ಇತ್ತೀಚೆಗೆ ಬಿಡುಗಡೆಯಾದ ಆಶ್ರಮ್ ವೆಬ್ಸರಣಿಯಲ್ಲಿ ಹಿಂದೂ ಸಂತರನ್ನು ವಿವಾದಾತ್ಮಕವಾಗಿ ಚಿತ್ರೀಕರಿಸಿದ್ದಾರೆ ಎಂಬ ಕಾರಣಕ್ಕೆ ನಿರ್ದೇಶಕ ಪ್ರಕಾಶ್ ಝಾ ಹಾಗೂ ನಟ ಬಾಬ್ಬಿ ಡಿಯೋಲ್ ಅವರಿಗೆ ಜೋಧ್ಪುರ ನ್ಯಾಯಾಲಯ ನೋಟಿಸ್ ನೀಡಿದೆ. ಆಶ್ರಮ್ ಚಾಪ್ಟರ್ 2: ದಿ ಡಾರ್ಕ್ ಸೈಡ್ ವೆಬ್ ಸರಣಿಯು ನವೆಂಬರ್ 11 ರಂದು ಬಿಡುಗಡೆಯಾಗಿತ್ತು.
ಎಮ್ಎಕ್ಸ್ ಪ್ಲೇಯರ್ನಲ್ಲಿ ಪ್ರಸಾರವಾದ ಈ ವೆಬ್ಸರಣಿಯಲ್ಲಿ ರಾಜಸ್ಥಾನದ ಜೋಧ್ಪುರ ಸೇರಿದಂತೆ ದೇಶದ ವಿವಿಧ ಭಾಗಗಳಲ್ಲಿ ಶಿಕ್ಷೆಗೆ ಗುರಿಯಾದ ಹಾಗೂ ಜೈಲು ಶಿಕ್ಷೆ ಅನುಭವಿಸುತ್ತಿರುವ ಕೆಲವು ಸ್ವಯಂ ಘೋಷಿತ ದೇವಮಾನವರ ಕಥೆಗೆ ಹೋಲುವಂತೆ ಚಿತ್ರೀಕರಿಸಲಾಗಿತ್ತು. ಬಾಬ್ಬಿ ಡಿಯೋಲ್ ಈ ಸರಣಿಯಲ್ಲಿ ಮುಖ್ಯಭೂಮಿಕೆಯಲ್ಲಿ ನಟಿಸಿದ್ದಾರೆ.
ಜೋಧ್ಪುರ ನ್ಯಾಯಾಲಯದ ಸೆಷನ್ ನ್ಯಾಯಧೀಶ ರವೀಂದ್ರ ಜೋಷಿ ಈ ಇಬ್ಬರಿಗೆ ಜನವರಿ 11ಕ್ಕೆ ವಿಚಾರಣೆಗೆ ಹಾಜರಾಗುವಂತೆ ನೋಟಿಸ್ ನೀಡಿದ್ದಾರೆ. ಸ್ಥಳೀಯ ನಿವಾಸಿ ಖುಷಿ ಖಂಡೇಲ್ವಾಲ್ ಎನ್ನುವವರು ಈ ವೆಬ್ಸರಣಿಯ ವಿರುದ್ಧ ಅರ್ಜಿ ಸಲ್ಲಿಸಿದ್ದರು.
‘ವೆಬ್ಸರಣಿಯಲ್ಲಿ ಹಿಂದೂ ಸಂತರನ್ನು ಅವಮಾನಿಸಲಾಗಿದೆ. ಇದು ಸಂತರನ್ನು ಗೌರವಿಸುವ ಹಾಗೂ ಪೂಜಿಸುವ ಹಿಂದೂಗಳ ಧಾರ್ಮಿಕ ಭಾವನೆಗೆ ಧಕ್ಕೆ ಬರುವಂತೆ ಮಾಡಿದೆ’ ಎಂದು ಅರ್ಜಿಯಲ್ಲಿ ತಿಳಿಸಲಾಗಿದೆ.
ಹಿಂದೆ ಖಂಡೇಲ್ವಾಲ್ ಈ ವಿಷಯಕ್ಕೆ ಸಂಬಂಧಿಸಿ ಪೊಲೀಸರಿಗೆ ದೂರು ನೀಡಿದ್ದರು ಹಾಗೂ ಈ ಇಬ್ಬರ ವಿರುದ್ಧ ಎಫ್ಐಆರ್ ನೋಂದಾಯಿಸುವಂತೆ ಕೇಳಿಕೊಂಡಿದ್ದರು. ಆದರೆ ಪೊಲೀಸರು ದೂರು ಸ್ವೀಕರಿಸಲು ನಿರಾಕರಿಸಿದ್ದರು ಆ ಕಾರಣಕ್ಕೆ ನೇರವಾಗಿ ನ್ಯಾಯಾಲಯಕ್ಕೆ ಅರ್ಜಿ ಸಲ್ಲಿಸಿದ್ದಾರೆ.
ಈ ವಿಷಯಕ್ಕೆ ಸಂಬಂಧಿಸಿ ಸಾಮಾಜಿಕ ಜಾಲತಾಣಗಳಲ್ಲಿ ಅಭಿಯಾನವು ಆರಂಭವಾಗಿದೆ.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್ಬುಕ್ ಪುಟ ಫಾಲೋ ಮಾಡಿ.