ಧವಿಮಾನ ‘ಟುಪಲೇವ್ (143–ಎಂ)’ 2017ರಲ್ಲಿ ನಿವೃತ್ತಿಯಾದ ಬಳಿಕ ವಸ್ತುಸಂಗ್ರಹಾಲಯವಾಗಿ ಪರಿವರ್ತಿಸಲು ನಿರ್ಣಯಿಸಲಾಗಿತ್ತು. ತಮಿಳುನಾಡಿನ ಅರಕ್ಕೋಣಮ್‌ನ ನೌಕಾನೆಲೆಯಲ್ಲಿದ್ದ ವಿಮಾನವನ್ನು ಕಾರವಾರದಲ್ಲಿ ವಸ್ತುಸಂಗ್ರಹಾಲಯವಾಗಿ ಪರಿವರ್ತಿಸಲು 2018ರಲ್ಲಿ ನಿರ್ಣಯಿಸಲಾಗಿತ್ತು.

2020ರ ಮಾರ್ಚ್ ಸುಮಾರಿಗೆ ನೌಕಾಪಡೆ ಮತ್ತು ಉತ್ತರ ಕನ್ನಡ ಜಿಲ್ಲಾಡಳಿತದ ನಡುವೆ ಒಪ್ಪಂದ ಏರ್ಪಟ್ಟು ಯುದ್ಧವಿಮಾನವನ್ನು ಇಲ್ಲಿಗೆ ಸಾಗಣೆ ಮಾಡಿ, ಮ್ಯೂಸಿಯಂ ಆಗಿ ಪರಿವರ್ತಿಸುವ ಸಲುವಾಗಿ ಅಳವಡಿಸಲು ನೌಕಾದಳ ಒಪ್ಪಿತ್ತು. 2023ರ ಸೆಪ್ಟೆಂಬರ್‌ನಲ್ಲಿ ಟ್ಯಾಗೋರ್ ಕಡಲತೀರದಲ್ಲಿನ ಐಎನ್ಎಸ್ ಚಪಲ್ ಯುದ್ಧನೌಕೆ ಮ್ಯೂಸಿಯಂ ಉದ್ಯಾನಕ್ಕೆ ಯುದ್ಧವಿಮಾನ ತಂದು, ಅಲ್ಲಿ ಐದು ತಿಂಗಳ ಅವಧಿಯೊಳಗೆ ಮರುಜೋಡಣೆ ಮಾಡಲಾಗಿತ್ತು.

ಟುಪಲೇವ್ ಯುದ್ಧವಿಮಾನ ಮ್ಯೂಸಿಯಂ ಅಭಿವೃದ್ಧಿಗೆ ರಾಜ್ಯ ಸರ್ಕಾರವು 2020ರಲ್ಲಿ ಜಿಲ್ಲಾಡಳಿತಕ್ಕೆ ₹2 ಕೋಟಿಯಷ್ಟು ಅನುದಾನವನ್ನೂ ಬಿಡುಗಡೆ ಮಾಡಿದ್ದಾಗಿ ಅಧಿಕಾರಿಗಳು ಹೇಳಿದ್ದರು. ಈ ಅನುದಾನದಲ್ಲಿ ಉದ್ಯಾನ ಅಭಿವೃದ್ಧಿ, ಕೆಫೆಟೇರಿಯಾ ಸ್ಥಾಪನೆ ಸೇರಿದಂತೆ ವಿಶಾಖಪಟ್ಟಣಂನಲ್ಲಿರುವ ಮ್ಯೂಸಿಯಂ ಮಾದರಿಯಲ್ಲಿ ಪ್ರವಾಸಿಗರ ಆಕರ್ಷಣೆಗೆ ಯೋಜನೆ ಸಿದ್ಧಪಡಿಸಿದ್ದಾಗಿ ಕಳೆದ ವರ್ಷವೂ ಜಿಲ್ಲಾಡಳಿತ ಹೇಳಿಕೊಂಡಿತ್ತು.

‘ಯುದ್ಧವಿಮಾನ ಮ್ಯೂಸಿಯಂ ಅಭಿವೃದ್ಧಿಪಡಿಸುವುದು ಬದಿಗಿರಲಿ, ಕನಿಷ್ಠ ಪಕ್ಷ ಸ್ಥಾಪನೆಯಾದ ಯುದ್ಧವಿಮಾನ ವೀಕ್ಷಣೆಗೂ ಜಿಲ್ಲಾಡಳಿತ ಅವಕಾಶ ನೀಡಿಲ್ಲ. ಹಲವು ತಿಂಗಳುಗಳಿಂದ ವಿಮಾನದ ಮುಚ್ಚಿದ ಬಾಗಿಲು ನೋಡಿಯೇ ಬರುವಂತಾಗುತ್ತಿದೆ. ಉದ್ಯಾನ ಎರಡು ವರ್ಷದ ಹಿಂದೆ ಹೇಗಿತ್ತೋ ಈಗಲೂ ಹಾಗೆಯೇ ಇದೆ’ ಎಂದು ಸಾಮಾಜಿಕ ಕಾರ್ಯಕರ್ತ ರಾಜೀವ ನಾಯ್ಕ ಆರೋಪಿಸಿದರು.