ಹೊಸಪೇಟೆ | ಅಲೆಮಾರಿ ಆಯೋಗ ನಿಶ್ಚಿತ: ಪಲ್ಲವಿ

ಹೊಸಪೇಟೆ (ವಿಜಯನಗರ): ಅಲೆಮಾರಿ ಸಮುದಾಯಗಳಲ್ಲಿ 51 ಪರಿಶಿಷ್ಟ ಜಾತಿ ಮತ್ತು 21 ಪರಿಶಿಷ್ಟ ಪಂಗಡಕ್ಕೆ ಸೇರಿದವರು ಇದ್ದಾರೆ. ಕೆಲವು ಹೆಸರುಗಳಲ್ಲಿನ ಸಣ್ಣ ತಪ್ಪಿನಿಂದಲೇ ಮೀಸಲಾತಿಯಿಂದ ವಂಚಿತರಾದವರು ಇದ್ದಾರೆ. ಇಂತಹ ಸಮಸ್ಯೆಗಳನ್ನು ಶಾಶ್ವತವಾಗಿ ಪರಿಹರಿಸಲು ಅಲೆಮಾರಿ ಆಯೋಗ ಶೀಘ್ರ ಅಸ್ತಿತ್ವಕ್ಕೆ ಬರಲಿದೆ ಎಂದು ಪರಿಶಿಷ್ಟ ಜಾತಿ, ಪರಿಶಿಷ್ಟ ಪಂಗಡಗಳ ಅಲೆಮಾರಿ ಅಭಿವೃದ್ಧಿ ನಿಗಮದ ಅಧ್ಯಕ್ಷೆ ಜಿ.ಪಲ್ಲವಿ ಹೇಳಿದರು.

ಮೂರು ದಿನ ಜಿಲ್ಲೆಯಲ್ಲಿ ಪ್ರವಾಸ ಮಾಡಿದ ಅವರು ಬುಧವಾರ ಇಲ್ಲಿನ ಜಿಲ್ಲಾಧಿಕಾರಿ ಕಚೇರಿಯಲ್ಲಿ ಪ್ರಗತಿ ಪರಿಶೀಲನಾ ಸಭೆ ನಡೆಸಿದ ಬಳಿಕ ಮಾಧ್ಯಮದವರಿಗೆ ಈ ವಿಷಯ ತಿಳಿಸಿದರು.

ಜಿಲ್ಲೆಯಲ್ಲಿ ಅಲೆಮಾರಿಗಳಿಗೆ ಕಾಡುತ್ತಿರುವ ಸಮಸ್ಯೆ ಎಂದರೆ ನಿವೇಶನದ್ದು.  ಅವರಿಗೆ ಒಂದು ಶಾಶ್ವತ ನೆಲೆ ಕಂಡುಕೊಂಡರೆ ಅವರು ಬದುಕು ಕಟ್ಟಿಕೊಳ್ಳುತ್ತಾರೆ. ಹೂವಿನಹಡಗಲಿ, ಹಗರಿಬೊಮ್ಮನಹಳ್ಳಿಯಲ್ಲಿ ಈ ಸಮಸ್ಯೆ ಇದೆ. ಎರಡು ತಿಂಗಳೊಳಗೆ ಅಲ್ಲಿನ ಸಮಸ್ಯೆ ಬಗೆಹರಿಸಲು ಜಿಲ್ಲಾಡಳಿತಕ್ಕೆ ಸೂಚನೆ ನೀಡಿದ್ದೇನೆ ಎಂದು ಹೇಳಿದರು.

‘ಹೊಸಪೇಟೆಯ ಕಾರಿಗನೂರಿನಲ್ಲಿ ದಾನಿಯೊಬ್ಬರು ನಿವೇಶನ ನೀಡಿದ್ದರೂ ಹಕ್ಕಿಪಿಕ್ಕಿಗಳಿಗೆ ನಿವೇಶನ ಸಿಕ್ಕಿಲ್ಲ. ಆ ಸಮಸ್ಯೆಯನ್ನು ನಾನು ಇಂದು ಅಲ್ಲಿಗೆ ತೆರಳಿ ಕಂಡುಕೊಂಡಿದ್ದೇನೆ. ಎರಡು ತಿಂಗಳೊಳಗೆ ಅಲ್ಲಿನ ನಿವೇಶನವನ್ನು ಸೂಕ್ತ ರೀತಿಯಿಂದ ಹಕ್ಕಿಪಿಕ್ಕಿ ಸಮದಾಯದವರಿಗೆ ಹಂಚಿಕೆ ಮಾಡಲಾಗುವುದು. ಈಗಾಗಲೇ ಆನ್‌ಲೈನ್‌ನಲ್ಲಿ ಅರ್ಜಿ ಕರೆದು ದಿನಾಂಕ ವಿಸ್ತರಿಸಲಾಗಿದೆ’ ಎಂದರು.

ಅಲೆಮಾರಿಗಳ ಎರಡು ಉದ್ಯಮಶೀಲತಾ ಯೋಕನೆಗಳು ಸ್ಥಗಿತಗೊಂಡಿದ್ದವು. ಇಂದಿನ ಸಭೆಯಲ್ಲಿ ಅದರ ಬಗ್ಗೆ ಲೀಡ್ ಬ್ಯಾಂಕ್‌ ಮ್ಯಾನೇಜರ್‌ಗೆ ತಿಳಿಸಿ ಎರಡು ದಿನದಲ್ಲಿ ಸಮಸ್ಯೆ ಬಗೆಹರಿಸಲು ತಿಳಿಸಲಾಗಿದೆ. ಅಲೆಮಾರಿಗಳಿಗೆ ಯಾವುದೇ ಭದ್ರತೆಯ ಅಗತ್ಯ ಇಲ್ಲದೆ, ಸಿಬಿಲ್ ಸ್ಕೋರ್ ನೋಡದೆ ಸಾಲ ನೀಡಬೇಕಾಗುತ್ತದೆ, ವಸತಿ ಶಾಲೆಗಳಿಗೆ ಪರೀಕ್ಷೆ ಇಲ್ಲದೆಯೇ ಅವರೆಲ್ಲರಿಗೂ ಅವಕಾಶ ನೀಡುವುದು ಕಡ್ಡಾಯ. ಶಿಕ್ಷಣದಿಂದ ಮಾತ್ರ ಅಲೆಮಾರಿಗಳ ಬದುಕು ಹಸನಾಗಲು ಸಾಧ್ಯ ಎಂದು ಪಲ್ಲವಿ ಹೇಳಿದರು.

ಜಿಲ್ಲಾಧಿಕಾರಿ ಎಂ.ಎಸ್.ದಿವಾಕರ್‌, ನಿಗಮದ ಜಂಟಿ ಕಾರ್ಯದರ್ಶಿ ಆನಂದ ಏಕಲವ್ಯ, ಸಮಾಜ ಕಲ್ಯಾಣ ಇಲಾಖೆಯ ಉಪನಿರ್ದೇಶಕ ವೈ.ಆನಂದ ಕಾಳೆ, ಎಎಸ್‌ಪಿ ಜಿ.ಮಂಜುನಾಥ್‌, ಜಿಲ್ಲಾ ಪಂಚಾಯಿತಿ ಯೋಜನಾ ನಿರ್ದೇಶಕ ಜೆ.ಎಂ.ಅನ್ನದಾನಸ್ವಾಮಿ ಇದ್ದರು.