ಹಾರರ್ ಚಿತ್ರದಲ್ಲಿ ತಮನ್ನಾ

‘ಮಿಲ್ಕ್ ಬ್ಯೂಟಿ’ ತಮನ್ನಾ ಭಾಟಿಯಾ, ಪ್ರಭುದೇವ ಜತೆಗಿನ ‘ದೇವಿ 2’ ಮತ್ತು ‘ಖಾಮೋಷಿ’ ಸಿನಿಮಾದ ಬಿಡುಗಡೆಯ ನಿರೀಕ್ಷೆಯಲ್ಲಿದ್ದಾರೆ. ಈ ನಡುವೆ ಇನ್ನೂ ಹೆಸರಿಡದ ಹಾರರ್, ಕಾಮಿಡಿ ಸಿನಿಮಾದಲ್ಲಿ ತಮನ್ನಾ ಅಭಿನಯಿಸುತ್ತಿರುವುದು ಅವಳ ಅಭಿಮಾನಿಗಳಿಗೆ ಖುಷಿ ತಂದಿದೆ.

ರೋಹಿಣ್‌ ವೆಂಕಟೇಶನ್ ನಿರ್ದೇಶನದ ಈ ಚಿತ್ರದ ಚಿತ್ರೀಕರಣ ಪ್ರಾರಂಭವಾಗಿದ್ದು, ಶೀಘ್ರದಲ್ಲೇ ತಮನ್ನಾ ಸೆಟ್‌ಗೆ ಹಾಜರಾಗಲಿದ್ದಾರೆ. ನಾಯಕಿ ಪ್ರಧಾನವಾಗಿರುವ ಈ ಚಿತ್ರದಲ್ಲಿ ತಮನ್ನಾ ಭಿನ್ನ ಬಗೆಯಲ್ಲಿ ಕಾಣಿಸಿಕೊಳ್ಳಲಿದ್ದಾರೆ ಅನ್ನುವುದು ನಿರ್ದೇಶಕರ ಅಭಿಪ್ರಾಯ. ತಮನ್ನಾಗೆ ಜತೆಯಾಗಿ ಯೋಗಿ ಬಾಬುಬ, ಮುನಿಕಾಂತ್, ಮನ್ಜೂರ್ ಅಲಿ ಖಾನ್ ಇದ್ದಾರೆ. ಬ್ರೇಕ್ ಇಲ್ಲದೇ ಸತತ 42 ದಿನಗಳ ಕಾಲ ಚಿತ್ರೀಕರಣ ಮಾಡಬೇಕೆಂಬುದು ಚಿತ್ರತಂಡದ ಆಸೆ. ಚೆನ್ನೈನಲ್ಲಿ ಹತ್ತು ದಿನಗಳ ಶೂಟಿಂಗ್ ಮುಗಿಸಿ, ನಂತರದ 32 ದಿನಗಳ ಚಿತ್ರೀಕರಣವನ್ನು ಕರೈಕುಡಿಯಲ್ಲಿ ಶೂಟಿಂಗ್ ಮಾಡಲಿದೆಯಂತೆ.

‘ದೇವಿ 2’, ‘ಖಾಮೋಷಿ’ ನಂತರ ಹಿಂದಿಯ ‘ಕ್ವೀನ್’ ತಮಿಳು ರಿಮೇಕ್‌ನಲ್ಲೂ ತಮನ್ನಾ ಕಾಣಿಸಿ ಕೊಳ್ಳಲಿದ್ದಾರೆ. ಚಿರಂಜೀವಿಯ ‘ಸೈ ರಾ ನರಸಿಂಹ ರೆಡ್ಡಿ’ಯಲ್ಲೂ ತಮನ್ನಾಳದ್ದು ಪ್ರಧಾನ ಪಾತ್ರವಂತೆ. ಈ ವರ್ಷವಿಡೀ ಬ್ಯುಸಿಯಾಗಿರುವ ತಮನ್ನಾ ತನ್ನ ಅಭಿಮಾನಿಗಳಿಗೆ ಸಾಲುಸಾಲು ಚಿತ್ರಗಳ ಮೂಲಕ ಮನರಂಜನೆಯ ರಸದೌತಣ ಬಡಿಸಲು ಸಿದ್ಧರಾಗಿದ್ದಾರೆ.