ಶವಸಂಸ್ಕಾರದ ವೇಳೆ ಅಂಗಾಂಗ ಕಾಣೆಯಾಗಿದ್ದನ್ನು ಸಂಬಂಧಿಕರು ಪತ್ತೆಹಚ್ಚಿದ್ದು ನಿಜವೇ?

ಕೋವಿಡ್‌ನಿಂದ ಸಾವನ್ನಪ್ಪಿದ ರೋಗಿಗಳ ಮೃತದೇಹಗಳಿಂದ ಅಂಗಾಂಗಳು ಕಾಣೆಯಾಗಿರುವ ಕುರಿತು ಕೆಲವು ಸುದ್ದಿವಾಹಿನಿಗಳು ವರದಿ ಮಾಡಿವೆ. ಜುಲೈ 20ರಂದು ಮುಂಬೈನ ಗೊರಾಯ್ ಎಂಬಲ್ಲಿ ಶವ ಸಂಸ್ಕಾರದ ವೇಳೆ ಅಂಗಾಂಗ ಕಾಣೆಯಾಗಿರುವುದನ್ನು ಸಂಬಂಧಿಕರು ಪತ್ತೆಹಚ್ಚಿದ್ದಾರೆ. ಇದಕ್ಕೆ ಸಂಬಂಧಿಸಿದ ಎರಡು ಚಿತ್ರಗಳು ಸಾಮಾಜಿಕ ಜಾಲತಾಣಗಳಲ್ಲಿ ಪ್ರಸಾರವಾಗಿದ್ದವು. ಮೃತದೇಹಕ್ಕೆ ಹೊದಿಸಿರುವ ಬಿಳಿ ಬಟ್ಟೆಯ ಮೇಲೆ ರಕ್ತದ ಕಲೆಗಳು ಕಾಣಿಸುತ್ತಿವೆ. ಇದು ಮಾನವ ಅಂಗಾಂಗಳ ಕಳ್ಳಸಾಗಣೆ ಎಂಬುದಾಗಿ ಸುದ್ದಿ ಪ್ರಸಾರವಾಗಿತ್ತು.

ಈ ಬಗ್ಗೆ ಆಲ್ಟ್ ನ್ಯೂಸ್ ನಡೆಸಿದ ಫ್ಯಾಕ್ಟ್‌ ಚೆಕ್‌ನಲ್ಲಿ ಈ ಸುದ್ದಿ ಸುಳ್ಳು ಎಂಬುದು ದೃಢಪಟ್ಟಿದೆ. ಈ ಚಿತ್ರಗಳು ಲಖನೌದ ಭೇಸ ಕುಂದ್ ಚಿತಾಗಾರಕ್ಕೆ ಸಂಬಂಧಿಸಿವೆ. ವಾರಸುದಾರರಿಲ್ಲದ ಶವಗಳನ್ನು ಅಂತ್ಯಸಂಸ್ಕಾರ ನಡೆಸಲು ಅಲ್ಲಿ ಇರಿಸಲಾಗಿತ್ತು ಎಂಬುದು ಸ್ಪಷ್ಟಗೊಂಡಿದೆ. ಈ ಸಂಬಂಧ ಹರಿದಾಡಿರುವ ವಿಡಿಯೊ ಸಹ ಸುಳ್ಳು ಎಂಬುದು ಸಾಬೀತಾಗಿದೆ. ಮಾನವ ಅಂಗಾಂಗ ಕಳ್ಳಸಾಗಣೆಗೂ, ಈ ಮೃತದೇಹಗಳಿಗೂ ಸಂಬಂಧವಿಲ್ಲ.