ಅಗಲಿದ ಗೆಳೆಯನಿಗೆ ಭಾವನುಡಿ ನಮನ
ಬಾಲಿವುಡ್‌ ನಟ ಸುಶಾಂತ್ ಸಿಂಗ್ ರಜಪೂತ್ ಸಾವು, ಅವರ ಸಿನಿಮಾ ರಂಗದ ಆಪ್ತೇಷ್ಟರನ್ನು ಶೋಕಸಾಗರದಲ್ಲಿ ಮುಳುಗಿಸಿದೆ. ಸುಶಾಂತ್‌ರೊಂದಿಗೆ ಸಿನಿಮಾ, ಧಾರಾವಾಹಿಗಳಲ್ಲಿ ನಟಿಸಿದ ಹಲವು ಸಹನಟ–ನಟಿಯರು ಜಾಲತಾಣಗಳ ಮೂಲಕ ತಮ್ಮ ನೋವನ್ನು ಹೊರ ಹಾಕುತ್ತಿದ್ದಾರೆ.
‘ರಾಬ್ತಾ‘ ಸಿನಿಮಾದಲ್ಲಿ ಸುಶಾಂತ್ ಜತೆ ತೆರೆ ಹಂಚಿಕೊಂಡಿದ್ದ ನಟಿ ಕೃತಿ ಸನೋನ್‌, ಅಗಲಿದ ಗೆಳೆಯನ ಕುರಿತು ಇನ್‌ಸ್ಟಾಗ್ರಾಂ ಖಾತೆಯಲ್ಲಿ ಭಾವನಾತ್ಮಕವಾಗಿ ಬರೆದುಕೊಂಡಿದ್ದು, ಮನದ ನೋವನ್ನು ಅಕ್ಷರಗಳಲ್ಲಿ ಪೋಣಿಸಿದ್ದಾರೆ. ಆ ಭಾವ ತುಂಬಿದ ಸಾಲುಗಳು ಹೀಗಿವೆ...
'ನಿನ್ನಲ್ಲಿದ್ದ ಅದ್ಭುತ ಬುದ್ಧಿಶಕ್ತಿಯೇ ನಿನಗೆ ಒಳ್ಳೆಯ ಸ್ನೇಹಿತ ಹಾಗೆಯೇ ಕೆಟ್ಟ ವೈರಿಯೂ ಆಯಿತೇನೋ. ನೀನು ಜೀವನದಲ್ಲಿ ಬದುಕುವುದಕ್ಕಿಂತ ಸಾಯುವುದೇ ಸುಲಭ ಎಂದು ತೀರ್ಮಾನಿಸಿರುವುದು ನನ್ನನ್ನು ತುಂಬಾ ಘಾಸಿಗೊಳಿಸಿದೆ.
ನೀನು ಸಾಯುವ ನಿರ್ಧಾರ ತೆಗೆದುಕೊಂಡ ಆ ಕೆಟ್ಟ ಸಮಯದಲ್ಲಿ ನಿನ್ನ ಸುತ್ತಲೂ ಜನರು ಇರಬೇಕಿತ್ತು ಎನ್ನಿಸುತ್ತಿದೆ. ನಿನ್ನ ಸಮಸ್ಯೆಯನ್ನು ಪರಿಹರಿಸಲು ನನಗೆ ಒಂದು ಅವಕಾಶ ಸಿಕ್ಕಿದ್ದರೆ ಎಷ್ಟು ಚೆನ್ನಾಗಿರುತ್ತಿತ್ತು!
ನಿನ್ನನ್ನು ಯಾವಾಗಲೂ ಪ್ರೀತಿಸುತ್ತಿದ್ದವರನ್ನು ಹೀಗೆ ದೂರ ತಳ್ಳಬಾರದಿತ್ತು. ಈಗಲೂ ನನ್ನ ಹೃದಯದ ಒಂದು ಭಾಗ ಸದಾ ನಿನ್ನೊಂದಿಗೆ ಇರುತ್ತದೆ. ನನ್ನ ಹೃದಯದೊಳಗೆ ನೀನು ಯಾವಾಗಲೂ ಇರುತ್ತೀಯಾ...
ಈ ಭಾವನಾತ್ಮಕ ಸಾಲುಗಳ ಜತೆಗೆ ಸುಶಾಂತ್ ಅವರೊಂದಿಗೆ ತೆಗೆದುಕೊಂಡಿದ್ದ ಸೆಲ್ಫಿ ಫೋಟೊಗಳನ್ನು ಕೃತಿ ಇನ್‌ಸ್ಟಾಗ್ರಾಂನಲ್ಲಿ ಹಂಚಿಕೊಂಡಿದ್ದಾರೆ.
‘ರಾಬ್ತಾ’ ಸಿನಿಮಾದಲ್ಲಿ ಸುಶಾಂತ್ ಜೋಡಿಯಾಗಿ ನಟಿಸುವಾಗ ‘ಈ ಸಿನಿಮಾದ ಪ್ರೇಮಕಥೆ ಬಹಳ ಇಷ್ಟವಾಗಿದೆ‘ ಎಂದು ಕೃತಿ ಹೇಳಿಕೊಂಡಿದ್ದರು. ಹಿಂದೆ ಇನ್‌ಸ್ಟಾಗ್ರಾಂನಲ್ಲೂ ಇದನ್ನು ಬರೆದುಕೊಂಡಿದ್ದರು.
ಸುಶಾಂತ್ ಮನೆಗೆ ಅಂಕಿತಾ
ಸುಶಾಂತ್ ಮಾಜಿ ಗೆಳತಿ ಅಂಕಿತಾ ಲೋಖಂಡೆ ಮಂಗಳವಾರ ತಮ್ಮ ತಾಯಿಯೊಂದಿಗೆ ಮುಂಬೈನ ಬಾಂದ್ರಾದಲ್ಲಿರುವ ಸುಶಾಂತ್ ಅವರ ನಿವಾಸಕ್ಕೆ ಭೇಟಿ ನೀಡಿದ್ದಾರೆ. ಅವರೊಂದಿಗೆ ಸರ್ಬಜಿತ್‌ ಸಿನಿಮಾ ನಿರ್ಮಾಪಕ ಸಂದೀಪ್ ಸಿಂಗ್ ಸಹ ಇದ್ದರು.
ಸುಶಾಂತ್ ಮತ್ತು ಅಂಕಿತಾ ‘ಪವಿತ್ರ ರಿಶ್ತಾ’ ಧಾರಾವಾಹಿ ಮೂಲಕ ಸ್ನೇಹಿತರಾಗಿ, ಪರಸ್ಪರ ಪ್ರೀತಿಸಿ ಆರು ವರ್ಷಗಳ ಕಾಲ ‘ಸಹಜೀವನ’ ನಡೆಸಿದ್ದರು. 2016ರಲ್ಲಿ ಇಬ್ಬರು ಬೇರೆಯಾಗಿದ್ದರು.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.