ಐಟಂ ನಂಬರ್‌ನಲ್ಲಿ ಮಾಹೀ ಗಿಲ್
ಬಾಲಿವುಡ್ ಸಿನಿಮಾಗಳಲ್ಲಿ ಐಟಂ ನಂಬರ್‌ಗೆ ಈಗ ಎಲ್ಲಿಲ್ಲದ ಪ್ರಾಮುಖ್ಯ. ಬಹುತೇಕ ನಿರ್ಮಾಪಕರು ತಮ್ಮ ಚಿತ್ರಗಳಲ್ಲಿ `ಮೈ ಸಿರಿ~ ಪ್ರದರ್ಶಿಸುವ ಒಂದು ನೃತ್ಯ ಇರಲೇಬೇಕು ಎಂದು ಬಯಸುತ್ತಾರೆ. ಪೇಕ್ಷಕರನ್ನು ಚಿತ್ರಮಂದಿರಕ್ಕೆ ಸೆಳೆಯಲು ಹಾಗೂ ಹಣ ದೋಚಲು ಇದೊಂದು ಪ್ರಮುಖ ಸರಕು ಕೂಡ ಹೌದು.
`1973ರಲ್ಲಿ ತೆರೆಕಂಡಿದ್ದ ಜಂಜೀರ್ ಚಿತ್ರ ಈಗ ರಿಮೇಕ್ ಆಗುತ್ತಿದೆ. ಅಮಿತ್ ಮೆಹ್ರಾ ಚಿತ್ರದ ನಿರ್ಮಾಪಕರು. ಇವರು ಕೂಡ ತಮ್ಮ ರೀಮೇಕ್ ಚಿತ್ರದಲ್ಲಿ ಎರಡು ಐಟಂ ನಂಬರ್ ಇಡಲು ಯೋಚಿಸಿದ್ದಾರೆ. ಈ ಚಿತ್ರದಲ್ಲಿನ ಒಂದು ಐಟಂ ಸಾಂಗ್‌ಗೆ ಮಾಹೀ ಗಿಲ್ ಹೆಜ್ಜೆ ಹಾಕಲಿದ್ದಾರೆ. ಹುಡುಗರ ಹೃದಯಕ್ಕೆ ಕಿಚ್ಚು ಹಚ್ಚಲು ಸಜ್ಜಾಗಿದ್ದಾರೆ. ಇನ್ನೊಂದು ಹಾಡಿಗೆ ಯಾರು ಕುಣಿಯಲಿದ್ದಾರೆ ಎಂಬುದು ಇನ್ನೂ ನಿರ್ಧಾರವಾಗಿಲ್ಲ. ಐಟಂ ಸಾಂಗ್‌ಗಳು ಚಿತ್ರಕಥೆಗೆ ಪೂರಕವಾಗಿದ್ದವು. ಹಾಗಾಗಿ ನಾನು ಈ ಚಿತ್ರದಲ್ಲಿ ಐಟಂ ನಂಬರ್ ಇಡಲು ಯೋಚಿಸಿದ್ದು~ ಎನ್ನುತ್ತಾರೆ ಮೆಹ್ರಾ.
ರಾಮ್‌ಚರಣ್ ತೇಜಾ ಮತ್ತು ಪ್ರಿಯಾಂಕ ಚೋಪ್ರಾ ಚಿತ್ರದ ಮುಖ್ಯ ಭೂಮಿಕೆಯಲ್ಲಿದ್ದಾರೆ. ಮೆಹ್ರಾ ಅವರು ರಾಮ್‌ಚರಣ್ ತೇಜಾ ನಟನಾ ಕೌಶಲ್ಯದ ಬಗ್ಗೆ ತುಂಬಾ ಮೆಚ್ಚುಗೆಯ ಮಾತುಗಳನ್ನು ಆಡುತ್ತಿದ್ದಾರೆ. ತೇಜಾ ಈ ಚಿತ್ರದ ಪಾತ್ರಕ್ಕೆ ನ್ಯಾಯ ಒದಗಿಸುತ್ತಾರೆ ಎಂಬ ವಿಶ್ವಾಸ ಅವರದ್ದು.
`ನಾನು ರಾಮ್‌ಚರಣ್ ತೇಜಾ ಅಭಿನಯದ ಚಿತ್ರಗಳನ್ನು ನೋಡಿದ್ದೇನೆ. ಹಾಗಾಗಿ ಈ ಚಿತ್ರಕ್ಕೆ ಆತನೇ ಸೂಕ್ತ ಎಂದು ನಿರ್ಧರಿಸಿದೆ. ಪ್ರಿಯಾಂಕಾ ಬಿಡುವಿಲ್ಲದಷ್ಟು ಬ್ಯುಸಿಯಾಗಿದ್ದಾರೆ. ಮೇ ಅಂತ್ಯದ ವೇಳೆಗೆ ಆಕೆ ಚಿತ್ರತಂಡ ಕೂಡಿಕೊಳ್ಳಲಿದ್ದಾರೆ. ಅಲ್ಲಿವರೆಗೂ ನಾಯಕಿಯನ್ನು ಹೊರತುಪಡಿಸಿದ ಭಾಗಗಳ ಚಿತ್ರೀಕರಣ ನಡೆಯಲಿದೆ ಎಂದಿದ್ದಾರೆ ಮೆಹ್ರಾ. ಈ ಚಿತ್ರದಲ್ಲಿ ಸಂಗೀತ ಕೂಡ ಪ್ರಮುಖ ಪಾತ್ರವಹಿಸಲಿದೆ. ಆದರೆ ಇನ್ನೂ ಸಂಗೀತ ನಿರ್ದೇಶಕನ ಆಯ್ಕೆ ನಡೆದಿಲ್ಲ. ಡಿಸೆಂಬರ್ ವೇಳೆಗೆ ಚಿತ್ರೀಕರಣ ಸಂಪೂರ್ಣಗೊಳ್ಳಲಿದೆ. 2013ರ ಮೇ ತಿಂಗಳನಲ್ಲಿ ಚಿತ್ರ ತೆರೆಕಾಣಲಿದೆ.
ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ವಾಟ್ಸ್ಆ್ಯಪ್, ಎಕ್ಸ್, ಫೇಸ್‌ಬುಕ್ ಮತ್ತು ಇನ್‌ಸ್ಟಾಗ್ರಾಂನಲ್ಲಿ ಪ್ರಜಾವಾಣಿ ಫಾಲೋ ಮಾಡಿ.